ఇక ఈ 'సిటీ'లో నో ట్యాక్స్.. స్పెషల్ పన్ను మినహాయింపు

పరిమితికి మించి సంపాదించే వారు ఆదాయపు పన్ను చెల్లించాల్సి ఉంటుంది. ఇన్‌కమ్ ట్యాక్స్ చట్టంలోని పలు సెక్షన్ల కింద కొన్ని మినహాయింపులు ఉంటాయి. అయితే, పూర్తిగా పన్ను చెల్లించాల్సిన అవసరం లేకుండా మినహాయింపు ఉండదు. కొన్ని ప్రత్యేక సందర్భాల్లోనే మినహాయింపు లభిస్తుంది. అలా దేశంలోని ఓ నగరానికి ఆదాయపు పన్ను నుంచి మినహాయింపు ఇచ్చింది కేంద్ర ప్రభుత్వం. అదే ఉత్తర్‌ప్రదేశ్‌లోని నోయిడా. ఇకపై ఆదాయపు పన్ను చెల్లించాల్సిన అవసరం లేదు. ఆదాయపు పన్ను చట్టంలోని సెక్షన్ 10(46A) కింద మినహాయింపు లభించింది. ఈ మినహాయింపు అసెస్‌మెంట్ సంవత్సరం 2024-25 నుంచి అమలులోకి వస్తుంది. కేంద్ర ప్రత్యక్ష పన్నుల బోర్డు ( CBDT ) నోటిఫికేషన్ నంబర్ 1162025 ద్వారా ఈ మినహాయింపును మంజూరు చేసింది.

ఈ ప్రత్యేక మినహాయింపు న్యూ ఓఖ్లా ఇండస్ట్రియల్ డెవలప్‌మెంట్ అథారిటీ (నోయిడా) వంటి చట్టబద్ధమైన ప్రభుత్వ యుటిలిటీ సంస్థలకు మాత్రమే వర్తిస్తుంది. ఈ సంస్థలు వాణిజ్యేతర కార్యకలాపాలను నిర్వహిస్తాయి. ఫైనాన్స్ బిల్లు 2023లో ఈ మినహాయింపులను ప్రతిపాదించారు. దీని ప్రకారం అద్దె, ఫీజులు, ప్రభుత్వ గ్రాంట్లు వంటి ప్రజా యుటిలిటీ సేవల నుంచి వచ్చే ఆదాయంపై ఇకపై పన్ను ఉండదు. అయితే, నోయిడా ఏదైనా వాణిజ్య లేదా లాభదాయక కార్యకలాపాలు సాగిస్తే మాత్రం అవి పూర్తిగా పన్ను పరిధిలోకి వస్తాయని సీబీడీటీ తెలిపింది. ఈ మినహాయింపు వలన వచ్చే ఆదాయాన్ని మౌలిక సదుపాయాల అభివృద్ధికి ఉపయోగించవచ్చు.

నోయిడాకు ఆదాయపు పన్ను మినహాయింపు లభించడంతో ప్రజలకు అనేక ప్రయోజనాలు చేకూరతాయి. ఈ మార్పు వలన మెరుగైన రోడ్లు, గృహాలు, రవాణా, మురుగునీటి పారుదల వ్యవస్థలు అందుబాటులోకి వస్తాయి. స్థానిక పన్నుల భారం కూడా తగ్గుతుంది. వ్యాపారాలకు ప్రాజెక్టుల ఆమోదం వేగంగా జరుగుతుంది. పారిశ్రామిక మౌలిక సదుపాయాలు మెరుగుపడతాయి. అయితే, వ్యాపారాల పన్ను బాధ్యతలలో మాత్రం ఎటువంటి మార్పు ఉండదు. ఈ మినహాయింపు కొన్ని షరతులకు లోబడి ఉంటుంది.

నోయిడా మినహాయింపు పొందిన, పొందని ఆదాయానికి సంబంధించిన రికార్డులను వేరువేరుగా నిర్వహించాలి. నిబంధనలను ఉల్లంఘిస్తే ఈ ప్రయోజనం రద్దు చేయబడుతుంది. పన్ను రహిత పట్టణ ప్రణాళికను అమలు చేయడం, భారతదేశంలోని కీలక అభివృద్ధి సంస్థల ఆర్థిక స్థిరత్వాన్ని బలోపేతం చేయడం ఈ మినహాయింపు ముఖ్య ఉద్దేశం. "పన్ను లీకేజీ లేకుండా నోయిడా తన ఆదాయంలో ఎక్కువ భాగాన్ని మౌలిక సదుపాయాలలో తిరిగి పెట్టుబడి పెట్టడానికి ఇది అనుమతిస్తుంది" అని ఒక సీనియర్ అధికారి మీడియాకు తెలిపారు.

ఈ చర్య సార్వభౌమ సంపద నిధులు, మౌలిక సదుపాయాలకు మద్దతు ఇచ్చే పెన్షన్ ఫండ్లకు అందించే పన్ను రాయితీలకు అనుగుణంగా ఉంది. నోయిడాకు పన్ను మినహాయింపు ఇవ్వడం వలన సంస్థ ఆర్థికంగా బలోపేతం అవుతుంది. ప్రజా సంక్షేమం కోసం నిధులను మరింత సమర్థవంతంగా ఉపయోగించవచ్చు. పట్టణ ప్రాంతాల్లో మౌలిక సదుపాయాల అభివృద్ధికి ఇది దోహదం చేస్తుంది. ఈ నిర్ణయం నోయిడా పరిధిలోని ప్రజల జీవన ప్రమాణాలను మెరుగుపరుస్తుంది. పన్ను మినహాయింపు వలన నోయిడా తన ఆదాయాన్ని అభివృద్ధి కార్యక్రమాలపై దృష్టి పెట్టడానికి వీలు కలుగుతుంది. దీని ద్వారా ప్రజలకు మెరుగైన సేవలు అందుబాటులోకి వస్తాయి. నోయిడా ప్రాంతం మరింత అభివృద్ధి చెందుతుంది.