హరి హర వీరమల్లు సినిమా రిలీజ్.. ఉద్యోగులకు హాఫ్ డే లీవ్ ప్రకటించిన కంపెనీ

మన దేశంలో సినిమా స్టార్లకు ఉన్న క్రేజ్ గురించి ప్రత్యేకంగా చెప్పాల్సిన పని లేదు. హీరోలకు అభిమాన సంఘాలు, వారి పుట్టిన రోజు నాడు సేవా కార్యక్రమాలు, సినిమా విడుదల సందర్బంగా భారీ కటౌట్లు, పాలాభిషేకాలు, ప్రత్యేక పూజలు ఇలా మాములు తతంగం ఉండదు. ఇక కొందరు హీరోల సినిమాల విడుదల సందర్భంగా ఉద్యోగులకు ప్రత్యేకంగా సెలవులు కూడా ఇస్తారు. మన తెలుగు రాష్ట్రాల్లో ఇలాంటి సీన్ ఇప్పటి వరకు కనిపించలేదు కానీ.. తమిళనాడు, కర్ణాటకలో మాత్రం అప్పుడప్పుడు.. రజనీకాంత్, ఇతర స్టార్ హీరోల సినిమాల విడుదల సందర్భంగా పలు కంపెనీలు ఉద్యోగులకు సెలవులు ఇచ్చిన సంగతి తెలిసిందే. ఈ క్రమంలో తాజాగా యూకే కంపెనీ ఒకటి.. పవన్ కళ్యాణ్ హరి హర వీరమల్లు సినిమా విడుదల సందర్భంగా తమ ఉద్యోగులకు హాఫ్ డే సెలవు ఇస్తున్నట్లు ప్రకటించింది. ఆ వివరాలు..

  ట్విట్టర్ అదే ఇప్పటి ఎక్స్‌లో యాక్టీవ్‌గా ఉండే వారికి బాలు రెడ్డి యూకే అనే వ్యక్తి చిరపరిచతమే. ఇతడు మెగా హీరోలకు అందునా పవన్ కళ్యాణ్‌కు వీరాభిమాని. అతడి పోస్ట్‌లు చూస్తే ఈ విషయం స్పష్టంగా అర్థం అవుతుంది. యూకేలో ఒక ఐటీ కంపెనీ, ఈకామర్స్ బిజినెస్ రన్ చేస్తున్నారు. ఈక్రమంలో తాజాగా అతడు తన కంపెనీలో పని చేసే ఉద్యోగులకు శుభవార్త చెప్పారు. హరి హర వీరమల్లు సినిమా రిలీజ్ సందర్బంగా ఉద్యోగులకు హాఫ్ డే సెలవు ఇస్తున్నట్లుగా మెయిల్ చేశారు. దీనికి సంబంధించిన స్క్రీన్ షాట్‌ని ఎక్స్‌లో పోస్ట్ చేశారు.

ఈమేరకు బాలురెడ్డి తన ఎక్స్ ఖాతాలో..‘హరి హర వీరమల్లు సినిమా విడుదల సందర్బంగా నా రెండు కంపెనీల్లో పని చేస్తున్న ఉద్యోగులకు హాఫ్ డే సెలవు ప్రకటిస్తున్నాను. నా రెండు కంపెనీల్లో పని చేస్తున్న 27 మంది ఉద్యోగుల్లో ఎక్కువ మంది తెలుగువారే ఉన్నారు. వారిని దృష్టిలో పెట్టుకుని ఈ నిర్ణయం తీసుకున్నాను’ అని పోస్ట్ చేశారు.

ప్రస్తుతం ఈ పోస్ట్ నెట్టింట తెగ వైరల్ అవుతోంది. ఇది చూసిన వారు ఓడియమ్మా కార్పొరేట్‌లో ఇలాంటివి కూడా ఉంటాయా.. మీ కంపెనీలో పని చేసే అవకాశం లభించినందుకు ఉద్యోగులు హ్యాపీగా ఫీలవుతుంటారు.. మీ ఉద్యోగుల్లో అసంతృప్తి అనే మాట ఉండదేమో.. మీ కంపెనీలో జాబ్ ఉంటే చెప్పన్నా. విమానం ఎక్కేసి వచ్చేస్తాం అంటూ కామెంట్స్ చేస్తున్నారు.

వీటిపై బాలురెడ్డి స్పందిస్తూ.. తనది కార్పొరేట్ స్థాయి కంపెనీ కాదని.. రెండు చిన్న కంపెనీలున్నాయని చెప్పుకొచ్చారు. వీటిల్లో ఒకటి ఐటీ మరోటి ఈకామర్స్ బిజినెస్ అని తెలిపారు. అంతేకాక తాను గతంలో కూడా చాలా సందర్బాల్లో సినిమాల విడుదల సందర్భంగా తన ఉద్యోగులకు సెలవు ఇచ్చినట్లు చెప్పుకొచ్చాడు. చిన్న కంపెనీనే కావడం.. అందునా తన స్వంత కంపెనీ కావడంతో తనకు నచ్చినట్లు నిర్ణయం తీసుకునే అధికారం ఉందని చెప్పుకొచ్చాడు. ఈ నిర్ణయంపై పవన్ అభిమానులు హర్షం వ్యక్తం చేస్తున్నారు.