ప్రపంచంలోనే అత్యంత ఖరీదైన సిటీగా సింగ్‌పూర్

ప్రపంచంలో అత్యంత ఖరీదైన నగరాల జాబితాలో సింగ్‌పూర్ మరోసారి అగ్రస్థానంలో నిలిచింది. కనీసం మిలియన్‌ డాలర్ల బ్యాంక్‌ బ్యాలెన్స్‌ ఉన్న వ్యక్తుల కొనుగోలు సామర్థ్యం, వారి విలాస వ్యయం, జీవన వ్యయాన్ని జూలియస్‌ బేర్‌ లైఫ్‌స్టైల్‌ ఇండెక్స్‌‌ను మదింపుచేసి ఈ నివేదికను తయారు చేసింది. ఈ ఏడాది ఫిబ్రవరి- మార్చి మధ్య డేటాను పరిగణనలోకి తీసుకున్నట్లు జూలియస్‌ బేర్‌ వెల్లడించింది. ఈ జాబితాలో వరుసగా మూడోసారి సింగపూర్ అగ్ర స్థానాన్ని దక్కించుకోవడం విశేషం. అలాగే, హాంగ్‌కాంగ్‌ను వెనక్కి నెట్టి లండన్ రెండో స్థానానికి చేరుకుంది. ప్రపంచ ఆర్థిక రాజధానిగా గుర్తింపు పొందిన న్యూయార్క్ నగరం ఈ జాబితాలో ఏడో స్థానంలో నిలవడం గమనార్హం.

సింగ్‌పూర్ ఎందుకు?

సింగపూర్ ఆర్థికంగా, రాజకీయంగా అనుకూలంగా ఉండటంతో చాలామంది వ్యాపారవేత్తలను ఆకర్షిస్తోంది. ఇక్కడ నుంచి తమ కార్యకలాపాలు సాగించడానికి మొగ్గుచూపుతున్నారు అంతేకాకుండా, గతంలో దేశం నుంచి వెళ్లిపోయిన వ్యాపారులను కూడా వెనక్కి రప్పించడానికి సింగపూర్ చర్యలు తీసుకుంది. దీంతో అక్కడ జీవన వ్యయం బాగా పెరిగిపోయింది. సింగపూర్‌లో ప్రజలు జ్యువెలరీ కొనడానికి ఎక్కువ ఆసక్తి చూపిస్తారు. ఈ కారణాల వల్ల సింగపూర్ అత్యంత ఖరీదైన నగరంగా నిలిచిందని నివేదిక పేర్కొంది.

అంతేకాకుండా, అక్కడి ప్రజలు ఆహారం, బూట్లు, ఆరోగ్య ఉత్పత్తులు, విద్యపై ఎక్కువగా ఖర్చు చేస్తున్నారని జులియన్ బేర్ నివేదిక తెలిపింది. కోవిడ్-19 తరువాత పరిస్థితులు సాధారణ స్థితికి వచ్చినా, ద్రవ్యోల్బణం, జీవన వ్యయం పెరుగుదల, భౌగోళిక రాజకీయ పరిస్థితులు ధరలను ప్రభావితం చేస్తున్నాయని నివేదిక వెల్లడించింది. సింగ్‌పూర్‌లో చట్టాలను కూడా కఠినంగా అమలు చేస్తారు. డ్రగ్స్ విషయంలోనూ సింగ్‌పూర్ అత్యంత కటువుగా ఉంటుంది. డ్రగ్స్ అక్రమ రవాణాకు పాల్పడిన భారత సంతతికి చెందిన యువకుడ్ని రెండేళ్ల కిందట ఏకంగా ఉరితీసింది.

గత ఏడాదితో పోలిస్తే లండన్ ఒక స్థానం మెరుగుపరుచుకుంది. హాంగ్‌కాంగ్‌ను వెనక్కి నెట్టి రెండో స్థానానికి చేరుకుంది. జ్యూరిచ్ వంటి ఇతర యూరోపియన్ నగరాలు కూడా ర్యాంకింగ్స్‌లో మెరుగుదల చూపించాయి.

సింగ్‌పూర్ స్కూల్‌లో అగ్ని ప్రమాదం.. పవన్ చిన్న కుమారుడికి గాయాలు

టాప్ 10 ఖరీదైన నగరాలు ఇవే:

1. సింగపూర్

2. లండన్

3. హాంగ్‌కాంగ్

4. షాంఘై

5. మొనాకో

6. జ్యూరిచ్

7. న్యూయార్క్

8. పారిస్

9. సావో పౌలో

10. మిలాన్

‘‘సింగపూర్ ఆర్థిక, రాజకీయ పరిస్థితులు అందరికీ అనుకూలంగా ఉన్నాయి. దీంతో పలువురు అంతర్జాతీయ వ్యాపారులు సింగపూర్‌ కేంద్రంగానే తమ కార్యకలాపాలను నిర్వహించేందుకు మొగ్గు చూపుతున్నారు’’ అని నివేదిక పేర్కొంది. ఈ జాబితాలో ఉత్తర అమెరికా నుంచి కేవలం న్యూయార్క్ నగరమే టాప్ 10లో స్థానం దక్కించుకుంది. ఆ తర్వాత మెక్సికో సిటీ 21వ స్థానానికి పడిపోయింది. సావో పాలో ఏడు స్థానాలు ఎగబాకి 16వ స్థానం నుంచి 9కి చేరింది.