పొట్ట చుట్టూ పేరుకుపోయిన కొవ్వును తగ్గించే పుదీనా చిట్కా

పుదీనా.. వంటల్లో రుచిని ఇవ్వడంతో పాటు ఆరోగ్యానికి ప్రయోజనాల్ని అందిస్తుంది. ఈ రోజుల్లో అందర్నీ ఇబ్బంది పెడుతున్న బెల్లీ ఫ్యాట్ తగ్గాలంటే పుదీనా ఎలా తీసుకోవాలో ఇప్పుడు తెలుసుకుందాం.

పొట్ట చుట్టూ పేరుకుపోయిన కొవ్వును తగ్గించే పుదీనా చిట్కా, ఇప్పుడు చెప్పినట్టు తీసుకుంటే కిలోల కొద్దీ బరువు తగ్గుతారు

ఈ రోజుల్లో చాలా మంది బెల్లీ ఫ్యాట్ సమస్యతో బాధపడుతున్నారు. ఒక్కసారి బెల్లీ ఫ్యాట్ వస్తే దాన్ని కరిగించడం చాలా కష్టం. బాన పొట్టతో బయటకు వెళ్లాలంటే ఇబ్బందిగా ఉంటుంది. ఇది మీ శరీరాకృతిని పాడు చేయడమే కాదు.. ఎన్నో ఆరోగ్య సమస్యలకు కారణమవుతుంది. గుండె జబ్బులు, అధిక రక్తపోటు, ఫ్యాటీ లివర్, స్లీప్ అప్నియా వంటి సమస్యల్ని పెంచుతుంది.

ఇక, బెల్లీ ఫ్యాట్ తగ్గించుకోవడానికి చాలా మంది అనేక ప్రయత్నాలు చేస్తుంటారు. కొందరు ఆహారంలో మార్పులు చేసుకుంటే, మరికొందరు జిమ్‌లు చుట్టూ తిరుగుతున్నారు. అయితే, ఇలాంటి వారికి పుదీనా వాటర్ బెస్ట్ ఆప్షన్ అంటున్నారు నిపుణులు. పుదీనా వాటర్ తాగడం వల్ల ప్రయోజనాలేంటి, దీన్ని ఎలా చేసుకోవాలన్న పూర్తి వివరాలు ఇప్పుడు చుద్దాం.

పుదీనాతో ప్రయోజనాలు

పుదీనా వంటల్లో రుచిని పెంచడమే కాదు.. ఆరోగ్యానికి ఎంతో మేలు చేస్తుంది. పుదీనాలో విటమిన్లు, ఖనిజాలు, యాంటీ ఆక్సిడెంట్లు పుష్కలంగా ఉన్నాయి. పుదీనా జీర్ణక్రియకు మేలు చేస్తుంది. దీనిలో మెంతల్ అనే సమ్మేళనం ఉంటుంది. ఇది జీర్ణ ఎంజైమ్‌ల్ని ప్రేరేపించి.. ఆహారం సులువుగా జీర్ణం చేయడంలో సాయపడుతుంది. అజీర్తి, కడుపు ఉబ్బరం, గ్యాస్, వికారం సమస్యల నుంచి రిలీఫ్ అందించడంలో సాయపడుతుంది. పుదీనా సహజమైన నోటి ఫ్రెషనర్. నోటి దుర్వాసనను దూరం చేయడంలో సాయపడుతుంది. ఇక, పుదీనా నీటి వల్ల కూడా బోలెడు ప్రయోజనాలు ఉన్నాయి. దీనికి కావాల్సిన పదార్థాలు, తయారీ విధానం, ప్రయోజనాల గురించి ఇప్పుడు తెలుసుకుందాం.

పుదీనా నీటికి కావాల్సిన పదార్థాలు

* తాజా పుదీనా ఆకులు - 10 నుంచి 15 ఆకులు

* ఒక గ్లాస్ నీరు

* సగం నిమ్మకాయ రసం

* చిటికెడు నల్ల ఉప్పు

తయారీ విధానం

* ఈ నీరు తయారుచేసుకోవడానికి ముందుగా పుదీనా ఆకుల్ని బాగా కడిగి శుభ్రపర్చుకోండి.

* పుదీనా ఆకులను ఒక గ్లాసు నీటిలో రాత్రంతా నానబెట్టండి.

* మీరు ఉదయం ఆకులను నీటిలో వేసి తేలికగా నలిపివేయవచ్చు.

* ఉదయం ఈ నీటిని వడకట్టండి. మీరు కావాలంటే, దానికి సగం నిమ్మకాయ రసం, చిటికెడు నల్ల ఉప్పును జోడించవచ్చు. ఇది రుచి, ఆరోగ్య ప్రయోజనాలను పెంచుతుంది.

ఎప్పుడు, ఎలా తాగాలి?

ఈ పుదీనా నీటిని ప్రతి ఉదయం ఖాళీ కడుపుతో తాగాలని ఆయుర్వేద నిపుణులు సూచిస్తున్నారు. దీనిని తాగిన తర్వాత.. కనీసం 30-45 నిమిషాల పాటు మరేదీ తినకండి లేదా తాగకండి. ఇలా ఫాలో అయితేనే పుదీనా నీరు తాగడం వల్ల ఎక్కువ ప్రయోజనాలు శరీరానికి అందుతాయని నిపుణులు అంటున్నారు.

పుదీనా నీటితో ప్రయోజనాలు

* జీర్ణక్రియను మెరుగుపరుస్తుంది: పుదీనా జీర్ణవ్యవస్థను బలపరుస్తుంది. తినే ఆహారం సులువుగా జీర్ణమవుతుంది. దీంతో, శరీరంలో కొవ్వు పేరుకుపోదు.

* జీవక్రియను పెంచుతుంది: జీవక్రియ అనేది శరీరం ఆహారాన్ని శక్తిగా మార్చే ప్రక్రియ. పుదీనా జీవక్రియను వేగవంతం చేస్తుంది. దీంతో ఎక్కువ కేలరీలు బర్న్ అవుతాయి.

* ఉబ్బరం తగ్గిస్తుంది: కడుపు ఉబ్బరం, అజీర్తి సమస్యలతో బాధపడేవారికి ఇది మంచి డ్రింక్. ఉబ్బరం తగ్గించడంలో పుదీనా చాలా ప్రభావవంతంగా ఉంటుంది.

* విష పదార్థాలను తొలగిస్తుంది: ఇది శరీరం నుంచి హానికరమైన విష పదార్థాలను తొలగించడంలో సాయపడుతుంది. శరీరాన్ని లోపల నుంచి శుభ్రంగా, ఆరోగ్యంగా ఉంచుతుంది.

* ఆకలిని అణిచివేస్తుంది: పుదీనా సువాసన, రుచి ఆకలిని నియంత్రించడంలో సాయపడుతుంది. అతిగా తినకుండా కంట్రోల్ చేస్తుంది. దీంతో బరువు తగ్గవచ్చు.

ఈ విషయాలు ముఖ్యం

* మంచి ఫలితాల కోసం పుదీనా నీటిని ప్రతిరోజూ తాగాలి. ఒకటి లేదా రెండు రోజులు తాగడం వల్ల ఎటువంటి తేడా ఉండదు.

* కేవలం పుదీనా నీళ్లు తాగడం వల్ల అన్నీ జరగవు. ఆహారపు అలవాట్లను కూడా మెరుగుపరుచుకోవాలి. అందుకే జంక్ ఫుడ్, స్వీట్లు, నూనె పదార్థాలు తినడం మానుకోండి.

* బెల్లీ ఫ్యాట్‌ను వేగంగా కరిగించాలనుకుంటే పుదీనా నీటితో పాటు, నడక, యోగా లేదా పొట్ట వ్యాయామాల్ని మీ జీవనశైలిలో భాగం చేసుకోండి.