మ్యూచువల్ ఫండ్ ఇన్వెస్టర్లకు శుభవార్త.. ఇక 'పోస్టాఫీసు'లోనే కేవైసీ పూర్తి చేయొచ్చు

మ్యూచువల్ ఫండ్ ఇన్వెస్టర్లకు అదిరే శుభవార్త. మీరు ఇక ఈజీగా నో యువర్ కస్టమర్ (KYC)ప్రాసెస్ పూర్తి చేయవచ్చు. భారతీయ తపాలా శాఖ (Post Office) ఇక నుంచి కేవైసీ వెరిఫికేషన్, డాక్యుమెంట్ల సేకరణ వంటి సేవలను మ్యూచువల్ ఫండ్ ఇన్వెస్టర్లకు అందించనుంది. దేశవ్యాప్తంగా ఉన్న పోస్టాఫీసుల్లోని ఉద్యోగులు మ్యూచువల్ ఇన్వెస్టర్లకు కేవైసీ పూర్తి చేసేందుకు సహాయం చేస్తారని తపాలా శాఖ తెలిపింది. కేవైసీ ఫారాలు పూర్తి చేయడం, వెరిఫై చేయడం, సెల్ఫ్ అటెస్టెడ్ డాక్యుమెంట్లను సేకరించి వాటిని సంబంధిత అసెట్ మేనేజ్మెంట్ కంపెనీలకు పంపించడం వంటి సర్వీసులు అందించనుంది.

ఈ మేరకు జూలై 17, 2025 రోజున ఓ ప్రకటన చేసింది. ' దేశవ్యాప్తంగా తమకు ఉన్న 1.64 లక్షలకు పైగా పోస్టాఫీసుల ద్వారా మ్యూచువల్ ఫండ్ ఇన్వెస్టర్ల కేవైసీ వెరిఫికేషన్, డాక్యుమెంట్ల సేకరణ సేవలు అందించనున్నాం. ఇందు కోసం అసోసియేషన్ ఆఫ్ మ్యూచువల్ ఫండ్స్ ఇన్ ఇండియా ( AMFI )తో మెమోరండమ్ ఆఫ్ అండర్‌స్టాండింగ్ (MoU) కుదుర్చుకున్నాం. దీంతో మ్యూచువల్ ఫండ్ ఇన్వెస్టర్లు కేవైసీ చాలా సులభంగా పూర్తి చేసే అవకాశం లభిస్తుంది' అని పేర్కొంది. కేవైసీ రిజిస్ట్రేషన్ ఏజెన్సీల (KRA) రికార్డులలో పెట్టుబడిదారులకు కేవైసీ చెల్లుబాటు అయ్యే హోదాను సాధించడానికి AMFI దాని సభ్య ఏఎంసీల తరపున ఈ చొరవను సులభతరం చేస్తుందని తెలిపింది.

  ఎలాంటి డాక్యుమెంట్లు కావాలి?

మ్యూచువల్ ఫండ్ ఇన్వెస్టర్లు కేవైసీ పూర్తి చేసేందుకు కొన్ని ముఖ్యమైన డాక్యుమెంట్లను సిద్ధం చేసుకోవాలి. అందులో ప్రధానంగా అడ్రస్ ప్రూఫ్, గుర్తింపు రుజువుల కోసం పాస్‌పోర్ట్, డ్రైవింగ్ లైసెన్స్, ఆధార్ కార్డు, ఓటర్ ఐడీ కార్డు, ఉపాధి హామీ పథకం జాబ్ కార్డు, నేషనల్ పాపులేషన్ రిజిస్టర్ జారీ చేసిన లెటర్ లేదా కేంద్ర ప్రభుత్వం జారీ చేసిన ఏదైనా కార్డును ఉపయోగించుకోవచ్చు.

మ్యూచువల్ ఫండ్ కేవైసీ స్టేటస్ తెలుసుకునేందుకు ఎక్కడైతే ఇన్వెస్ట్ చేస్తున్నామో సదరు మ్యూచువల్ ఫండ్ హౌస్ వెబ్‌సైట్ లేదా రిజిస్టర్, ట్రాన్స్‌ఫర్ వెబ్‌సైట్లోకి వెళ్లాలి. కేవైసీ స్టేటస్ లింక్ పై క్లిక్ చేయాలి. పాన్ కార్డు 10 అంకెలను ఎంటర్ చేయాలి. స్క్రీన్ పై మీ స్టేటస్ వాలిడేటెడ్ లేదా రిజిస్టర్డ్ లేదా ఆన్ హోల్డ్ లేదా రిజెక్టెడ్ అని కనిపిస్తుంది. దాని ఆధారంగా మీరు కేవైసీ పూర్తి చేయాల్సి ఉంటుంది. మీ కేవైసీ స్టేటస్ వాలిడేటెడ్ అని వస్తేనే మీరు ఏదైనా ట్రాన్సాక్షన్ చేయగలుగుతారు. లేదంటే ఇబ్బందులు వస్తాయి. మ్యూచువల్ ఫండ్ ఇన్వెస్టర్లు తప్పనిసరిగా నో యువర్ కస్టమర్ రూల్స్ అనుసరించాలని ఏప్రిల్ 1, 2024 నుంచి కొత్త రూల్స్ తీసుకొచ్చారు.