ఏయే నట్స్ ఏ సమయంలో తినాలో తెలుసా

గుండె ఆరోగ్యంగా ఉండాలంటే నట్స్ తినాలని వైద్యులు సూచిస్తారు. వీటిలో శరీరానికి కావాల్సిన పోషకాలన్నీ ఉంటాయి. అందుకే..రెగ్యులర్ గా వీటిని తీసుకోవాలని చెబుతుంటారు. యాంటీ ఆక్సిడెంట్స్, విటమిన్స్, మినరల్స్ ఇలా అన్ని విధాలుగా ఆరోగ్యాన్ని అందించగలిగే న్యూట్రియెంట్స్ వీటిలో ఉంటాయి. ముఖ్యంగా బాదం పప్పు గుండెని భద్రంగా ఉంచుతుంది. ఇక వాల్ నట్స్ మెదడు చురుగ్గా పని చేసేలా చేస్తుంది. జీడిపప్పు బరువు పెరగడానికి ఉపయోగపడుతుంది.

ఇలా ఒక్కో నట్ తో ఒక్కో ప్రయోజనం ఉంటుంది. అయితే..వీటితో పాటు చియా, అవిసె గింజలు కూడా డైట్ చేర్చుకుంటున్నారు చాలా మంది. కానీ..నట్స్, సీడ్స్ ని ఏ టైమ్ లో తినాలనే అవగాహన మాత్రం చాలా తక్కువగా ఉంటోంది. అందుకే న్యూట్రిషనిస్ట్ దీప్షికా జైన్ దీనిపై క్లారిటీ ఇచ్చారు. ఏ నట్స్ ఎప్పుడు తీసుకోవాలి, ఏ గింజలు ఎప్పుడు తినాలని క్లియర్ గా ఎక్స్ ప్లెయిన్ చేశారు.

గుమ్మడి గింజలు

గుమ్మడి గింజల్లో బోలెడన్ని యాంటీ ఆక్సిడెంట్స్ ఉంటాయి. ఇవి బరువు తగ్గించడంతో పాటు శరీరానికి కావాల్సిన మెగ్నీషియంని అందిస్తాయి. చాలా మందిలో మెగ్నీషియ లోపం వల్ల సరిగ్గా నిద్ర పట్టదు. ఈ మినరల్ సరైన విధంగా అందితేనే కార్టిసాల్ హార్మోన్స్ అధికంగా విడుదలవ్వకుండా ఉంటాయి. అయితే..చాలా మంది గుమ్మడి గింజలను ఉదయం పూట తింటారు. కానీ..ఇలా చేయడం కన్నా రాత్రిపూట తినడం చాలా మంచిదని చెబుతున్నారు దీప్షికా జైన్. ఎందుకంటే..వీటిలో ఉండే మెగ్నీషియం హాయిగా నిద్రపట్టేందుకు సహకరిస్తుంది. అందుకే..సరిగ్గా నిద్రపోయే ముందు కొన్ని గుమ్మడి గింజలు తింటే ఎలాంటి డిస్టర్బెన్స్ లేకుండా కంటి నిండా నిద్రపోయేందుకు వీలుంటుంది.

బాదం

బాదంలో హెల్తీ ఫ్యాట్స్ ఎక్కువగా ఉంటాయి. ఈ కొవ్వు ఆరోగ్యానికి మంచి చేస్తుంది. ముఖ్యంగా రక్తనాళాల్లో ఉన్న అదనపు కొవ్వుని కరిగించేందుకు ఇవి ఉపయోగపడతాయి. మొత్తంగా గుండె నుంచి మిగతా అవయవాలకు సరైన విధంగా రక్తం సరఫరా అయ్యేలా తోడ్పడతాయి. అంతే కాదు. వీటి వల్ల బ్లడ్ షుగర్ లెవెల్స్ కూడా కంట్రోల్ అవుతాయి. ఒత్తిడిని తగ్గిస్తాయి. అయితే..బాదం రాత్రి పూట కాకుండా ఉదయమే..అది కూడా పరగడుపున తీసుకుంటే ఈ ప్రభావం ఎక్కువగా ఉంటుందని చెబుతున్నారు న్యూట్రిషనిస్ట్. అయితే..రాత్రి పూటే బాదం నీళ్లలో నానబెట్టుకుని ఉదయమే పొట్టు తీసి తినాలి. బాదం పొడి చేసుకుని పాలల్లో వేసుకుని, కాస్త తేనె కలుపుకుని తాగినా పోషకాలు అందుతాయి.

ఎప్పుడు తింటే బెటర్

చియా సీడ్స్

​చియా సీడ్స్ ని ఎప్పుడూ పరగడుపున తీసుకోవద్దని చెబుతున్నారు న్యూట్రిషనిస్ట్ దీప్షికా జైన్. ఏదైనా తిన్న తరవాతే వీటిని తీసుకోవాలి. ఎందుకంటే..చియా గింజలు ఆకలిని చంపేస్తాయి. వీటిని తిన్న తరవాత చాలా సేపటి వరకూ ఆకలిగా అనిపించదు. దీని వల్ల బరువు తగ్గిపోయే అవకాశం ఉంటుంది. అధిక బరువు ఉన్న వాళ్లకి ఇది మంచిదే అయినా మామూలు బరువు ఉన్న వాళ్లు మాత్రం వీటిని పరగడుపున తీసుకోకపోవడమే మంచిది. వీటిలో ఫైబర్ అధికంగా ఉంటుంది. అందుకే..కొన్ని తినగానే కడుపు నిండిపోయినట్టుగా అనిపిస్తుంది. వీలైనంత వరకూ వీటిని మిడ్ స్నాక్ లా తీసుకుంటే..అంటే..ఏదైనా తిన్నతరవాత తింటే మంచిది.

పిస్తా

పిస్తాని చాలా మంది ఉదయం తీసుకుంటారు. ఉదయం తింటే ఆరోగ్యంగా ఉండొచ్చు అనుకుంటారు. అయితే.. న్యూట్రిషనిస్ట్ ప్రకారం మాత్రం పిస్తాని రాత్రి పూట తీసుకుంటే మంచిది. ఎందుకంటే పిస్తాల ట్రిప్టోఫన్ ఎక్కువగా ఉంటుంది. దీని వల్ల బాడీలో సెరోటానిన్ హార్మోన్స్ ఎక్కువగా రిలీజ్ అవుతాయి. ఇది మైండ్ ని పూర్తిగా రిలాక్స్ చేసేస్తుంది. ఈ లెవెల్స్ పెరిగితే ఎలాంటి ఇబ్బంది లేకుండా హాయిగా నిద్రపడుతుంది. విపరీతమైన స్ట్రెస్ కి లోనయ్యే వాళ్లు రాత్రి పూట పిస్తా తింటే చాలా వరకూ ఈ సమస్య నుంచి బయటపడవచ్చు. పిస్తాలో హెల్తీ ఫ్యాట్స్ ఎక్కువగా ఉంటాయి. ఫైబర్, ప్రొటీన్ తో పాటు మినరల్స్ పుష్కలంగా ఉంటాయి. ఇవి కొలెస్ట్రాల్ ని తగ్గించడంతో పాటు బ్లడ్ షుగర్ లెవెల్స్ ని కంట్రోల్ లో ఉంచుతాయి. జీర్ణ సమస్యల్నీ తగ్గిస్తాయి.

వాల్ నట్స్

వాల్ నట్స్ లో ఒమెగా 3 ఫ్యాటీ యాసిడ్స్ ఎక్కువగా ఉంటాయి. ఇవి శరీరానికి ఎంతో మంచి చేస్తాయి. ముఖ్యంగా చెడు కొలెస్ట్రాల్ పెరగకుండా కట్టడి చేస్తాయి. అయితే..వీటిని ఉదయమే తీసుకుంటే చాలా మంచిదని చెబుతున్నారు దీప్షికా జైన్. అది కూడా పరగడుపున తీసుకుంటే ఇంకా ఆరోగ్యంగా ఉండొచ్చు. ఎందుకంటే ఇవి మెదడుని చురుగ్గా ఉంచడంలో తోడ్పడతాయి. ఫలితంగా రోజంతా యాక్టివ్ గా ఉండేందుకు వీలవుతుంది. జ్ఞాపకశక్తి కూడా పెరుగుతుంది. దీంతో పాటు ఇందులో ఉండే యాంటీ ఆక్సిడెంట్స్ గుండెకి మంచి చేస్తాయి. వాల్ నట్స్ లో ఉండే ఫైబర్ వల్ల కొన్ని తీసుకున్నా కడుపు నిండిపోయినట్టుగా అనిపిస్తుంది. తద్వారా అనారోగ్యకరమైన ఆకలి తగ్గుతుంది.