కొత్తగా మరో ఇన్నర్ రింగ్ రోడ్డు.. మారనున్న ఏపీ రూపురేఖలు

గుంటూరు వాసులకు శుభవార్త. గుంటూరు నగరంలో ఇన్నర్ రింగ్ రోడ్డు మూడో దశ నిర్మాణం త్వరలో మొదలు కానుంది. వైసీపీ ప్రభుత్వం పట్టించుకోకపోవడంతో ఆగిపోయిన ఈ ఇన్నర్ రింగ్ రోడ్డు పనులకు ఇప్పుడు కూటమి ప్రభుత్వం మళ్ళీ ఊపిరి పోసింది. భూసేకరణ పూర్తి చేసి, నష్టపరిహారం చెల్లించి, నిర్మాణాలను తొలగించే పనులను అధికారులు వేగవంతం చేస్తున్నారు. రూ. 48 కోట్ల ఖర్చుతో గుంటూరు ఇన్నర్ రింగ్ రోడ్డును నిర్మించనున్నారు. దీనికి CRDA ఎగ్జిక్యూటివ్ కమిటీ ఆమోదం తెలిపింది. దీంతో త్వరలో టెండర్లు పిలవనున్నారు.

పల్నాడు నుంచి విజయవాడ వెళ్ళే వాహనాలు గుంటూరులోకి రాకుండానే వెళ్ళేందుకు ఈ రోడ్డు ఉపయోగపడనుంది. అయితే వైసీపీ ప్రభుత్వ హయాంలో ఈ ప్రాజెక్టు నిర్మాణం నెమ్మదిగా సాగింది. అయితే టీడీపీ కూటమి ప్రభుత్వం అధికారంలోకి రాగానే కేంద్ర సహాయ మంత్రి పెమ్మసాని చంద్రశేఖర్ ఈ ప్రాజెక్టు మీద ప్రత్యేక చొరవ చూపారు. దీంతో మూడో దశ పనుల్లో కదలిక వచ్చింది. ఇన్నర్ రింగ్ రోడ్డు నిర్మాణంలో 180 ఇళ్ళు తొలగించాల్సి ఉంది.

బాధితులకు నష్టపరిహారంతో పాటు వేరే చోట ఇళ్ళ స్థలాలు ఇవ్వడానికి ప్రభుత్వం సిద్ధంగా ఉంది. నిర్వాసితులకు రూ. 6.35 కోట్ల నష్టపరిహారాన్ని GMC ద్వారా వెంటనే పంపిణీ చేసేందుకు ప్రభుత్వం సిద్ధమైంది. అలాగే స్వర్ణభారతి నగర్ వద్ద ఇళ్ళ తొలగింపు పనులు చేపట్టారు. దీంతో ఇన్నర్ రింగ్ రోడ్డు ప్రాెజెక్టుకు ఉన్న అడ్డంకులు తొలిగిపోయాయని అధికారులు చెప్తున్నారు.

ఒలింపిక్స్‌లో యోగా.. మోదీ తలచుకుంటే ఏదైనా సాధ్యమే: చంద్రబాబు

ఇన్నర్ రింగ్ రోడ్డు మూడో దశలో 4.25 కిలోమీటర్ల మేర రోడ్డు నిర్మిస్తారు. ఇందులో 3.1 కిలోమీటర్ల మేర ఎలాంటి ఇబ్బందులు లేవు. మిగిలిన ప్రాంతంలో కొన్ని సమస్యలు ఉండగా వాటిని కూడా పరిష్కరించారు. రూ. 48 కోట్లతో ఇన్నర్ రింగ్ రోడ్డు మూడో దశ నిర్మాణానికి CRDA ఎగ్జిక్యూటివ్ కమిటీ ఆమోదం తెలిపింది.మరోవైపు ఇన్నర్ రింగ్ రోడ్డు మొదటి దశను 2010-14 మధ్య చేపట్టారు. మొదటి దశలో ఆటోనగర్ నుంచి రెడ్డిపాలెం మీదుగా 4.7 కిలోమీటర్ల మేర రోడ్డు నిర్మించారు.

2014లో రెండో దశ చేపట్టారు. ఈ దశలో అమరావతి రోడ్డు నుంచి స్వర్ణభారతినగర్ వరకు రూ. 29.08 కోట్లతో 2 కిలోమీటర్ల మేరకు రోడ్డు వేశారు. ఇప్పుడు మూడో దశలో స్వర్ణభారతినగర్ నుంచి పెదపలకలూరు వరకు రోడ్డు నిర్మించనున్నారు. ఇళ్ల తొలగింపు సమస్యల వల్ల ఈ పనులు ఇంతకాలం ఆగిపోయాయి.