వరకట్న వేధింపులు..యూఏఈలో ఏడాదిన్నర పాపను చంపి భారతీయ మహిళ ఆత్మహత్య

అత్తింటి వేధింపులతో జీవితంపై విరక్తి పెంచుకున్న ఓ వివాహిత దేశం కాని దేశంలో అర్ధాంతరంగా తనువు చాలించింది. భర్త, అతడి కుటుంబం నిత్యం నరకం చూపించి.. చిత్రహింసలకు గురిచేయడంతో కేరళకు చెందిన విపంచిక మణియన్ (32) తన ఏడాదిన్న పాప విభావితో కలిసి ఆత్మహత్యకు పాల్పడింది. అత్యంత విషాదకర ఈ ఘటన యునైటెడ్ అరబ్ ఎమిరేట్స్‌ (యూఏఈ)లోని షార్జాలో జులై 8న చోటుచేసుకుంది. ఈ ఘటనపై భర్త నిధీష్ వళియవీట్టిల్, అతడి కుటుంబ సభ్యులపై వరకట్న వేధింపులు , ఆత్మహత్యకు ప్రేరేపించడం వంటి సెక్షన్లు కింద కేసు నమోదు చేశారు.

విపంచిక తన పాపతో కలిసి అల్ నహ్దా ప్రాంతంలో వేరుగా నివసిస్తూ ఉండగా.. జూలై 8న ఆమె నివాసంలో ఇద్దరూ విగతజీవులుగా కనిపించారు. ఫోరెన్సిక్ నివేదిక ప్రకారం.. ఆ చిన్నారి ఊపిరాడక మృతి చెందింది. దిండు వంటివాటితో ఊపిరాడకుండా చేసినట్టు గుర్తించడంతో హత్య అనుమానాలు వ్యక్తమయ్యాయి.

విపంచిక ఫ్లాట్‌లో మలయాళంలో రాసిన ఓ సూసైడ్ లేఖను పోలీసులు స్వాధీనం చేసుకున్నారు. అత్తింటివాళ్లు తనను ఏవిధంగా చిత్రహింసలకు గురిచేసిందీ వివరించారు. తన భర్త, అత్తమామలు అత్యంత దుర్మార్గంగా వ్యవహరించినట్టు సమాచారం. నిధీష్ తండ్రి తనను లైంగిక వేధింపులకు గురిచేశాడని ఆరోపించింది. ఈ విషయం గురించి భర్తకు చెబితే పట్టించుకోలేదు సరికదా తన తండ్రి కోసమే పెళ్లి చేసుకున్నట్టు చెప్పాడని వాపోయింది. అంతేకాదు, కొన్ని వీడియోలు చూసి, తనను కూడా అలా చేయాలని దారుణంగా హింసించాడని, వారిని ఎట్టి పరిస్థితుల్లోనూ వదిలిపెట్టొద్దని అందులో కోరింది.

కేరళలోని కొల్లం జిల్లాకు చెందిన విపంచికకు 2020లో నిధీష్ వళియవీట్టిల్‌తో వివాహం జరిగింది. తర్వాత భర్తతో కలిసి ఆమె షార్జాకు వెళ్లింది. అక్కడకు వెళ్లిన తర్వాత నుంచి ఆమెను వేధించడం మొదలుపెట్టారు. తన కంటే విపాంచిక అందంగా ఉందని భర్త ఆమెకు గుండకొట్టించాడు. పలువురి మహిళలతో సంబంధాలు గురించి తెలిసి నిలదీయడంతో తన కుమార్తె, మనవరాలి(పసిపాప)పై కూడా దాడిచేశారని విపాంచిక తల్లి శ్యామల ఆరోపించారు. అత్తింటి వేధింపులను తట్టుకోలేక కొద్ది నెలల కిందటే తన పాపతో కలిసి విపాంచిక వేరుగా ఉంటోంది. ఈ క్రమంలో భర్త ఆమెకు విడాకుల నోటీసు పంపడంతో మానసిక వేదన భరించలేక ఆమె చివరకు ఆత్మహత్యకు పాల్పడ్డారని కుటుంబ సభ్యులు ఆరోపిస్తున్నారు. ఈ ఘటనపై భారతీయ న్యాయ సంహిత లోని శారీరక వేధింపులు, ఆత్మహత్యకు ప్రేరేపించడం, వరకట్న వేధింపులు వంటి తదితర సెక్షన్ల కింద కేసు నమోదుచేశారు. భర్త నిధీష్ వళియవీట్టిల్, అతడి సోదరి నీతూ బెనీ, వారి తండ్రిని నిందితులుగా చేర్చారు.