జమ్మూకాశ్మీర్‌లో యోగా చేసిన శునకం,,,,సోషల్ మీడియాలో వీడియో వైరల్

శునకాలు విశ్వాసానికి మారుపేరు అని చెబుతారు. పెట్‌లుగా చాలా ఇళ్లలో కుక్కలను పెంచుకుంటున్నారు. అవి ప్రదర్శించే క్యూట్ హావభావాలు, చేసే అల్లరికి మురిసిపోతుంటారు. వాటిని వీడియోలు తీసి సోషల్ మీడియాలో షేర్ చేసుకుంటారు. అయితే ఇప్పుడు అలాంటి ఓ కుక్క క్యూట్ వీడియో నెట్టింట్లో చక్కర్లు కొడుతోంది. వేల సంఖ్యలో షేర్లు, లైకులతో నెటిజన్లు ఈ శునకాన్ని ఆకాశానికెత్తేస్తున్నారు. ఆ వివరాలు.

జమ్మూకాశ్మీర్‌లో 11వ అంతర్జాతీయ యోగా దినోత్సవం సందర్భంగా ఏర్పాటు చేసిన ప్రత్యేక యోగా కార్యక్రమంలో ఒక శునకం అందరి దృష్టిని ఆకర్షించింది. నేషనల్ డిజాస్టర్ రెస్పాన్స్ ఫోర్స్ (NDRF) శిక్షణ ఇచ్చిన ఈ కుక్క, ఉధంపూర్‌లోని 13వ బెటాలియన్ క్యాంపస్‌లో జరిగిన ఆరోగ్య కార్యక్రమంలో పాల్గొంది. ఈ సంవత్సరం "యోగా ఫర్ వన్ ఎర్త్, వన్ హెల్త్" అనే థీమ్‌తో యోగా యొక్క ప్రయోజనాలను తెలియజేయడానికి ఈ కార్యక్రమం జరిగింది. 55 మంది పాల్గొన్న ఈ కార్యక్రమంలో ఒక శునకం యోగా చేసింది. ఇది చూసి అందరూ ఆశ్చర్యపోయారు.

ఈ ప్రత్యేక కార్యక్రమంలో ఆ శునకం తడబడకుండా తాడాసనం, భుజంగాసనం, అష్టాంగ నమస్కారం లాంటి ఆసనాలను అద్భుతంగా ప్రదర్శించింది. ఇది చూసినవారంతా దాని ప్రదర్శనకు ఫిదా అయిపోయారు. ఈ శునకం తన చురుకైన ప్రదర్శనతో మొత్తం కార్యక్రమానికే హైలైట్‌గా నిలిచింది. అక్కడున్న యోగా గురువులు, అధికారులు ఈ శునకాన్ని ప్రశంసలతో మంచెత్తారు. అయితే ఈ శునకాన్ని NDRF సిబ్బంది దత్తత తీసుకున్నారు. గత రెండు సంవత్సరాలుగా దానికి ప్రత్యేక శిక్షణ ఇచ్చారు. ఈ క్రమంలో యోగా ఆసనాలపై దానికి అభిరుచి పెరిగింది. జవాన్లతో కలిసి ప్రతిరోజూ యోగా చేయడం ప్రారంభించింది.

మరోవైపు ఈ శునకం చేసిన యోగా దృశ్యం ప్రస్తుతం సోషల్ మీడియాలో విపరీతంగా వైరల్ అవుతోంది. దీన్ని చూసిన నెటిజన్లు ఆ శునకాన్ని 'యోగాసనాల్లో సూపర్‌స్టార్', 'యోగాస్టార్' అంటూ ప్రశంసిస్తున్నారు. ఈ సంఘటన అంతర్జాతీయ యోగా దినోత్సవానికి ఒక ప్రత్యేక ఆకర్షణగా నిలిచింది.

దీనిపై బెటాలియన్ ఇన్‌స్పెక్టర్ మున్షి రామ్ స్పందించారు. "అది ఒక వీధి కుక్క, కానీ మేము దానికి శిక్షణ ఇచ్చాము. శిక్షణ తరువాత అది క్రమశిక్షణకు, మార్పుకు చిహ్నంగా మారింది" అని ఆయన అన్నారు. "యోగా మనుషులకే కాకుండా జంతువులకు కూడా చేరువవుతోందని ఇది చూపిస్తుంది" అని చెప్పారు. మానసిక, శారీరక ఆరోగ్యం కోసం ప్రతిరోజూ యోగా చేయడం చాలా ముఖ్యం అన్నారు. "ఒక కుక్క చేయగలిగినప్పుడు, మనమెందుకు చేయలేము? ఈ అంతర్జాతీయ యోగా దినోత్సవం సందర్భంగా, ప్రజలు యోగాను కేవలం జూన్ 21న మాత్రమే కాకుండా, సంపూర్ణ ఆరోగ్యం కోసం జీవితాంతం ఆచరించాలని మేము కోరుకుంటున్నాము" అని ఆయన అన్నారు.