వదరబోతు మాటలు మాట్లాడితే ఊరుకోమంటూ ,,,నల్లపరెడ్డి వ్యాఖ్యలపై పవన్ కళ్యాణ్, లోకేష్ సీరియస్

కోవూరు ఎమ్మెల్యే వేమిరెడ్డి ప్రశాంతి రెడ్డిపై ఆ నియోజకవర్గ మాజీ ఎమ్మెల్యే నల్లపరెడ్డి ప్రసన్నకుమార్ రెడ్డి చేసిన వ్యాఖ్యలపై కూటమి ప్రభుత్వం సీరియస్ అయింది. ప్రశాంతి రెడ్డిని కించపరిచేలా, అవహేళన చేసేలా నల్లపరెడ్డి మాట్లాడారంటూ ఉప ముఖ్యమంత్రి పవన్ కళ్యాణ్ , మంత్రి నారా లోకేశ్ ఆగ్రహం వ్యక్తం చేశారు. నల్లపురెడ్డి తీరును ప్రతి ఒక్కరూ ఖండించాలని.. మహిళల జోలికి వస్తే ఊరుకునేదే లేదంటూ హెచ్చరిక జారీ చేశారు.

మహిళల వ్యక్తిత్వాన్ని అవహేళన చేస్తూ కించపరిచేలా వ్యాఖ్యలు చేయడం వైఎస్సార్ సీపీ నాయకులకు అలవాటుగా మారిపోయిందంటూ డిప్యూటీ సీఎం పవన్ కళ్యాణ్ విమర్శించారు. కోవూరు ఎమ్మెల్యే వేమిరెడ్డి ప్రశాంతిపై ఆ నియోజకవర్గ మాజీ ఎమ్మెల్యే చేసిన వ్యాఖ్యలు అభ్యంతకరమన్నారు. నల్లపరెడ్డి ప్రసన్న కుమార్ రెడ్డి మాటలకు సభ్య సమాజం సిగ్గుపడుతోందని, వ్యక్తిగత జీవితాలను లక్ష్యంగా చేసుకుని వ్యాఖ్యలు చేయడాన్ని ప్రజాస్వామిక వాదులందరూ ఖండించాలని పవన్ కళ్యాణ్ కోరారు.

కోవూరు ఎమ్మెల్యే వేమిరెడ్డి ప్రశాంతి రెడ్డి , నెల్లూరు ఎంపీ వేమిరెడ్డి ప్రభాకర్ రెడ్డి‌పై ప్రసన్నకుమార్ రెడ్డి చేసిన వ్యాఖ్యలు చాలా బాధ కలిగించాయని పవన్ కళ్యాణ్ పేర్కొన్నారు. మహిళల గౌరవానికి భంగం కలిగించినా, అసభ్య వ్యాఖ్యలు చేసిన చట్ట ప్రకారం చర్యలు తీసుకుంటామన్నారు. అధికారంలో ఉన్నప్పుడు నోటి వదరుతో అసభ్యంగా వ్యాఖ్యలు చేయడంతో ప్రజలు ఇవాల్టి రోజున సరైన రీతిలో తీర్పు చెప్పారని గుర్తు చేశారు. అయినా, ఇప్పటికీ వదరుబోతు మాటలు వదల్లేకపోతున్నారని, మహిళా సమాజం మరోసారి వైసీపీకి తగిన విధంగా సమాధానం చెప్పాలని పిలుపునిచ్చారు.

ఏపీ విద్యా, ఐటీ శాఖ మంత్రి నారా లోకేష్ కూడా నల్లపరెడ్డి ప్రసన్న కుమార్ రెడ్డి వ్యాఖ్యలను తీవ్రంగా ఖండించారు. పెద్ద పెద్ద చ‌దువులు చ‌దివితే స‌రిపోదు.. క‌నీస ఇంగిత‌జ్ఞానం ఉండాలంటూ మండిపడ్డారు. మ‌హిళా ఎమ్మెల్యే వేమిరెడ్డి ప్ర‌శాంతిరెడ్డి గారి వ్య‌క్తిత్వాన్ని కించ‌ప‌రుస్తూ బ‌హిరంగంగా వ్యాఖ్య‌లు చేయ‌డం నేరం, దారుణం అంటూ దుయ్యబట్టారు. త‌ల్లి, చెల్లిని త‌రిమేసిన అధినేత జగన్‌ని ఆద‌ర్శంగా తీసుకున్నట్టున్నారంటూ విమర్శించారు. మ‌హిళ‌ల జోలికి వ‌చ్చినా, ఆడ‌వారిపై అవాకులు చెవాకులు పేలినా ఊరుకునేందుకు ఇది జ‌గ‌న్ గారి జంగిల్ రాజ్ కాదు.. మ‌హిళ‌ల‌కు అండ‌గా నిలిచే ప్రజా ప్రభుత్వం అంటూ సోషల్ మీడియాలో పోస్ట్ చేశారు.