భర్తను చంపి,,,,ఇంటిలోనే మృతదేహం పూడ్చిపెట్టింది

రోజు రోజుకూ మానవ సంబంధాలు మంటగలిసిపోతున్నాయి. వివాహేతర సంబంధాలు పచ్చని సంసారాల్లో చిచ్చురేపుతున్నాయి. పరాయి వ్యక్తుల మోజులో పడి జీవిత భాగస్వాములను కడతేర్చడానికి కూడా వెనుకాడటం లేదు. దేశవ్యాప్తంగా పెరుగుతోన్న ఈ విపరీత పోకడలు ఎన్నో కుటుంబాలను చిన్నాభిన్నం చేస్తున్నాయి. ముఖ్యంగా మహిళలు అత్యంత క్రూరంగా వ్యవహరిస్తూ... కట్టుకున్న భర్తనే కాటికి పంపుతున్నారు. రోజూ ఇటువంటి ఘటనలు దేశంలో ఏదో ఒక చోటు జరుగుతూనే ఉన్నాయి. గత నెలలో మేఘాలయ హనీమూన్ హత్య కేసు దేశవ్యాప్తంగా సంచలనం సృష్టించింది. అయితే, తెలంగాణలో తేజేశ్వర్ హత్య కేసు మేఘాలయ ఘటనను మించిపోయింది. అలాగే, తమిళనాడులో ఓ మహిళ ఏకంగా సాంబారులోనే విషం కలిపి భర్త ప్రాణాలు తీసింది.

తాజాగా, ఓ మహిళ తన భర్తను హత్యచేసి.. ఇంటిలోపలే శవాన్ని పూడ్చిపెట్టింది. ‘దృశ్యం’ను తలపించే అత్యంత భయానక ఘటన మహారాష్ట్ర పాల్ఘర్ జిల్లాలో చోటుచేసుకుంది. గడగపడా-నలాస్‌పొరాలో కోమల్ చవాన్ అనే మహిళ తన వివాహేతర సంబంధానికి అడ్డుగా ఉన్నాడని ప్రియుడి సాయంతో భర్తను హత్య చేసి ఇంట్లోనే గొయ్యి తీసి పాతేసింది. రెండు వారాల కిందట జరిగిన ఈ హత్యోదంతం ఆలస్యంగా వెలుగులోకి వచ్చింది. ముంబయికి దాదాపు 70 కిలోమీటర్ల దూరంలో కోమల్ (28), తన భర్త విజయ్ చవాన్ (35)తో కలిసి ఉంటోంది. అయితే, గత 15 రోజులుగా విజయ్ అదృశ్యమయ్యాడు.

దీంతో అతడి ఆచూకీ కోసం వెదుకుతోన్న సోదరులు.. సోమవారం ఉదయం వారు నివాసం ఉండే ఇంటికి వచ్చారు. కానీ, అప్పటికి రెండు రోజుల కిందటే కోమల్‌ తన పక్కింటిలో ఉండే మోను అనే యువకుడితో పరారయ్యింది. దీంతో ఇంటిలోపలి ఉన్న ఫ్లోర్‌టైల్స్ రంగుల్లో తేడాగా ఉండటంతో వారికి అనుమానం వచ్చింది. ఆ టైల్స్ తొలగిస్తుండగా భయంకరమైన దుర్వాసన రావడంతో వెంటనే పోలీసులకు సమాచారం ఇచ్చారు.

పోలీసులు అక్కడకు చేరుకుని మట్టిని తొలగించి అందులో మృతదేహాన్ని బయట తీశారు. ఈ దృశ్యాన్ని చూసిన కుటుంబసభ్యులు షాకయ్యారు. ఘటనపై కేసు నమోదుచేసిన పోలీసులు దర్యాప్తు చేపట్టారు. తన పొరుగున ఉండే మోనుతో కోమల్ వివాహేతర సంబంధం పెట్టుకున్నట్లు పోలీసులు అనుమానిస్తున్నారు. గత రెండు రోజులుగా ఈ ఇద్దరూ కూడా అదృశ్యమయ్యారని, వారి కోసం గాలింపు చర్యలు ముమ్మరం చేశామని తెలిపారు. తమ సంబంధం గురించి భర్తకు తెలియడంతో అతడ్ని అడ్డుతొలగించుకోడానికి ఇరువురూ కలిసి పథకం వేసి విజయ్‌ను హత్య చేసిన ఉంటారని పోలీసులు అనుమానం వ్యక్తం చేస్తున్నారు.