సీనియర్ సిటిజన్లకు.. 8.5 శాతం వడ్డీ.. రూ.5 లక్షలకు ఎంతొస్తుంది?

ఈ ఏడాదిలో ఇప్పటికే మూడుసార్లు కీలక పాలసీ రేట్లను తగ్గించింది రిజర్వ్ బ్యాంక్ ఆఫ్ ఇండియా. దీంతో రెపో రేటు 5.50 శాతానికి పడిపోయింది. ఆర్‌బీఐ నిర్ణయంతో బ్యాంకులు డిపాజిట్ల వడ్డీ రేట్లను భారీగా తగ్గిస్తున్నాయి. దీంతో బ్యాంకుల్లో డబ్బులు దాచుకునే వారు ఇతర మార్గాలను అణ్వేషించాల్సి వస్తోంది. పెద్ద బ్యాంకులన్నీ ఇప్పటికీ వడ్డీ రేట్ల తగ్గింపు ప్రకటించాయి. దీంతో ఫిక్స్‌డ్ డిపాజిట్లు చేస్తే రాబడి తగ్గిపోనుంది. ఇప్పటికీ కొన్ని బ్యాంకులు సీనియర్ సిటిజన్ ఫిక్స్‌డ్ డిపాజిట్లపై గరిష్ఠ వడ్డీ రేట్లు ఆఫర్ చేస్తున్నాయి. ఓ బ్యాంక్ గరిష్ఠంగా 8.50 శాతం వడ్డీ ఇస్తోంది. రూ.3 కోట్ల లోపు ఉండే రిటైల్ టర్మ్ డిపాజిట్లకు ఈ వడ్డీ రేట్లు వర్తిస్తాయి.

ఉత్కర్ష్ స్మాల్ ఫైనాన్స్ బ్యాంక్ ఇప్పటికీ గరిష్ఠ వడ్డీ రేట్లు ఆఫర్ చేస్తోంది. సీనియర్ సిటిజన్లకు (60 ఏళ్ల వయసు దాటిన వారు) 3 సంవత్సరాల మెచ్యూరిటీ టెన్యూర్ గల ఫిక్స్‌డ్ డిపాజిట్లపై ఏకంగా 8.50 శాతం వడ్డీ ఇస్తోంది. ఇందులో ఓ సీనియర్ సిటిజన్ రూ. 5 లక్షలు జమ చేశారు అనుకుందాం. మెచ్యూరిటీ తర్వాత వడ్డీ రూ. 1,25,350 వరకు వస్తాయి. అంటే మొత్తంగా చేతికి రూ. 6,12,350 వరకు అంతాయి.

సూర్యోదయ స్మాల్ ఫైనాన్స్ బ్యాంకు సైతం గరిష్ఠ వడ్డీ రేట్లు ఆఫర్ చేస్తోంది. ఇప్పటికీ ఈ బ్యాంకులో మూడేళ్ల మెచ్యూరిటీ టెన్యూర్ గల డిపాజిట్లపై గరిష్ఠంగా 8.15 శాతం మేర వడ్డీ ఇస్తోంది. సీనియర్ సిటిజన్లకు ఇది మంచి అవకాశంగా చెప్పవచ్చు. ఇందులో రూ.5 లక్షలు జమ చేసినట్లయితే మూడేళ్ల తర్వాత చేతికి వడ్డీ రూపంలో రూ. 1,20,180 వరకు అందుతాయి. మొత్తంగా అసలు, వడ్డీ కలిపి రూ. 6,20,180 వరకు వస్తాయి.

చాలా మంది స్మాల్ ఫైనాన్స్ బ్యాంకులో డిపాజిట్ చేసేందుకు వెనకడుగు వేస్తుంటారు. అయితే, ఈ బ్యాంకుల్లోనూ డిపాజిటర్ ఇన్సూరెన్స్ క్రెడిట్ గ్యారెంటీ స్కీమ్ వర్తిస్తుంది. దీని ద్వారా రూ. 5 లక్షల వరకు ఇన్సూరెన్స్ కవరేజీ ఉంటుంది. బ్యాంక్ దివాలా తీసినా రూ.5 లక్షల వరకు చెల్లిస్తారు. అంతకు మించి డిపాజిట్ చేసినప్పుడే నష్టపోవాల్సి వస్తుంది. అందుకే ఎలాంటి ఆందోళన అవసరం లేకుండా ఈ చిన్న బ్యాంకుల్లోనే డిపాజిట్ చేయవచ్చని ఆర్థిక నిపుణులు సూచిస్తున్నారు. అయితే, డిపాజిట్ అమౌంట్, వడ్డీ మొత్తం రూ.5 లక్షల వరకే బీమా కవరేజీ లభిస్తుందని గుర్తుంచుకోవాలి.