దైవ దర్శనం అనంతరం ఇంటికి వెళ్తుండగా అనుకోని ప్రమాదం

తన కంటి పాప అయిన బిడ్డకు ఎటువంటి కష్టం రాకూడదని దైవాన్ని ప్రార్థించింది. సాఫీగా దర్శనం పూర్తి కావటంతో ఒడిలో మూడేళ్ల బిడ్డతో కారులో ఇంటికి బయల్దేరింది. ఇంకో అరగంట అయితే ఇంటికి చేరుతుందనగా విధి వక్రించింది. కారు బ్రేక్‌డౌన్ అయిందని కిందకు దిగేలోపు.. వెనుక నుంచి బొలెరో రూపంలో దూసుకొచ్చిన మృత్యువు ఆమెను కబళించింది. బిడ్డ కళ్లముందే తల్లి అల్లంత దూరాన ఎగిరిపడి అక్కడికక్కడే ప్రాణాలు విడిచింది. ఈ హృదయ విదారక ఘటన సోమవారం ఉదయం కూకట్‌పల్లి పోలీస్‌స్టేషన్ పరిధిలో చోటుచేసుకుంది. ఆ మూడేళ్ల కుమారుడు తీవ్రగాయాలతో ప్రాణాపాయ స్థితిలో చికిత్స పొందుతున్నాడు.

వివరాల్లోకి వెళితే.. డబీర్‌పురకు చెందిన అమిత్‌కరణ్ సివిల్ కాంట్రాక్టర్. ఇతనికి భార్య కృతిక (30), కుమారుడు మాధవ్ (3) ఉన్నారు. మహారాష్ట్రలోని తుల్జాపూర్ భవానీమాతకు మొక్కు తీర్చుకోవడానికి అమిత్‌ కరణ్ తన తల్లిదండ్రులు, భార్య కృతిక, కుమారుడు మాధవ్‌తో కలిసి రెండు రోజుల క్రితం వెళ్లారు. ఆదివారం దర్శనం పూర్తి చేసుకుని ఆనందంగా తిరిగి హైదరాబాద్ బయల్దేరారు. కూకట్‌పల్లి మెట్రో పిల్లర్ 761 వద్దకు రాగానే వారు ప్రయాణిస్తున్న కారు బ్రేక్‌డౌన్ అయి ముందుకు కదల్లేదు. డ్రైవర్ కారును రోడ్డుకు ఒక వైపున ఆపాడు. దీంతో కృతిక తన కుమారుడు మాధవ్‌ను ఒడిలోకి తీసుకుని జాగ్రత్తగా కారులోంచి కిందకు దిగింది. సరిగ్గా అదే సమయంలో, మియాపూర్ వైపు నుంచి వేగంగా దూసుకొచ్చిన ఒక బొలేరో వాహనం కారు దిగుతున్న ఆమెను బలంగా ఢీకొట్టింది.

ప్రమాద తీవ్రతకు తల్లీ, కుమారుడు తీవ్రంగా గాయపడ్డారు. కుటుంబ సభ్యులు వెంటనే వారిని వెంసమీప ఆసుపత్రికి తరలించారు. అయితే, అప్పటికే కృతిక ప్రాణాలు కోల్పోయిందని పరీక్షించిన వైద్యులు నిర్ధారించారు. ప్రస్తుతం మాధవ్ తీవ్ర గాయాలతో ఆసుపత్రిలో ప్రాణాపాయ స్థితిలో చికిత్స పొందుతున్నాడు. ఈ ప్రమాదానికి కారణమైన బొలేరో డ్రైవర్ నానా సాహెబ్‌ను కూకట్‌పల్లి పోలీసులు అదుపులోకి తీసుకుని విచారిస్తున్నారు. అతివేగమే ప్రమాదానికి కారణంగా పోలీసులు ప్రాథమికంగా భావిస్తున్నారు.