నీ ఇండియాకు పో’ భారతీయుడిపై అమెరికన్ జాత్యహంకార దాడి

అగ్రరాజ్యం అమెరికాలో ఓ భారతీయుడిపై జాతివివక్ష వ్యాఖ్యలు చేసిన అమెరికన్.. తిరిగి ఇండియాకు వెళ్లిపో అంటూ దౌర్జన్యం ప్రదర్శించాడు. ఇందుకు సంబంధించిన వీడియో ప్రస్తుతం సోషల్ మీడియాలో వైరల్ కావడంతో తీవ్ర ఆగ్రహం వ్యక్తమవుతోంది. వైరల్ వీడియో భారతీయుడిని ఉద్దేశిస్తూ ‘‘నీవ్వు ఎందుకు నా దేశంలో ఉన్నావు? ఇక్కడ చాలా మంది భారతీయులు ఉన్నారు... మీరు ఉండటం నాకు ఇష్టం లేదు.. మాకు విసుగ్గా ఉంది.. మేము మిమ్మల్ని భరించలేకపోతున్నాం.. భారత్‌కు తిరిగి వెళ్ళిపో’’ అంటూ జాత్యహంకార వ్యాఖ్యలు చేశాడు. భారతీయ వ్యక్తి అతడి వ్యాఖ్యలకు ఏమాత్రం స్పందికపోవడంతో మరింత రెచ్చిపోయి జాతివివక్ష చేస్తూ తన విద్వేషాన్ని వెళ్లగక్కాడు. అతడి వ్యాఖ్యలు అమెరికాలో పెరుగుతున్న జాతివివక్ష హింస తిరిగి వెలుగులోకి తీసుకువచ్చింది.

ఈ వీడియో సోషల్ మీడియాలో వైరల్ కావడంతో తీవ్రంగా మండిపడుతున్నారు. ఇది ‘‘ఆమోదయోగ్యం కాదు.., తీవ్ర వివక్షతో కూడుకున్నది’’ అంటూ ఖండించారు. ఓ నెటిజన్ స్పందిస్తూ ‘‘భారతీయుల ప్రతిభను చూసి వాళ్లకు భయం వేస్తోంది. అది వాళ్ల అభద్రతభావానికి నిదర్శనం’’ అన్నారు.‘నువ్వు విజయవంతమైన వ్యక్తివి కాదు. అందుకే నీకు కోపం. అమెరికా ఎవరి సొత్తు కాదు. ఇది రెడ్ ఇండియన్ల భూమి’ మరొకరు అని విమర్శించారు. ఇంకొకరు ‘ వలసదారులే అమెరికాను నిర్మించారు. వలసదారులులేని అమెరికా అనే భావనే ఉండదు’ అని అన్నారు.

కాగా, భారతీయుల పట్ల వివక్ష ఇదే మొదటిసారి కాదు. ఇటీవల విదేశాల్లో ముఖ్యంగా అమెరికాలో భారతీయులపై విద్వేష దాడులు పెరుగుతున్నాయి. శరీర రంగు, మతం, సంస్కృతి ఆధారంగా ఉద్యోగాల్లో, నివాసాల్లో, విద్యా సంస్థల్లో, పబ్లిక్ ప్రదేశాల్లో ఇలా అన్ని రంగాల్లో వివక్ష కనిపిస్తోంది. అమెరికాలో భారతీయుల సంఖ్య 4.2 మిలియన్లకు పైగా ఉంది. అత్యంత విద్యావంతులు, సంపన్న వర్గాలలో ఒకటిగా గుర్తింపు వీరు పొందారు. అయినప్పటికీ, వివక్ష, విద్వేష ఘటనలు వారిని తీవ్రంగా ప్రభావితం చేస్తున్నాయి. రెండేళ్ల కిందట టెక్సాస్‌లో ఓ మెక్సికన్ అమెరికన్ .. భారతీయ మహిళలను ఉద్దేశించి చేసిన జాత్యహంకార వ్యాఖ్యలు తీవ్ర కలకలం రేపాయి. అమెరికాను నాశనం చేస్తున్నారని, ఇండియాకు వెళ్లిపోవాలని నోటికొచ్చినట్టు ఆమె దుర్బాషలాడిన వీడియో సామాజిక మాధ్యమాల్లో వైరల్ అయ్యింది. ఇక, బ్రిటన్ వంటి దేశాల్లోనూ భారతీయులపై విద్వేషపూరిత దాడులు జరుగుతున్నాయి.

ఈ ఘటన నేపథ్యంలో సంస్కృతి పరమైన అవగాహన, పరస్పర గౌరవం పెంపొందించాల్సిన అవసరం ఉందని, జాత్యహంకార, విద్వేషాలను రెచ్చగొట్టే వ్యక్తులపై కఠిన చర్యలు తీసుకోవాలని విశ్లేషకులు, మానవ హక్కుల కార్యకర్తలు కోరుతున్నారు. భవిష్యత్‌లో ఇటువంటి చర్యలు పునరావృతం కాకుండా చూడాలని డిమాండ్ చేస్తున్నారు.