ఉద్యోగులకు భారీగా పెరగనున్న జీతాలు.. డీఏ 4 శాతం పెంపు

ప్రభుత్వ ఉద్యోగులకు త్వరలోనే అదిరే శుభవార్త అందనుంది. ఈసారి కూడా జీతాలు భారీగానే పెరగనున్నాయి. ఎందుకంటే ఈసారి మరో 4 శాతం మేర డీయర్‌నెస్ అలవెన్స్ పెరిగే అవకాశాలు కనిపిస్తున్నాయి. ఆల్ ఇండియా కన్జ్యూమర్ ప్రైస్ ఇండెక్స్ ఫర్ ఇండస్ట్రీయల్ వర్కర్స్ (AICPI-IW) గత మే, 2025 నెలలో 0.5 పాయింట్ల మేర పెరిగి 144కు చేరింది. మార్చి నెల నుంచి 3 నెలలుగా వరుసగా పెరుగుతూనే వస్తోంది. మార్చి నెలలో 143 వద్ద ఉండగా, అది ఏప్రిల్‌లో 0.5 పాయింట్లు పెరిగి 143.5కు చేరింది. ఆ తర్వా మేలో 144కు పెరిగింది.

ఈ క్రమంలో ఉద్యోగులకు జూలై 2025 నుంచి అమలు కావాల్సిన డియర్‌నెస్ అలవెన్స్ (DA) అనేది మరో 3 శాతం నుంచి 4 శాతం వరకు పెరిగనుంది. ప్రభుత్వం కేంద్ర ప్రభుత్వ ఉద్యోగులకు డీఏ 55 శాతంగా ఉంది. జూన్-2025 వినియోగదారుల ధరల సూచీ ఆధారంగా డీఏ పెంపు నిర్ణయం ఉండనుంది. ఒక వేళ కన్జ్యూమర్ ప్రైస్ ఇండెక్స్ ఏఐసీపీఐ-ఐడబ్ల్యూ గనక జూన్ నెలలో 0.5 పాయింట్లు పెరిగితే అది 144.5 పాయింట్లకు చేరుకుంది. దీంతో 12 నెలల సగటు కన్జ్యూమర్ ప్రైస్ 144.17 పాయింట్లకు చేరుకుంది. 7వ వేతన సంఘం ఫార్మూల ప్రకారం సగటు కన్జ్యూమర్ ప్రైస్ ఇండెక్స్ ఆధారంగా కేంద్ర ప్రభుత్వ ఉద్యోగులకు డీఏ అనేది 58.85 శాతంగా ఉంటుంది.

ఈ విలువను రౌండ్ ఆఫ్ చేస్తే అంటే డీఏ 59 శాతంగా ఉండనుంది. ప్రస్తుతం ఉన్న 55 శాతం నుంచి 59 శాతానికి చేరుతుంది. అంటే జూలై-25 నుంచి అమలయ్యే డీఏ 4 శాతం పెరుగుతుందని అర్థమవుతోంది. జూన్-25 నెలలోని కన్జ్యూమర్ ప్రైస్ ఇండెక్స్ ఆధారంగా డీఏ పెంపు ఉంటుంది. గడిచిన 12 నెలల సగటు ఏఐసీపీఐ ఆధారంగా డీఏను లెక్కిస్తారు. ఇప్పటికే జనవరి- మే 2025 లెక్కలు వచ్చేశాయి. వాటి ఆధారంగా చూసుకుంటే డీఏ 3 శాతం పెరగనుంది. అయితే జూన్ లెక్కలు వస్తే క్లారిటీ వస్తుంది. DA= (12 నెలల సీపీఐ-ఐడబ్ల్యూ- 261.42)/261.42x100 ఫార్ములాతో లెక్కిస్తారు. ఇందులో 261.42 అనేది కన్జ్యూమర్ ప్రైస్ ఇండెక్స్ బేస్ వాల్యూ.

డీఏ పెంపు ప్రకటన ఎప్పుడు?

సాధారణంగా డీఏ పెంపు జూలై నుంచి అమలులోకి వస్తుంది. అయితే, ప్రభుత్వం డీఏ పెంపు నిర్ణయం సెప్టెంబర్- అక్టోబర్ సమయాల్లో తీసుకుంటుంది. అప్పుడు పండగల సీజన్ కొనసాగుతుంది. డీఏ పెంపుతో కలిపి ఉద్యోగులకు పెద్ద మొత్తంలో జీతాలు అందుతాయి. ఈసారి కూడా అదే జరిగే అవకాశం ఉంది. అంచనా ప్రకారం దీపావళి సమయంలోనే డీఏ పెంపు ప్రకటన వెలువడే సూచనలు కనిపిస్తున్నాయి.