ఎల్ఐసీ బంపర్ ఆఫర్.. నెలకు రూ. 10 వేలు కడితే రూ. 26 లక్షలు

మీ కష్టార్జితానికి రక్షణ కల్పించి, మెరుగైన రాబడితో పాటు బీమా భద్రతను కోరుకుంటున్నారా? అయితే ప్రభుత్వరంగ బీమా దిగ్గజం లైఫ్ ఇన్సూరెన్స్ కార్పొరేషన్ ఆఫ్ ఇండియా (LIC) మీకోసం సరికొత్త సేవింగ్స్ ప్లాన్లను అందుబాటులోకి తెచ్చింది. 'నవ జీవన్‌ శ్రీ', 'నవ జీవన్‌ శ్రీ- సింగిల్ ప్రీమియం' పేరుతో ఎల్ఐసీ ప్రవేశపెట్టిన ఈ రెండు ప్లాన్‌లు మీ పెట్టుబడిని భద్రంగా ఉంచుతూ, ఆకర్షణీయమైన వడ్డీతో పాటు బీమా కవరేజీని అందిస్తాయి. ఈ ప్లాన్‌లు నేటి నుంచి (జులై 4) వచ్చే ఏడాది మార్చి 31 వరకు మాత్రమే అందుబాటులో ఉంటాయని ఎల్ఐసీ పేర్కొంది. ఈ రెండు ప్లాన్‌లు నాన్-పార్టిసిపేటింగ్, నాన్-లింక్డ్, లైఫ్, ఇండివిడ్యువల్ సేవింగ్స్ ప్లాన్‌లు. అంటే, ఇవి స్టాక్ మార్కెట్‌తో సంబంధం లేకుండా స్థిరమైన రాబడిని అందిస్తాయి. ముఖ్యంగా.. నెలకు కేవలం రూ. 10 వేల చొప్పున పెట్టుబడి పెడితే మెచ్యూరిటీకి రూ. 26 లక్షలకు పైగా పొందే అవకాశం ఈ ప్లాన్లలో ఉండటం విశేషం.

1. ఎల్‌ఐసీ నవ జీవన్‌ శ్రీ- సింగిల్ ప్రీమియం (ప్లాన్ నం. 911)..

ఒకేసారి పెద్ద మొత్తంలో పెట్టుబడి పెట్టాలనుకునే వారి కోసం ఎల్ఐసీ ఈ సింగిల్ ప్రీమియం ప్లాన్‌ను తీసుకొచ్చింది. వయసు అర్హత: 30 రోజుల చిన్నారుల నుంచి 60 ఏళ్ల (ఆప్షన్-2లో 40 ఏళ్లు) వయసు నిండిన వారు ఈ పాలసీ తీసుకోవచ్చు. మెచ్యూరిటీకి కనిష్ట వయసు 18 ఏళ్లు. గరిష్ట వయసు 75 ఏళ్లు (ఆప్షన్-2లో 60 ఏళ్లు).

డెత్ బెనిఫిట్: ఆప్షన్-1 కింద సింగిల్ ప్రీమియానికి 1.25 రెట్లు లేదా బేసిక్ సమ్ అష్యూర్డ్‌లో ఏది ఎక్కువైతే అది లభిస్తుంది. ఆప్షన్-2 కింద సింగిల్ ప్రీమియానికి 10 రెట్లు రిస్క్ కవరేజీ ఉంటుంది. గ్యారెంటీ అడిషన్: మీరు చేసిన పెట్టుబడికి ప్రతి రూ. 1000కి రూ. 85 చొప్పున గ్యారెంటీ అడిషన్ జోడిస్తారు. పాలసీ చెల్లుబాటులో ఉన్నంత కాలం ఈ మొత్తం లభిస్తుంది.

అదనపు ప్రయోజనాలు: యాక్సిడెంట్ డెత్ అండ్ డిజేబిలిటీ రైడర్, న్యూ టర్మ్ అష్యూరెన్స్ రైడర్ వంటివి జోడించుకోవచ్చు.

మెచ్యూరిటీ/డెత్ బెనిఫిట్: LIC నుంచి వచ్చే మొత్తాన్ని ఒకేసారి లేదా నెలవారీ/త్రైమాసిక/అర్ధ వార్షిక/వార్షిక ప్రాతిపదికన తీసుకోవచ్చు.

ఉదాహరణ: 18 ఏళ్ల వ్యక్తి 5 ఏళ్ల పాలసీ కాలానికి రూ. 5 లక్షల సమ్ అష్యూర్డ్‌తో ఆప్షన్-1 కింద పాలసీ తీసుకుంటే, ఒకేసారి రూ. 5,39,325 చెల్లించాలి. ఏడాదికి రూ. 42,500 చొప్పున 5 ఏళ్లకు రూ. 2.12 లక్షల గ్యారెంటీ అడిషన్ లభిస్తుంది. మెచ్యూరిటీలో రూ. 7,12,500 (సమ్ అష్యూర్డ్ + గ్యారెంటీ అడిషన్) పొందుతారు. పాలసీ కాలంలో రిస్క్ జరిగితే గరిష్టంగా రూ. 9.17 లక్షలు చెల్లిస్తారు.

2. ఎల్‌ఐసీ నవ జీవన్‌ శ్రీ (ప్లాన్ నం. 912)..

ఈ ప్లాన్ విడతల వారీగా ప్రీమియం చెల్లించే వెసులుబాటును అందిస్తుంది. కనీస సమ్ అష్యూర్డ్: రూ. 5 లక్షలు. గరిష్ట మొత్తానికి పరిమితి లేదు. కనీస వయసు 30 రోజులు, గరిష్ట వయసు 75 ఏళ్లు. మెచ్యూరిటీకి కనిష్ట వయసు 18 ఏళ్లు, గరిష్ట వయసు 75 ఏళ్లు. ప్రీమియం చెల్లింపు వ్యవధి- 6, 8, 10, 12 ఏళ్లు. మీరు ఎంచుకున్న కాలవ్యవధి ఆధారంగా ప్రీమియం ఆధారపడి ఉంటుంది.

పాలసీ టర్మ్: కనీసం 10 ఏళ్లు. ఆపై 15, 16, 20 ఏళ్లు.. ఇలా మీ అవసరాలకు అనుగుణంగా ఎంచుకోవచ్చు. పాలసీ టర్మ్‌ను బట్టి గ్యారెంటీడ్ అడిషన్స్ లభిస్తాయి. 10-13 ఏళ్ల కాలానికి 8.50 శాతం, 14-17 ఏళ్ల కాలానికి 9 శాతం, 18-20 ఏళ్ల కాలవ్యవధిపై 9.50 శాతంగా ఉంది.

డెత్ బెనిఫిట్: ఆప్షన్ 1 కింద కనీస హామీ మొత్తం + వార్షిక ప్రీమియానికి 7 రెట్లు (ఏది ఎక్కువైతే అది). ఆప్షన్-2 కింద వార్షిక ప్రీమియానికి 10 రెట్లు + బేసిక్ సమ్ అష్యూర్డ్. యాక్సిడెంటల్ డెత్ అండ్ డిజేబిలిటీ బెనిఫిట్ రైడర్, ప్రీమియం వెయివర్ బెనిఫిట్ రైడర్ వంటివి జోడించుకోవచ్చు. మెచ్యూరిటీ/డెత్ బెనిఫిట్ విషయానికి వస్తే LIC నుంచి వచ్చే మొత్తాన్ని ఒకేసారి లేదా నెలవారీ/త్రైమాసిక/అర్ధ వార్షిక/వార్షిక ప్రాతిపదికన తీసుకోవచ్చు.

ఉదాహరణ (రూ.10 వేల పెట్టుబడి): ఒక వ్యక్తి రూ. 10 లక్షల సమ్ అష్యూర్డ్‌తో 20 ఏళ్ల పాలసీ టర్మ్‌కు పాలసీ తీసుకున్నారనుకుందాం. ఆప్షన్-2, 10 ఏళ్లు ప్రీమియం చెల్లింపు వ్యవధి ఎంచుకుంటే, ఏడాదికి రూ. 1,10,900 (నెలకు దాదాపు రూ. 9,241) చెల్లించాల్సి ఉంటుంది. పదేళ్ల కాలానికి చెల్లించే మొత్తం రూ. 11,09,000 అవుతుంది. పాలసీ టర్మ్ 20 ఏళ్లు కాబట్టి రూ. 16,58,786 గ్యారెంటీడ్ అడిషన్స్ (9.50 శాతం చొప్పున) కింద లభిస్తాయి. మొత్తంగా మెచ్యూరిటీ మొత్తం కింద రూ. 26,58,787 (చెల్లించిన మొత్తం + గ్యారెంటీడ్ అడిషన్స్) లభిస్తుంది. పాలసీ సమయంలో ఏదైనా రిస్క్ జరిగితే బీమా కవరేజీ కూడా లభిస్తుంది.