10 శాతం అదనపు సుంకాలు..బ్రిక్స్ అనుకూల దేశాలపై ట్రంప్ బిగ్ బాంబ్

బ్రిక్స్ కూటమికి మద్దతునిస్తూ "అమెరికా వ్యతిరేక విధానాలను" అనుసరించే దేశాలపై అదనంగా 10 శాతం టారిఫ్‌లను విధిస్తామని అమెరికా అధినేత డొనాల్డ్ ట్రంప్ తీవ్ర హెచ్చరిక చేశారు. బ్రెజిల్‌లోని రియో డీ జనీరోలో జరుగుతున్న బ్రిక్స్ సదస్సు నేపథ్యంలో ఈ కీలక ప్రకటన విడుదల చేశారు. ట్రంప్ తన అధికారిక ట్రూత్ సోషల్ ఖాతా ద్వారా ఈ నిర్ణయాన్ని వెల్లడించారు. అలాగే ఈ టారిఫ్‌లకు ఎటువంటి మినహాయింపులు ఉండవని స్పష్టం చేశారు.

ట్రంప్ పన్నులు, సుంకాల విషయంలో మొదటి నుంచీ కఠినమైన వైఖరిని అవలంబిస్తూనే ఉన్నారు. అమెరికా ప్రయోజనాలకు వ్యతిరేకంగా వ్యవహరిస్తున్నాయని భావించే దేశాలపై ఆర్థికపరమైన చర్యలు తీసుకోవడానికి తాను ఎల్లప్పుడూ సిద్ధంగా ఉన్నానని ఆయన ఈ ప్రకటన ద్వారా మరోసారి చాటిచెప్పారు. ముఖ్యంగా ట్రంప్ బ్రిక్స్ కూటమిని "అమెరికా వ్యతిరేక" కూటమిగా అభివర్ణించారు. ఏ దేశమైనా బ్రిక్స్ అమెరికా వ్యతిరేక విధానాలకు మద్దతు ఇస్తే.. ఆ దేశాలపై అదనంగా 10 శాతం టారిఫ్‌లు విధిస్తామని స్పష్టం చేశారు. అయితే ట్రంప్ నుంచి బ్రిక్స్‌పై వచ్చిన మొదటి హెచ్చరికే కాదిది. గతంలోనూ బ్రిక్స్ దేశాలు ప్రపంచ వాణిజ్యంలో అమెరికా డాలర్ వాడకాన్ని తగ్గించాలని ఆలోచిస్తే 100 శాతం టారిఫ్‌లు విధిస్తానని కూడా ఆయన బెదిరించారు.

  ట్రంప్ హెచ్చరిక అంతర్జాతీయ వాణిజ్య సంబంధాలపై, ముఖ్యంగా బ్రిక్స్ దేశాలతో ఆర్థికంగా సంబంధాలు ఉన్న ఇతర దేశాలపై గణనీయమైన ప్రభావాన్ని చూపనుంది. ఇది ప్రపంచ వాణిజ్య యుద్ధానికి అడుగులు వేస్తుందా లేదా అనే చర్చకు కూడా దారితీసింది. బ్రిక్స్ కూటమిలో బ్రెజిల్, రష్యా, ఇండియా, చైనా, దక్షిణాఫ్రికా వంటి వర్ధమాన దేశాలు భాగస్వామ్యంగా ఉన్నాయి. ఈ కూటమి ప్రపంచ ఆర్థిక వ్యవస్థలో తమ ప్రభావాన్ని పెంచుకోవాలని లక్ష్యంగా పెట్టుకుంది. ముఖ్యంగా డాలర్‌పై ఆధార పడటాన్ని తగ్గించుకోవడానికి, స్థానిక కరెన్సీల్లో వాణిజ్యాన్ని ప్రోత్సహించడానికి ప్రయత్నిస్తున్న తరుణంలో ట్రంప్ ఈ హెచ్చరికలను జారీ చేశారు. ట్రంప్ ఈ వైఖరితో.. అమెరికా డాలర్ ఆధిపత్యాన్ని కాపాడటానికి, ప్రపంచ ఆర్థిక వ్యవస్థలో అమెరికా స్థానాన్ని పటిష్టం చేయడానికి ప్రయత్నిస్తున్నారని విశ్లేషకులు భావిస్తున్నారు.

బ్రిక్స్ సదస్సు వంటి కీలక అంతర్జాతీయ వేదిక జరుగుతున్న సమయంలో ఇలాంటి ప్రకటన వెలువడటం ప్రాధాన్యతను సంతరించుకుంది. ఇది బ్రిక్స్ సభ్య దేశాలకు, వారితో సంబంధాలు నెరుపుతున్న ఇతర దేశాలకు స్పష్టమైన సంకేతం పంపిందని చెప్పవచ్చు. ట్రంప్ ఈ నిర్ణయంతో, భవిష్యత్ అంతర్జాతీయ వాణిజ్య విధానాలపై తన దూకుడు వైఖరిని కొనసాగించడానికి సిద్ధంగా ఉన్నారని సూచిస్తున్నారు. రాబోయే రోజుల్లో ఈ టారిఫ్ హెచ్చరికలు ప్రపంచ ఆర్థిక రంగంపై ఎలాంటి ప్రభావం చూపుతాయో చూడాలి.