ఏపీలో రూ.70 వేల కోట్ల పెట్టుబడులకు కేబినెట్ ఆమోదం

ముఖ్యమంత్రి చంద్రబాబు నాయుడు అధ్యక్షతన ఏపీ కేబినెట్ పలు కీలక నిర్ణయాలు తీసుకుంది. ఏపీ సచివాలయంలో గురువారం నిర్వహించిన సమావేశంలో పలు కీలక అంశాలపై సీఎం చర్చించారు. రాష్ట్రంలో మొత్తం రూ. 70 వేల కోట్ల పెట్టుబడులకు కేబినెట్ ఆమోదం తెలిపింది. ఐటీ, రెన్యువబుల్ ఎనర్జీ, ఎలక్ట్రానిక్స్, డ్రోన్, ఆటోమొబైల్స్ రంగాల్లో పలు పరిశ్రమలు రాష్ట్రానికి వస్తున్నట్లు నేరుగా ముఖ్యమంత్రే వెల్లడించారు.

రూ. 70 వేల కోట్ల పెట్టుబడులను సరిగ్గా గ్రౌండ్ చేస్తే లక్షమంది నిరుద్యోగులకు ఉద్యోగ అవకాశాలు లభిస్తాయని ముఖ్యమంత్రి చంద్రబాబు నాయుడు తెలిపారు. మంత్రులు, అధికారులు వెంటబడి మరీ వీటన్నింటిని గ్రౌండ్ చేయించాలని ఆదేశించారు. సింగపూర్‌తో సంబంధాల కొనసాగింపుపై కూడా ముఖ్యమంత్రి ఈ సమావేశంలో చర్చించారు.

రాష్ట్రంలో ఇల్లు లేని నిరుపేదలను గుర్తించి వారికి ఇల్లు ఇచ్చే కార్యక్రమం చేపట్టాలని సీఎం సూచించారు. గ్రామాల్లో అయితే మూడు సెంట్లు, పట్టణాల్లో రెండు సెంట్ల స్థలం ఇవ్వాలని చెప్పారు. మంత్రులు ఈ విషయంపై ప్రత్యేక దృష్టి సారించాలని ఆదేశించారు. క్వాంటం వ్యాలీ మాదిరి గ్రీన్ హైడ్రోజన్ వ్యాలీలో కూడా అందరి కంటే ఏపీనే ముందు ఉండాలని చెప్పారు. గ్రీన్ హైడ్రోజన్ వ్యాలీతో మనకు ఎక్కువ ప్రయోజనం ఉంటుందని ఆయన వివరించారు.

రాష్ట్రం విడిపోయిన తర్వాత టీడీపీ చొరవతో సింగపూర్ ప్రభుత్వం ముందుకు వచ్చి రాష్ట్రానికి సహాయం చేసిందని ముఖ్యమంత్రి గుర్తు చేశారు. అయితే ప్రభుత్వం మారిన తర్వాత ఆ కంపెనీ నిర్వాహకులను గత ముఖ్యమంత్రి జగన్ వెళ్లగొట్టారని, ఆ కంపెనీలపై అవినీతి ముద్ర వేశారని చంద్రబాబు చెప్పుకొచ్చారు. సింగపూర్ కన్సార్టియం నిర్వాహకులపై కేసు పెట్టేందుకు కూడా ప్రయత్నం చేయడంతో.. వారి పూర్తిగా తమ రాష్ట్రంపై అసంతృప్తి వ్యక్తం చేశారని చెప్పారు. మళ్లీ ఇప్పుడు సింగపూర్‌తో సంబంధాలు పునరుద్ధరించుకోవాలని ఆయన సూచించారు.

2024 - 2025 సంవత్సరానికి నీటి పన్నుపై వడ్డీని పూర్తిగా రద్దు చేయాలని ఏపీ కేబినెట్ నిర్ణయం తీసుకుంది. అదేవిధంగా తిరుపతి తొక్కిసలాటపై జస్టిస్ సత్యనారాయణ మూర్తి ఇచ్చిన నివేదికపై కూడా చర్చించారు. గో సంరక్షణ అధికారి, డీఎస్పీపై క్రిమినల్ చర్యలు తీసుకోవాలని కేబినెట్ ఆదేశించింది. అప్పటి తిరుపతి ఎస్పీ సుబ్బరాయుడుకు క్లీన్ చిట్ ఇచ్చింది.