ఫ్లైఓవర్ మీద ఫోటోలు దిగుతూ హడావిడి.. డ్రోన్ కెమెరా కంట పడటంతో పారిపోతూ

మంచి లొకేషన్ చూడగానే.. ఠక్కున చేతివేళ్లు సెల్ ఫోన్ మీదకు వెళ్లిపోతాయి. ఇక అక్కడ సెల్ఫీయో, ఫోటోనే దిగందే మనసు మాట వినదు. ఇక ఇప్పటి యువత అయితే సెల్ ఫోన్ ఫోటోలు కాదు.. ఏకంగా కెమెరాలు వెంటేసుకుని తిరుగుతున్నారు. ఎక్కడైనా మంచి లొకేషన్ కనిపించడమే తరువాయి.. మొదలైపోతుందీ ఫోటోషూట్ ముచ్చట. పార్కులు, చారిత్రక ప్రదేశాలు, బ్యూటిఫుల్ లొకేషన్లు అంటే పర్లేదు కానీ.. మరీ రోడ్డు మీద కూడానా. కాస్తైనా బాధ్యత ఉండక్కర్లా.. అలా బాధ్యతారాహిత్యంగా వ్యవహరించిన యువకులకు పోలీసులు షాక్ ఇచ్చారు. ఎవరూ మనల్ని చూడలేదులే అనుకుంటే.. పోలీసుల మూడో నేత్రం డ్రోన్ వారిని వెంటాడింది. చివరకు అలా పోలీసులకు చిక్కారు. ఈ ఘటన తిరుపతి జిల్లాలో చోటుచేసుకుంది.

తిరుపతి రూరల్ పోలీస్ స్టేషన్ పరిధిలో ఈ ఘటన చోటుచేసుకుంది. తుమ్మలగుంట ప్రాంతంలో పోలీసులు డ్రోన్ కెమెరా సాయంతో బీట్ నిర్వహించారు. తుమ్మలగుంట ఫ్లైఓవర్ మీద కొంతమంది ఫోటోషూట్ నిర్వహిస్తున్నారని, వాహనదారులను ఇబ్బంది పెడుతున్న విషయం పోలీసులకు చేరింది. యువకులు ఫ్లైఓవర్ మీద ఫోటోషూట్ చేస్తున్నట్లు డ్రోన్ కెమెరా గుర్తించింది. అయితే డ్రోన్ కెమెరా తమను గుర్తించినట్లు యువకులు కనిపెట్టారు. వెంటనే బైక్ మీద పరారయ్యారు. అయితే ఎంఆర్ పల్లి పోలీసులు వీరిని అదుపులోకి తీసుకున్నారు. విచారణలో విద్యార్థులని తేలటంతో మొదటి తప్పు కింద వార్నింగ్ ఇచ్చి విడిచిపెట్టారు. ఫ్లైఓవర్ మీద ఫోటోషూట్లు, బైక్ రేసులు, బర్త్‌డే పార్టీల లాంటివి నిర్వహిస్తే కఠినమైన చర్యలు ఉంటాయని వార్నింగ్ ఇచ్చారు.

మరోవైపు అన్నమయ్య జిల్లాలో ఎర్రచందనం స్మగ్లర్లు బరితెగించారు. శేషాచలం అడవుల్లో పోలీసులపై దాడికి దిగారు. సుండుపల్లి మండలం కావలి వద్ద ఎర్రచందనం దుంగలను కూలీల సాయంతో స్మగ్లర్లు తరలిస్తూ ఉండటాన్ని పోలీసులు గుర్తించారు. వారిని పట్టుకునే ప్రయత్నం చేశారు. అయితే ఈ సమయంలోనే ఎర్రచందనం స్మగ్లర్లు, కూలీలు పోలీసులపైకి ఎదురుదాడి చేసి అక్కడి నుంచి పరారయ్యారు. అయితే గోవిందన్ అనే తమిళనాడు వ్యక్తిని పోలీసులు అరెస్టు చేశారు. రూ.80 లక్షల విలువైన ఎర్రచందనం దుంగలు, కత్తులు, గొడ్డళ్లు స్వాధీనం చేసుకున్నారు. పరారైన వారి కోసం గాలిస్తున్నారు.