ఇస్లామిక్ స్టేట్ భారత్ విభాగానికి అధిపతిగా భావిస్తున్న సకీబ్ నచాన్ (57) శనివారం ఢిల్లీలో మరణించాడు

ఇస్లామిక్ స్టేట్  భారత్ విభాగానికి అధిపతిగా భావిస్తున్న సకీబ్ నచాన్ (57) శనివారం ఢిల్లీలో మరణించాడు. నిషేధిత ఉగ్రవాద సంస్థ 'సిమి' స్టూడెంట్స్ ఇస్లామిక్ మూవ్‌మెంట్ ఆఫ్ ఇండియా మాజీ నేత అయిన అతను, తీహార్ జైలులో విచారణ ఖైదీగా ఉన్నాడు. ఇటీవల తీవ్ర అస్వస్థతకు గురవడంతో ఆసుపత్రిలో చేర్పించగా, అక్కడ చికిత్స పొందుతూ కన్నుమూశాడు., ఐసిస్ టెర్రర్ మాడ్యూల్ కేసుకు సంబంధించి జాతీయ దర్యాప్తు సంస్థ  కస్టడీలో ఉన్న నాచన్, ప్రస్తుతం తీహార్ జైలులో ఉన్నాడు. మంగళవారం జైలులో అతని ఆరోగ్యం క్షీణించడంతో అధికారులు వెంటనే ఢిల్లీలోని సఫ్దర్‌జంగ్ ఆసుపత్రికి తరలించారు. పరీక్షించిన వైద్యులు అతనికి బ్రెయిన్ హెమరేజ్ మెదడులో రక్తస్రావం అయినట్లు నిర్ధారించారు.నాలుగు రోజులుగా వైద్యుల పర్యవేక్షణలో ఉన్నప్పటికీ, శనివారం ఉదయం అతని పరిస్థితి మరింత విషమించింది. ఈ క్రమంలో మధ్యాహ్నం 12:10 గంటలకు అతను మరణించినట్లు ఆసుపత్రి అధికారులు అధికారికంగా ప్రకటించారు.మహారాష్ట్రలోని థానే జిల్లా పఢ్గా పట్టణానికి చెందిన సకీబ్ అబ్దుల్ హమీద్ నచాన్‌కు సుదీర్ఘ ఉగ్ర చరిత్ర ఉంది. 1990ల చివరలో, 2000ల ప్రారంభంలో 'సిమి' సంస్థలో సీనియర్ నేతగా చురుగ్గా పనిచేశాడు. దేశ వ్యతిరేక కార్యకలాపాలకు పాల్పడుతోందన్న ఆరోపణలతో 2001లో కేంద్ర ప్రభుత్వం సిమి సంస్థను నిషేధించింది.2002-03 మధ్యకాలంలో ముంబై సెంట్రల్, విలే పార్లే, ములుంద్ స్టేషన్లలో జరిగిన వరుస బాంబు పేలుళ్ల కేసుల్లో నచాన్ పేరు దేశవ్యాప్తంగా వెలుగులోకి వచ్చింది. ఈ దాడుల్లో 13 మంది ప్రాణాలు కోల్పోగా, వందలాది మంది గాయపడ్డారు. ఈ కేసుల విచారణలో భాగంగా, అతని వద్ద ఏకే-56 రైఫిల్‌తో సహా అక్రమ ఆయుధాలు ఉన్నట్లు తేలింది. దీంతో ‘పోటా’ ఉగ్రవాద నిరోధక చట్టం ప్రత్యేక కోర్టు అతనికి పదేళ్ల కఠిన కారాగార శిక్ష విధించింది.శిక్షాకాలంలో సత్ప్రవర్తన కారణంగా ఐదు నెలల మినహాయింపు పొంది 2017లో జైలు నుంచి విడుదలయ్యాడు. అయితే, దేశవ్యాప్తంగా ఐసిస్ ఉగ్రవాదులు, మద్దతుదారులపై ఎన్ఐఏ జరిపిన దాడుల్లో భాగంగా 2023లో అతడిని మళ్లీ అరెస్ట్ చేశారు. ఢిల్లీ-పఢ్గా ఐసిస్ టెర్రర్ మాడ్యూల్ కేసులో ప్రధాన నిందితుడిగా పేర్కొని అప్పటి నుంచి విచారణ జరుపుతున్నారు. ఈ కేసులో విచారణ ఖైదీగా ఉండగానే అతను మరణించాడు.