పాకిస్థాన్ రంగస్థలంపై ‘రామాయణం’.. కరాచీ కళాకారుల ప్రదర్శన

నేటి డిజిటల్ యుగంలో నాటకాలకు ఆదరణ అంతంతమాత్రమే. అయినా, ఈ కళను బతికించే ప్రయత్నాలు సాగుతూనే ఉన్నాయి. ఈ క్రమంలో భారతీయ ఇతిహాసం రామాయణ గాథను పాకిస్థాన్‌లో ప్రదర్శించడం విశేషం. కరాచీ నగరంలో ఒక నాటక బృందం భారతీయ ఇతిహాసాన్ని కళ్లకు కట్టింది. ఈ నాటకంలోని కళాకారులు పాకిస్థానీయులే కావడం మరో విశేషం. అంతేకాదు, స్థానికుల నుంచి ప్రశంసలు కూడా లభిస్తున్నాయి. పాకిస్థాన్‌కు చెందిన యోగేశ్వర్ కరేరా, రాణా కజ్మాలకు నాటకాలంటే చాలా ఇష్టం. థియేటర్ ఆర్ట్స్‌లో శిక్షణ తీసుకున్న ఈ ఇద్దరూ.. కొందరితో కలిసి 'మౌజ్' అనే నాటక బృందాన్ని స్థాపించారు. గత నవంబర్‌లో 'ది సెకండ్ ఫ్లోర్ (T2F)' అనే ఆర్ట్ గ్యాలరీలో మొదటిసారిగా రామాయణాన్ని ప్రదర్శించారు. ఈ ప్రదర్శనకు మంచి స్పందన రావడంతో పాకిస్థాన్ నాటక రంగంలో ఇది ఒక మైలురాయిగా నిలిచింది.

దీంతో ఈ బృందం మరిన్ని హంగులు జోడించి, కృత్రిమ మేధ (Artificial Intelligence) సహాయంతో వేదికను రంగులమయంగా మార్చింది. కరాచీలోని ఆర్ట్స్ కౌన్సిల్‌లో ఇటీవల మూడు రోజులపాటు ఈ నాటకాన్ని ప్రదర్శించారు. ' రామాయణం ' నాటకాన్ని ప్రదర్శిస్తే విమర్శలు వస్తాయని అనుకోలేదని డైరెక్టర్ యోగేశ్వర్ కరేరా చెప్పారు. ‘రామాయణాన్ని దృశ్యకావ్యంగా మలిచాం.. స్థానికుల నుంచి మద్దతు లభించడం గొప్ప విషయం..పాక్ సమాజంలో బయట చెప్పుకునే దానికంటే ఎక్కువ సహనం ఉందని చూపిస్తుంది’ అని ఆయన అన్నారు. ఈ నాటకానికి ఆదరణతో పాటు నటీనటుల కృషికి విమర్శకుల నుంచి ప్రశంసలు వచ్చాయని ఆయన తెలిపారు.

ఈ పురాణ కథను ప్రేక్షకులకు చూపించాలనే ఆలోచనతో ఈ నాటకం ప్రదర్శించినట్లు ప్రొడ్యూసర్, సీత పాత్రలో నటించిన రాణా కజ్మా అన్నారు. చిత్ర విమర్శకుడు ఒమియర్ అలావీ మాట్లాడుతూ, ‘కథ చెప్పడంలో నిజాయతీ, లైటింగ్, లైవ్ మ్యూజిక్, కలర్‌ఫుల్ కాస్ట్యూమ్స్, అబ్బురపరిచే డిజైన్‌లు.. ఇవన్నీ ఈ ప్రదర్శనను మరింత గొప్పగా చేశాయి’ అని అన్నారు. పాకిస్థాన్‌లో రామాయణాన్ని ప్రదర్శించడం ఒక సాహసోపేతమైన ప్రయత్నం. ఈ ప్రయత్నం విజయవంతం కావడం ఎంతో సంతోషకరమైన విషయం. సాంస్కృతిక సంబంధాలు దేశాల మధ్య మరింత బలపడడానికి ఇటువంటి కార్యక్రమాలు ఉపయోగపడతాయి.