స్నేక్ క్యాచర్ భాస్కర్ నాయుడుకు మరోసారి పాము కాటు

ప్రమాదకరమైన, విషపూరితమైన పాములను కూడా సులువుగా బంధించడంలో ఆయన నేర్పరి. ఇప్పటి వరకూ స్నేక్ క్యాచర్‌గా వేల సంఖ్యలో పాములను పట్టిన అనుభవం, నైపుణ్యం ఆయన సొంతం. ఆయనే స్నేక్ క్యాచర్ భాస్కర్ నాయుడు . తిరుమలలో కనిపించే పాములను బంధిస్తూ పాముల భాస్కర్‌గా గుర్తింపు పొందారు భాస్కర్ నాయుడు. అయితే స్నేక్ క్యాచర్ భాస్కర్ నాయుడు మరోసారి పాముకాటుకు గురయ్యారు. పాముకాటుకు గురైన భాస్కర్ నాయుడును వెంటనే ఆస్పత్రికి తరలించారు. ప్రస్తుతం తిరుపతిలోని అమరరాజా సూపర్ స్పెషాలిటీ ఆస్పత్రిలో భాస్కర్ నాయుడు చికిత్స పొందుతున్నారు. మెడికల్ ఇంటెన్సివ్ కేర్‌లో ఆయనకు చికిత్స జరుగుతోంది.

తిరుమల కొండపై కనిపించే ఎన్నో పాములను బంధించి.. అడవిలో వదిలివేశారు భాస్కర్ నాయుడు. అయితే శుక్రవారం రోజున తిరుమలలో కోబ్రా.. భాస్కర్ నాయుడును కాటు వేసినట్లు సమాచారం. దీంతో ఆయన అస్వస్థతకు గురికాగా.. వెంటనే ఆస్పత్రికి తరలించారు. ప్రస్తుతం ఐసీయూలో భాస్కర్ నాయుడుకు చికిత్స కొనసాగుతోంది. మరోవైపు గతంలోనూ పాముకాటుకు గురైన భాస్కర్ నాయుడు.. చావు అంచుల వరకూ వెళ్లి మృత్యుంజయుడై తిరిగొచ్చారు.2022 జనవరిలో పామును పట్టేందుకు వెళ్లిన భాస్కర్ నాయుడును పింజర పాము కాటు వేసింది. దీంతో తీవ్ర అస్వస్థతకు గురయ్యారు. వైద్యుల పర్యవేక్షణలో చావు అంచుల వరకూ వెళ్లి బయటపడ్డారు. ఆ తర్వాత మూడు నెలలకే భాస్కర్ నాయుడు తిరిగి విధుల్లో చేరారు.

అయితే భాస్కర్ నాయుడును ఇప్పుడు మరోసారి పాము కాటు వేసింది. చేతికి వేసుకున్న గ్లౌజ్ ఊడిపోవటంతోనే పాము కాటుకు గురైనట్లు తెలుస్తోంది. ప్రస్తుతం భాస్కర్ నాయుడు ఆరోగ్య పరిస్థితి నిలకడగానే ఉన్నట్లు సమాచారం. మరోవైపు చిత్తూరు జిల్లా చిన్నగొట్టిగల్లు గ్రామానికి చెందిన భాస్కర్ నాయుడు వ్యవసాయ నేపథ్యం నుంచి వచ్చారు. 1982లో టీటీడీ అటవీశాఖలో చేరారు. 2005లో తొలిసారిగా తిరుమలలో కొండ చిలువను బంధించారు భాస్కర్ నాయుడు. అప్పటి నుంచి ఇప్పటి వరకూ వేలాది పాములను బంధించడం, అటవీ ప్రాంతంలో సురక్షితంగా వదిలేయడం ఆయన విధి. అలాంటి స్నేక్ క్యాచర్ భాస్కర్ నాయుడు పాముకాటుకు గురి కావటంపై ఈ విషయం తెలిసిన భక్తులు విచారం వ్యక్తం చేస్తున్నారు. మరోవైపు కరకంబాడిలోని అమరరాజా సూపర్ స్పెషాలిటీ ఆస్పత్రిలో.. వైద్యుల పర్యవేక్షణలో భాస్కర్ నాయుడుకు చికిత్స జరుగుతోంది. ప్రస్తుతం అతని ఆరోగ్యం నిలకడగానే ఉందని.. వైద్యులు చెప్తున్నారు.