విమానం ఎక్కుతూ ట్రంప్ తడబాటు.. వీడియో వైరల్

రెండోసారి అధ్యక్ష పీఠం అధిరోహించిన డొనాల్డ్ ట్రంప్‌ టైమ్ అస్సలు బాగులేదు. ఎన్నికల్లో తన వెన్నంటి నిలిచి.. విజయంలో కీలకంగా వ్యవహరించిన మిత్రుడు ఎలాన్ మస్క్ ఆయనకు శత్రువయ్యాడు. ట్రంప్‌ విధానాలు, నిర్ణయాలను బాహటంగా వ్యతిరేకిస్తూ కంట్లో నలుసుగా మారిపోయాడు మస్క్. ఈ నేపథ్యంలో అమెరికా అధ్యక్షుడు తీవ్ర మానసిక ఒత్తిడికి లోనవుతున్నట్టు సమాచారం. తలనొప్పిగా మారిన మస్క్ వ్యవహారం....ఇంకోవైపు పని ఒత్తిడితో అల్లాడిపోతున్నారు. దీంతో ఆయన తాజాగా, విమానం ఎక్కుతూ కాలు జారారు. త్రుటిలో ఆయన మెట్ల మీద నుంచి కిందపడిపోయేవారు.

అదృష్టం బాగుండి ట్రంప్‌కి పెద్ద ప్రమాదం తప్పింది. వివరాల్లోకి వెళ్తే... డొనాల్డ్ ట్రంప్ న్యూజెర్సీలోని మారీస్ టౌన్ మున్సిపల్ విమానాశ్రయంలో విమానం ఎక్కుతూ తూలిపడ్డారు. మెట్లపై నుంచి ఎక్కుతూ కుడిచేత్తో రేయిలింగ్ పట్టుకున్నారు. ఈ క్రమంలో ఓ మెట్టు చివరన కాలు పెట్టడంతో జారిపడ్డారు. ఆ వెంటనే నిలదొక్కుని.. . రేయిలింగ్‌ను పట్టుకుని ఉండటం వల్ల మోకాళ్లపై కింద పడపోకుండా నియంత్రించుకున్నారు. అనంతరం పైకి లేచి, చకచకా అక్కడి నుంచి పైకివెళ్లి విమానం ఎక్కారు. ప్రస్తుతం దీనికి సంబంధించిన వీడియోలు సోషల్ మీడియాలో తెగ వైరల్‌ అవుతోంది.

ఈ క్రమంలో ఆయన తీవ్ర ఒత్తిడిలోకి వెళ్లిపోయినట్టు తెలుస్తోంది. అటు, మిత్రుడు ఎలాన్ మస్క్ కూడా ట్రంప్‌నకు షాకిచ్చిన విషయం తెలిసిందే. తడబాటుకు ముందు ట్రంప్ ముఖంలో ఏదో తెలియని బాధ స్పష్టంగా కనిపిస్తోంది. ఆయన దీర్ఘంగా ఆలోచిస్తూ మెట్లు ఎక్కడంతో తడబడ్డారు. కేవలం ట్రంప్ మాత్రమే కాదు.. ఆయన పక్కనే ఉన్న అమెరికా విదేశాంగ మంత్రి మార్క్ రూబియో కూడా తడబడటం గమనార్హం. దీనిపై సోషల్ మీడియాలో నెటిజన్లు వ్యంగ్యంగా కామెంట్ చేస్తున్నారు.

గతేడాది అమెరికా అధ్యక్ష ఎన్నికల సమయంలో డెమొక్రాట్ నేత జో బైడెన్ మానసిక స్థితి గురించి కామెంట్లు చేసిన ట్రంప్.. ఇప్పుడు తన పరిస్థితి గురించి ఏమంటారు? అని ప్రశ్నిస్తున్నారు.అక్రమ వలసదారుల నిర్బంధం, తరలింపును వ్యతిరేకిస్తూ పెద్ద ఎత్తున జరుగుతోన్న ఆందోళనలు, నిరసనలు అమెరికా అధ్యక్షుడ్ని ఉక్కిరిబిక్కిరికి గురిచేస్తున్నాయి. లాస్ ఏంజిల్స్‌లో ఆందోళనకారులను నిలువరించడానికి ఏకంగా నేషనల్ గార్డ్స్ దళాలనే రంగంలోకి దింపాల్సిన పరిస్థితి నెలకుంది. మూడు రోజులుగా జరుగుతోన్న ఆందోళనలు.. ఉద్రిక్తతంగా మారాయి.

అక్రమ వలసదారులను ఉంచిన మెట్రోపాలిటన్ డిటెన్షన్ సెంటర్ వద్ద నేషనల్ గార్డులను మోహరించారు. కానీ, సైన్యం అక్కడ నుంచి వెళ్లిపోవాలని పెద్ద ఎత్తున నినాదాలు చేస్తూ. నేషనల్ గార్డ్ దళాలను నిరసనకారులు చుట్టుముట్టారు. దీంతో వారిపై రబ్బరు బుల్లెట్లు, వాటర్ క్యానన్లు, టియర్ గ్యాస్ ప్రయోగించి వారిని చెదరగొట్టారు.