4300 దాటిన కేసులు, ,,,దేశంలో విస్తరిస్తున్న కొవిడ్ మహమ్మారి

కరోనా మహమ్మారి ముగిసిపోయింది అనుకుంటున్న తరుణంలో మరోసారి పడగ విప్పుతోంది. విస్తరిస్తోంది. ఈ నేపథ్యంలోనే గత కొన్ని రోజులుగా దేశంలో నిత్యం కొవిడ్ కేసుల్లో పెరుగుదల కనిపించడం తీవ్ర కలకలం రేపుతోంది. మంగళవారం నాటికి దేశవ్యాప్తంగా యాక్టివ్ కొవిడ్ కేసుల సంఖ్య 4 వేల మార్కును దాటింది. గత 24 గంటల్లో ఇద్దరు కరోనా మహమ్మారికి బలయ్యారు. ఈ మేరకు తాజాగా కేంద్ర ఆరోగ్య, కుటుంబ సంక్షేమ మంత్రిత్వ శాఖ గణాంకాలు విడుదల చేసింది. గత 24 గంటల్లో దాదాపు 300 కొత్త కేసులు వెలుగుచూడగా.. ఇద్దరు ప్రాణాలు విడిచారు. వీటితో కలిపి ప్రస్తుతం దేశంలో మొత్తం 4300కుపైగా యాక్టివ్ కేసులు ఉన్నాయి.

దేశంలో కొత్తగా నమోదవుతున్న కరోనా కేసుల్లో కేరళ రాష్ట్రం అగ్రస్థానంలో కొనసాగుతోంది. మంగళవారం ఒక్కరోజే కేరళలో 171 కొత్త కేసులు వెలుగుచూడగా.. ఆ రాష్ట్రంలో మొత్తం యాక్టివ్ కేసుల సంఖ్య 1416కి చేరింది. మరోవైపు.. దేశ రాజధాని ఢిల్లీలోనూ కరోనా కేసులు వేగంగా పెరుగుతున్నాయి. కొత్తగా ఢిల్లీలో 124 మందికి కొవిడ్ వైరస్ సోకినట్లు నిర్ధారణ కావడంతో.. ఆ రాష్ట్రంలో మొత్తం యాక్టివ్ కేసుల సంఖ్య 393కు పెరిగింది. మహారాష్ట్రలో తాజాగా 69 కొత్త కేసులు కాగా.. అక్కడ యాక్టివ్ కేసుల సంఖ్య 494కు చేరింది. పశ్చిమ బెంగాల్‌లో గత 24 గంటల్లో కొత్తగా 11 కేసులు నమోదు కాగా.. ఆ రాష్ట్రంలో యాక్టివ్ కేసుల సంఖ్య 372గా ఉంది.

దేశంలో ముఖ్యంగా దక్షిణ, పశ్చిమ భారత రాష్ట్రాల్లో కొవిడ్ కేసుల్లో పెరుగుదలకు కారణం ఒమిక్రాన్ సబ్ వేరియంట్లేనని ఇండియన్ కౌన్సిల్ ఆఫ్ మెడికల్ రీసెర్చ్ (ఐసీఎంఆర్) డైరెక్టర్ జనరల్ రాజీవ్ బహల్ సోమవారం వెల్లడించారు. ప్రస్తుతం కొవిడ్ వ్యాప్తిలో ఉన్న ఈ సబ్ వేరియంట్లు తీవ్రమైనవిగా వరల్డ్ హెల్త్ ఆర్గనైజేషన్ వర్గీకరించబడలేదని స్పష్టం చేశారు. అందువల్ల ప్రస్తుతానికి.. ప్రజలు పరిస్థితిని గమనిస్తూ అప్రమత్తంగా ఉండాలని.. అయితే కరోనా పట్ల ఆందోళన చెందాల్సిన అవసరం లేదని తేల్చి చెప్పారు. నిపుణుల సూచనలు పాటిస్తూ.. కొవిడ్ వ్యాప్తిని అరికట్టడంలో ప్రజలు సహకరించాలని విజ్ఞప్తి చేశారు.