కారులో కూర్చోవడమే ఆమె వ్యాపారం.. లక్షలు సంపాదిస్తున్న మహిళ

ప్రపంచ ఆర్ధిక రాజధాని న్యూయార్క్ సిటీలో పార్కింగ్ అంటే నరకంతో సమానం అంటారు... అక్కడ రోడ్డు శుభ్రం చేసేటప్పుడు స్ట్రీట్ స్వీపింగ్ టైమ్ లో కార్లను తప్పనిసరిగా జరపాలి.., లేదంటే భారీగా జరిమానాలు వేస్తారు. ఈ సమస్యను సొమ్ము చేసుకుంటూ ఒక యువతి అదిరిపోయే బిజినెస్ మొదలుపెట్టింది. అదే 'కార్ సిట్టింగ్' బిజినెస్! ఏంటా బిజినెస్? ఆమెకి ఈ ఆలోచన ఎలా వచ్చింది? అంటే ఈ కథంతా సిడ్నీ ఛార్లెట్ అనే అమ్మాయితో మొదలైంది.. చార్లెట్‌ని ఇటీవల ఉద్యోగం నుంచి తొలగించడంతో ఉద్యోగ వేట సాగిస్తోంది. అసలే ఖరీదైన నగరం.. ఖర్చులెక్కువ.. ఉద్యోగం లేకపోతే కష్టమే.. దీంతో తనకు ఇష్టం లేకపోయినా తన కారును న్యూయార్క్ సిటీకి తెచ్చుకుంది.

అప్పుడే ఆమెకు ఒక విషయం తెలిసింది. స్ట్రీట్ స్వీపింగ్ టైమ్‌లో జరిమానా నుంచి తప్పించుకోవడానికి చాలా మంది తమ కార్లలోనే కూర్చుండిపోతారట.. లేదా తమ ఫ్రెండ్స్ లేదా ఎవరో ఒకరిని కారులో కూర్చొబెడతారని గమనించింది.. కానీ.. స్ట్రీట్ స్వీపింగ్ గంటల తరబడి జరుగుతుంది. ఆ సమయంలో వాళ్ల పనులన్నీ మానుకుని తమ కారును పోలీసువాళ్లు ఎత్తుకెళ్లకుండా కాపలాగా కూర్చోవడం అంటే పెద్ద తలనొప్పి. దీంతో చాలా మంది విసిగిపోయేవారు.... అదే ఆమెకు ఓ బిజినెస్ ఐడియా తెచ్చిపెట్టింది. 'నేనెందుకు వాళ్ల కోసం కార్లలో కూర్చోకూడదు?' అని ఆలోచించి, వెంటనే తన 'కార్ సిట్టింగ్' బిజినెస్‌ను సోషల్ మీడియాలో ప్రచారం చేయడం మొదలుపెట్టింది. ఇక, ప్రపంచంలోనే అత్యంత ఖరీదైన టాప్ 10 నగరాల్లో న్యూయార్క్ ఏడో స్థానంలో నిలిచింది.

వాళ్ల వీధిలో స్ట్రీట్ స్వీపింగ్ ఉన్నప్పుడు.. తనను కార్ సిట్టింగ్ కోసం బుక్ చేసుకోవచ్చని చార్లెట్ తన బిజినెస్ ఐడియాను సోషల్ మీడియాలో పెట్టింది. దీంతో.. కస్టమర్లు చార్లెట్ బిజినెస్ నంబర్‌ను సంప్రదించడం మొదలెట్టారు. ఇక అలా బుకింగ్ పడగానే.. చార్లెట్ వారు పంపిన లొకేషన్‌కి చేరుకుంటుంది... ఆ తర్వాత ఆమె కారు తాళాలను తీసుకోవడానికి ఏర్పాట్లు చేసుకుంటుంది.. చాలాసార్లు వాచ్‌మెన్ల దగ్గర ఓనర్ తాళాలు తీసుకుంటుంది. ఆమె కారును తీసుకునే ముందు, పని పూర్తయిన తర్వాత కూడా వీడియోలు తీసి, కారు ఎలా ఉందో డాక్యుమెంట్ చేస్తుంది. ఎందుకంటే... మళ్లీ తమ కారులో వస్తువు పోయినా.. డ్యామెజ్ అయినా తన మీదికి అభియోగం రాకుండా ఆధారం ఉండాలి కదా..

చార్లెట్ చెప్పేదేంటంటే, తన సర్వీస్ ధర ఎప్పుడూ 65 డాలర్లు పార్కింగ్ టికెట్ కంటే తక్కువగానే ఉంటుందట! మూడు వారాల కిందట మొదలుపెట్టిన ఈ కొత్త బిజినెస్ ఇప్పటికే చాలా విజయవంతమైంది. సిడ్నీచార్లెట్‌కు చాలా మంది రెగ్యులర్ కస్టమర్లు కూడా ఉన్నారట. న్యూయార్క్ వంటి నగరాల్లో పార్కింగ్ అనేది ఎంత పెద్ద తలనొప్పో తెలిసిందే కదా. సిడ్నీ ఛార్లెట్ ఈ సమస్యను తన వ్యాపార అవకాశంగా మార్చుకొని, లాభదాయకమైన ఆదాయ మార్గంగా మార్చింది. ఈ అమ్మాయి తెలివికి నిజంగా హ్యాట్సాప్ అనాల్సిందే. ఉద్యోగం పోయిందని బాధపడుతూ కూర్చోకుండా తన చుట్టూ తను చేయగలిగే పనిని తయారు చేసుకుంది.. ఎందరికో ఆదర్శంగా నిలిచింది.