జుట్టు ఒత్తుగా పెరిగేలా చేసే 5 ఆహారాలు

జుట్టు రాలే సమస్యను తగ్గించుకోడానికి రకరకాల ఆయిల్స్, క్రీమ్స్, కండీషనర్స్ వాడుతున్నారు. వీటిని వాడడం మంచిదే కావచ్చు. కానీ కెమికల్స్ తో తయారు చేయడం వల్ల ఎప్పుడో అప్పుడు సైడ్ ఎఫెక్ట్స్ వస్తాయి. అందుకే పూర్తిగా వీటిపైనే ఆధారపడకుండా సహజ సిద్ధమైన చిట్కాలు కూడా పాటించాలి. వీటిలో ముందుగా చెప్పుకోవాల్సింది ఫుడ్ గురించి. డైట్ లో కొన్ని మార్పులు చేసుకుంటే జుట్టు రాలే సమస్య తగ్గడంతో పాటు చాలా వేగంగా జుట్టు పెరిగేందుకు అవకాశం ఉంటుంది. జుట్టు ఒత్తుగా పెరిగేందుకు రోజూ డైట్ లో యాడ్ చేసుకోవాల్సిన 5 ఫుడ్స్ గురించి ఓ హెల్త్ కోచ్ వివరించారు. అవేంటో తెలుసుకుందాం.

జుట్టు పెరగాలంటే

​జుట్టు పెరగాలంటే ఆహారంలో చాలా మార్పులు చేసుకోవాలి. కొన్ని పదార్థాలలో ఉండే పోషకాలు జుట్టు పెరుగుదలను వేగవంతం చేస్తాయి. మీరు తీసుకునే ఆహారంలో జింక్, ఐరన్, ప్రోటీన్ తక్కువగా ఉన్నప్పుడు హెయిర్ గ్రోథ్ ఆగిపోతుంది. అందుకే గుడ్లు, మాంసంతో పాటు పెరుగు, ఆకు కూరలు, పండ్లు లాంటివి తీసుకోవాలని న్యూట్రిషనిస్ట్ లు సలహా ఇస్తున్నారు. షుగర్ ఎక్కువగా ఉండే ఫుడ్ తీసుకోవడం వల్ల కూడా జుట్టు పెరుగుదల ఆగిపోతుంది. అయితే..హెయిర్ గ్రోథ్ వేగంగా ఉండాలంటే రోజువారీ డైట్ లో 5 ఆహార పదార్థాలను తప్పకుండా చేర్చుకోవాలని ఓ హెల్త్ కోచ్ చెబుతున్నారు. పైగా అవి పూర్తిగా సౌత్ ఇండియన్ వెజ్ ఫుడ్స్. ఇంతకీ ఆ ఫుడ్స్ ఏంటో తెలుసుకుందామా.

కరివేపాకు

కూరలో, పోపులో, ఇంకా రకరకాల టిఫిన్స్ లో కరివేపాకు వాడడం అందరికీ అలవాటే. చారు, రసం లాంటివి చేసినప్పుడు కరివేపాకు కచ్చితంగా వాడతారు. వంటకం ఏదైనా సరే. అందులో కాస్త కరివేపాకు వేస్తే ఆ ఫ్లేవర్ మొత్తం మారిపోతుంది. అయితే..కేవలం వంటకే కాదు. జుట్టు పెరగడానికి కూడా ఇది ఎంతో ఉపయోగపడుతుంది. అందుకు ఓ కారణం ఉంది. కరివేపాకులో జుట్టు పెరుగుదలకు అవసరమైన ఐరన్ పుష్కలంగా ఉంటుంది. దీంతో పాటు బీటా క్యారోటీన్ కూడా ఉంటుంది. ఈ రెండూ జుట్టు కుదుళ్లను దృఢంగా మార్చుతాయి. జుట్టు తెల్లబడడాన్ని కూడా తగ్గిస్తాయి. పప్పు,పచ్చళ్లలో తప్పనిసరిగా కరివేపాకు వాడితే మంచిది. ఇక కరివేపాకు పొడి చేసుకుని అన్నంలో కలిపి తిన్నా ప్రయోజనం ఉంటుంది.

మునగాకు

మునగాకులో ఎన్నో పోషకాలుంటాయి. ముఖ్యంగా విటమిన్ ఎ ఉంటుంది. దీని వల్ల కంటి చూపు మెరుగవుతుంది. దీంతో పాటు ఇమ్యూనిటీ పెరగడానికి కూడా మునగాకు ఎంతో తోడ్పడుతుంది. మునగాకు పొడి చేసుకుని అన్నంలో కలిపి రోజూ మొదటి ముద్ద తింటే జీర్ణ సమస్యలు కూడా తగ్గిపోతాయి. అయితే..జుట్టు పెరుగుదలకు కూడా ఇది ఉపయోగపడుతుంది. మునగాకులో ఐరన్, జింక్, విటమిన్ ఎ ఉంటాయి. ఇవన్నీ జుట్టుని ఆరోగ్యంగా ఉంచే పోషకాలే. జుట్టు రాలిన చోట మళ్లీ వెంట్రులకు మొలిచేందుకు ఇవి సహకరిస్తాయి. స్కాల్ప్ కి రక్త సరఫరా మెరుగ్గా అయ్యేలా చూస్తాయి. మునగాకు పచ్చడి, పొడి లేదా పప్పు రూపంలో తీసుకున్నా మంచిదే. ఎలా తిన్నా అందులో పోషకాలు అందుతాయి.

ఉలవలు

ఉలవలు ఆరోగ్యానికి చాలా మంచివి. ముఖ్యంగా రోగనిరోధక శక్తిని పెంచడంలో సహకరిస్తాయి. అంతే కాకుండా బలాన్ని ఇస్తాయి. ఇందులో ప్రోటీన్ అధికంగా ఉంటుంది. బరువు తగ్గాలనుకునే వారు రెగ్యులర్ గా ఉలవలు తీసుకోవచ్చు. అయితే..జుట్టు పెరుగుదలకు కూడా ఇవి సాయపడతాయి. వీటిలో ప్రోటీన్ మాత్రమే కాదు, ఐరన్ కూడా పుష్కలంగా ఉంటుంది. కుదుళ్లను బలంగా ఉంచి జుట్టు రాలకుండా చూస్తాయి ఉలవలు. ఉలవలతో స్నాక్స్ చేసుకోవచ్చు. సలాడ్స్ లో కూడా ఉలవలను యాడ్ చేసుకోవచ్చు. లేదా ఉలవ చారు రెగ్యులర్ గా తీసుకున్నా జుట్టు ఆరోగ్యంగా ఉంటుంది.

నువ్వులు

వీటితో పాటు నువ్వులు కూడా జుట్టు ఆరోగ్యాన్ని కాపాడతాయి. వీటిలో జింక్, క్యాల్షియం అధికంగా ఉంటాయి. ముఖ్యంగా హల్తీ ఫ్యాట్స్ కూడా ఉంటాయి. ఇవన్నీ గుండెకి మంచి చేసేవే. అయితే..జుట్టు పెరగాలన్నా, జుట్టు రాలే సమస్య తగ్గాలన్నా నువ్వులు రెగ్యులర్ గా తీసుకోవాలి. పైన చెప్పిన ఫుడ్స్ అన్నీ జుట్టు రాలకుండా చూస్తే.. నువ్వులు మాత్రం జుట్టు ఒత్తుగా పెరిగేందుకు సహకరిస్తాయి. నువ్వుల పొడి చేసుకుని అన్నం లేదా ఇడ్లీ, రోటీలో తినవచ్చు. ఇక పచ్చళ్లలో నువ్వుల పొడి యాడ్ చేసుకుంటే రుచితో పాటు ఆరోగ్యం కూడా అందుతుంది. సలాడ్స్ పైన గార్నిషింగ్ లా అయినా నువ్వుల పొడి చల్లుకోవచ్చు.

రాగులు

రాగులతోనూ జుట్టుని సంరక్షించుకోవచ్చు. జుట్టు రాలే సమస్య ఉన్న వారు రోజూ డైట్ లో రాగులను చేర్చుకుంటే సరిపోతుంది. వీటిలో ఐరన్ తో పాటు అమినో యాసిడ్స్ అధికంగా ఉంటాయి. జుట్టు పల్చగా మారడాన్ని, రాలిపోవడాన్ని ఇవి తగ్గిస్తాయి. అంతే కాదు. జుట్టు ఒత్తుగా పెరగడానికి,మృదువుగా ఉండడానికి తోడ్పడతాయి. రాగిముద్ద రూపంలో తీసుకుంటే చాలా మంచిది. లేదా రాగి దోశలు తిన్నా పోషకాలు అందుతాయి. ఇక రాగిపొడి చేసుకుని జావ రూపంలో తాగినా జుట్టు ఆరోగ్యంగా ఉంటుంది.