థానే రైలు ప్రమాద ఘటనతో రైల్వేశాఖ సంచలన నిర్ణయం

మహారాష్ట్రలోని థానేలో జరిగిన ఘోర ప్రమాదం నేపథ్యంలో రైల్వే శాఖ కీలక నిర్ణయం తీసుకుంది. ఇకపై లోకల్ ట్రైన్స్‌కూ ఆటోమేటిక్ డోర్స్ బిగించాలని నిర్ణయించింది. థానేలో జరిగిన ఘోరం మరో రోజు, మరో చోట జరగకుండా ఉండేందుకు రైల్వే శాఖ ఈ చర్యలకు ఉపక్రమించింది. థానేలోని లోకల్ ట్రైన్‌లో ప్రయాణిస్తూ జారి కిందపడి ఐదుగురు మరణించిన సంగతి తెలిసిందే. ఈ ఘటన నేపథ్యంలోనే రైల్వే శాఖ తాజా నిర్ణయం తీసుకుంది.

ముంబయి సబర్బన్ ప్రాంతంలో నడిచే అన్ని రైళ్లకూ ఆటోమేటిక్ డోర్స్ ఏర్పాటు చేయాలని రైల్వే శాఖ నిర్ణయించినట్లు రైల్వే బోర్డు ఎగ్జిక్యూటివ్ డైరెక్టర్ దిలీప్ కుమార్ తెలిపారు. ప్రయాణికుల భద్రతే భారతీయ రైల్వేకు తొలి ప్రాధాన్యం అని ఆయన పేర్కొన్నారు. ఫుట్‌బోర్డుపై ప్రయాణిస్తున్న ప్రయాణికుల బ్యాగులు పరస్పరం తాకడంతోనే ఈ ఘోర ప్రమాదం జరిగినట్లు రైల్వే అధికారులు పేర్కొంటున్నారు. ఈ ఘటనపై రైల్వే యంత్రాంగం దర్యాప్తు నిర్వహిస్తోందని ఇప్పటికే ముఖ్యమంత్రి దేవేంద్ర ఫడణవీస్ తెలిపారు.

 థానే జిల్లాలోని ముంబ్రా - దివా స్టేషన్ల మధ్య ఈ దుర్ఘటన జరిగింది. సదరు లోకల్ ట్రైయిన్‌లో తీవ్ర రద్దీ కారణంగా ఈ ప్రమాదం చోటుచేసుకుంది. పరిమితికి మించి ప్రయాణికులు రైలు ఎక్కడం వల్ల లోపల చోటులేకుండా పోయింది. దీంతో చాలా మంది ఫుట్‌బోర్డుపై వేలాడుతూ ప్రయాణించారు. ఉదయం 10 గంటల సమయంలో రెండు రైళ్లు వ్యతిరేక దిశలో ఒకదానిని ఒకటి దాటుతున్న సమయంలో ఫుట్‌బోర్డుపై వేలాడుతున్న రెండు రైళ్లలో ప్రయాణిస్తున్న వారి బ్యాగులు ఒకదానితో ఒకటి తాకడంతో వారికి పట్టు కోల్పోయింది.

ఒకరి తర్వాత మరొకరికి పట్టు సడలడంతో వారు కూడా కింద పడిపోయినట్లు రైలులో ఉన్న మిగతా ప్రయాణికులు తెలిపారు. ఈ దుర్ఘటనలో ఐదుగురు ప్రయాణికులు అక్కడికక్కడే ప్రాణాలు కోల్పోయారు. మరికొందరు తీవ్రంగా గాయపడ్డారు. క్షతగాత్రులను థానే సివిల్ ఆస్పత్రికి, కళ్యాణ్‌లోని ఓ ప్రైవేటు ఆస్పత్రికి తరలించారు. క్షతగాత్రుల్లో చాలా మంది పరిస్థితి విషమంగా ఉన్నట్లు రైల్వే శాఖ తెలిపింది. కాగా.. ప్రతిరోజూ 80 లక్షల మంది ప్రయాణికులు ముంబై లోకల్ రైళ్లలో ప్రయాణిస్తుంటారు.