ఏపీలో అంగన్‌వాడీల ప్రధాన సమస్యకు పరిష్కారం

ఆంధ్రప్రదేశ్ ప్రభుత్వం అంగన్‌వాడీ కేంద్రాలకు సంబంధించి కీలక నిర్ణయం తీసుకుంది. గ్యాస్ కష్టాలకు చెక్ పెడుతూ రాష్ట్రంలోని 55 వేల అంగన్‌వాడీ కేంద్రాలకు ఇండక్షన్ స్టవ్‌లను పంపిణీ చేశారు. విజయవాడలో జరిగిన కార్యక్రమంలో గిరిజన సంక్షేమ శాఖ మంత్రి గుమ్మడి సంధ్యారాణి స్టవ్‌లను పంపిణీ చేశారు. ఈ కార్యక్రమంలో ఎంపీ కేశినేని చిన్ని, విజయవాడ తూర్పు ఎమ్మెల్యే గద్దె రామ్మోహన్ పాల్గొన్నరు. మంత్రి అంగన్‌వాడీ సిబ్బందికి స్టవ్‌లను స్వయంగా అందజేశారు. అంగన్‌వాడీ కేంద్రాల్లో గ్యాస్ సమస్యను అధిగమించేందుకు ఈ కార్యక్రమం చేపట్టారు.

అంగన్‌వాడీ కేంద్రాల్లోని గ్యాస్ ఇబ్బందులను దృష్టిలో ఉంచుకుని, ముఖ్యమంత్రి నారా చంద్రబాబు నాయుడు ఆదేశాల మేరకు ఈ నిర్ణయం తీసుకున్నామని మంత్రి సంధ్యారాణి తెలిపారు. మహిళా శిశు అభివృద్ధి మంత్రిత్వ శాఖ ఆధ్వర్యంలో ఈ స్టవ్స్‌ను పంపిణీ చేస్తున్నారన్నారు. అంగన్‌‌వాడీ వర్కర్క్స్‌కు ఇబ్బంది ఎదురవుతోందని.. దాన్ని దృష్టిలో ఉంచుకొని ఈ స్టవ్స్ ఇస్తున్నట్లు మంత్రి తెలిపారు. అంతేకాదు ఒక్కో అంగన్‌వాడీ సెంటర్‌క రూ.లక్ష అందిస్తున్నామన్నారు. త్వరలోనే తాగునీటి సమస్యలు, బాత్రూమ్‌ల సమస్యలు, పెండింగ్‌లో ఉన్న నిర్మాణాల కోసం నిధులు విడుదల చేస్తామన్నారు.

రాష్ట్రవ్యాప్తంగా మినీ అంగన్‌వాడీ సెంటర్లను అంగన్‌వాడీలుగా మార్చేందుకు ఒప్పందం కుదిరిందని.. అంగన్‌వాడీ మహిళలకు గుర్తింపు ఉండాలనే ఉద్దేశంతో వారికి గ్రాట్యుటీ ఇస్తున్నామన్నారు. అంగన్‌వాడీలలో తల్లీ, బిడ్డకి పౌష్ఠికరమైన భోజనం అందిస్తోందన్నారు. గతంలోఅంగన్‌వాడీల జీతాలను రూ.2500 నుంచి రూ.7000కు పెంచింది చంద్రబాబు ప్రభుత్వమే అన్నారు. మరోవైపు అంగన్‌వాడీ కేంద్రాలపై సోలార్ ప్యానెల్స్ ఏర్పాటు చేయాలనికి కేంద్రానికి లేఖ రాశామని విజయవాడ ఎంపీ కేశినేని చిన్ని తెలిపారు. తమ ప్రతిపాదన కేంద్రం పరిశీలనలో ఉందని.. అలాగే రాష్ట్రంలో కొత్త అంగన్‌వాడీ కేంద్రాల్లో ప్రహారీ గోడ నిర్మాణం, కిచెన్ ఏర్పాటు, సోలార్ వ్యవస్థను ఏర్పాటు చేయాలనే ప్రభుత్వం ఆలోచన చేస్తోందన్నారు. సొంత నిధులతోనైనా అంగన్‌వాడీలను అభివృద్ధి చేస్తామన్నారు ఎమ్మెల్యే గద్దె రామ్మోహన్. చక్కని ఆహ్లాదకరమైన వాతావరణంలో అంగన్‌వాడీ భవనం ఉండాలని.. ఈ మేరకు కొన్ని నమూనాలను చూశామన్నారు. ఈ అంగన్‌వాడీలను ప్రత్యేకంగా నిర్మాణం చేస్తే తక్కువ ఖర్చుతో ఎక్కువ సదుపాయాలు కల్పించొచ్చన్నారు.