ఏపీకి కొత్త జిల్లాల పేర్లు? కీలక సమావేశానికి మంత్రుల బృందం సిద్ధం!

ఆంధ్రప్రదేశ్లో జిల్లాల పేర్లు మార్పుపై కేబినెట్ సబ్కమిటీ ఏర్పాటు అయింది. సభ్యులుగా మంత్రులు అనగాని సత్యప్రసాద్, నారాయణ, అనిత, జనార్ధన్రెడ్డి, రామానాయుడు, నాదెండ్ల, సత్యకుమార్ ఉంటారు.
ఏపీలోని జిల్లాల పేర్ల మార్పులు చేర్పుల కోసం కూటమి ప్రభుత్వం చర్యలు చేపట్టింది. రాష్ట్రంలోని జిల్లాలు, మండలాలు, గ్రామాల సరిహద్దులు, పేర్ల మార్పులు చేర్పులకు సంబంధించి అధ్యయనం చేసేందుకు ఒక మంత్రివర్గ ఉపసంఘాన్ని ఏర్పాటు చేసింది. ఈ మేరకు ఏపీ ప్రభుత్వ ప్రధాన కార్యదర్శి కె.విజయానంద్‌ మంగళవారం నాడు ఉత్తర్వులు జారీ చేశారు.జిల్లాలు, మండలాలు, గ్రామాల పేర్ల మార్పు , సరిహద్దుల సవరణలపై ప్రజల నుండి సూచనలు, విజ్ఞప్తులను కమిటీ సేకరిస్తుంది. ప్రజల అభిప్రాయాలను, చారిత్రక, సాంస్కృతిక, ప్రాంతీయ అంశాలను పరిగణనలోకి తీసుకొని సమగ్ర అధ్యయనం చేస్తుంది. అధ్యయనం ఆధారంగా సమగ్ర నివేదిక సిద్ధం చేసి ప్రభుత్వానికి కమిటీ సమర్పిస్తుంది. ప్రభుత్వం సూచించినట్లు, ప్రాంతీయ గుర్తింపు, సాంస్కృతిక విలువలు, చారిత్రక నేపథ్యం వంటి అంశాలకు ప్రాధాన్యత ఇచ్చి సిఫారసులు చేస్తుంది.2022లో ఆంధ్రప్రదేశ్‌లో వైఎస్ఆర్సీపీ ప్రభుత్వం 13 జిల్లాలను 26 జిల్లాలుగా పునర్వ్యవస్థీకరించింది. అయితే కొత్తగా ఏర్పాటైన కొన్ని జిల్లాల పేర్లు మరియు సరిహద్దులు వివాదాస్పదంగా మారాయి.కొన్ని జిల్లాల పేర్లకు సంబంధించి, అలాగే మండలాల సరిహద్దులపై ప్రజల నుంచి అభ్యంతరాలు, సూచనలు వెలువడ్డాయి. ఈ నేపథ్యంలో ప్రజల అభిప్రాయాలను పరిగణనలోకి తీసుకుని, చారిత్రక, సాంస్కృతిక ప్రాధాన్యతకు అనుగుణంగా జిల్లాల పేర్లు, సరిహద్దుల్లో మార్పులు చేయాలనే ఆలోచనలో రాష్ట్ర ప్రభుత్వం ఉంది.ఈ లక్ష్యంతోనే, జిల్లాల పునర్విభజనపై వచ్చిన అభిప్రాయాలను పారదర్శకంగా పరిశీలించి, తగిన సూచనలతో నివేదిక సమర్పించేందుకు ఏడుగురు మంత్రులతో కూడిన ప్రత్యేక సబ్‌కమిటీని ఏర్పాటు చేశారు. కమిటీ నిర్దిష్ట సమయంలోగా నివేదిక సమర్పించేలా చర్యలు చేపట్టనున్నట్లు సమాచారం.కమిటీ ప్రజల నుండి సేకరించిన సూచనలు, అధ్యయనాల ఆధారంగా నివేదిక సిద్ధం చేస్తుంది. ఈ నివేదిక ఆధారంగా ఆంధ్రప్రదేశ్ ప్రభుత్వం జిల్లాల పేర్ల మార్పు, సరిహద్దుల సవరణలపై తుది నిర్ణయం తీసుకుంటుంది. నిర్ణయం తీసుకునే ముందు, ప్రజల అభిప్రాయాలను విస్తృతంగా సేకరించడం, చర్చిస్తారు. ఈ చర్యను ప్రజాభిప్రాయాన్ని గౌరవించే దిశగా ఒక అడుగుగా భావిస్తున్నారు.