హృదయ స్పందన రేటులో తేడాలు..మూడ్రోజులుగా ఆస్పత్రిలోనే తమిళనాడు సీఎం

తమిళనాడు ముఖ్యమంత్రి ఎంకే స్టాలిన్ ఆరోగ్యంపై ప్రజల్లో నెలకొన్న ఆందోళనలకు తెరపడింది. ఇటీవల ఉదయం వాకింగ్ చేస్తుండగా తీవ్ర అస్వస్థతకు గురైన ఆయనను చెన్నైలోని అపోలో ఆసుపత్రికి తరలించారు. గత మూడు రోజులుగా ఆయన అక్కడే ఉండగా.. వైద్యులు చికిత్స అందిస్తున్నార. అయితే ఇప్పటి వరకు ఆయన పరిస్థితి బాగానే ఉందని చెప్పిన వైద్యులు.. తాజాగా ఆయనకున్న సమస్య గురించి వెల్లడించారు. ముఖ్యమంత్రి స్టాలిన్ ఆరోగ్య పరిస్థితిపై అపోలో వైద్యులు.. ఒక బులెటిన్‌ను విడుదల చేశారు.

ఈ బులెటిన్ ప్రకారం.. ఆయన గుండె స్పందన రేటులో కొన్ని తేడాలు ఉన్నట్లు వైద్య పరీక్షల్లో గుర్తించారు. ఈ తేడాలే ఆయనకు తలతిరగడానికి కారణమని నిర్ధారించారు. గుండె లయలో ఏర్పడిన ఈ తేడాలను సరి చేయడానికి.. హృద్రోగ నిపుణుడు డాక్టర్ జి. సెంగుట్టువేలు నేతృత్వంలోని వైద్య నిపుణుల బృందం ఆయనకు ఒక థెరప్యూటిక్ విధానాన్ని (చికిత్సా ప్రక్రియ) నిర్వహించింది. అలాగే ప్రతిరోజు నిర్వహించిన యాంజియోగ్రామ్ పరీక్ష నివేదిక సాధారణంగానే ఉందని వైద్యులు స్పష్టం చేశారు. ప్రస్తుతం సీఎం స్టాలిన్ ఆరోగ్యం నిలకడగా ఉందని.. మరో రెండు రోజుల్లో ఆయన తన సాధారణ విధులను తిరిగి ప్రారంభించే అవకాశం ఉందని బులెటిన్‌లో పేర్కొన్నారు.

ఈ ఘటనతో తమిళనాడు రాజకీయ వర్గాల్లో, ప్రజల్లో కొద్దిపాటి ఆందోళన నెలకొన్నా.. ఇప్పుడు వైద్యులు విడుదల చేసిన బులెటిన్‌తో అందరూ ఊపిరి పీల్చుకున్నారు. ముఖ్యమంత్రి పూర్తి ఆరోగ్యంతో ఉన్నారని తెలుసుకుని సంబుర పడిపోతున్నారు. ముఖ్యంగా ఆయన త్వరగా కోలుకుని, తిరిగి ఆయన పనుల్లో నిమగ్నం కావాలని కార్యకర్తలు, అభిమానులు ఆకాంక్షిస్తున్నారు.

ఆసుపత్రిలో చేరినప్పటి నుంచి ఆయన ఆరోగ్యంపై ఎప్పటికప్పుడు సమాచారం అందుతూనే ఉంది. అయిత గుండె లయలో తేడాలు వంటి సున్నితమైన అంశం బయట పడటంతో వైద్య బృందం అత్యంత జాగ్రత్తగా చికిత్స అందించింది. ప్రస్తుతం ఆయన ఆరోగ్యం నిలకడగా ఉండడంతో.. మరో రెండు రోజుల్లోనే డిశ్చార్జ్ చేస్తామని చెప్పారు.