రెయిన్ కోట్ కొనేటప్పుడు అ జాగ్రత్తలు తీసుకోండి

వర్షాకాలంలో బయటకు వెళ్లాలంటే తప్పనిసరిగా ఉండాల్సిన వస్తువులలో ఒకటి గొడుగు అయితే, మరోటి రెయిన్ కోట్. గొడుగు విషయంలో పెద్దగా ఆలోచించాల్సింది ఏమీ ఉండదు. వెళ్లామా కొన్నామా వాడామా అన్నట్టుగా ఉంటుంది. అదే రెయిన్ కోట్ విషయంలో మాత్రం తప్పనిసరిగా కొన్ని జాగ్రత్తలు తీసుకోవాలి. ఎలాంటి మోడల్ తీసుకుంటున్నాం. సౌకర్యంగా ఉంటుందా లేదా, సరైన విధంగా వాటర్ ని అబ్జార్బ్ చేసుకుంటుందా. ఇలా ఎన్నో విధాలుగా చెక్ చేసుకోవాల్సి ఉంటుంది. అయితే..కేవలం ఇవే కావు. పర్ఫెక్ట్ రెయిన్ కోట్ కొనాలంటే తప్పనిసరిగా కొన్ని విషయాలు చెక్ చేయాలి. ముఖ్యంగా ఓ 5 పాయింట్స్ మాత్రం కచ్చితంగా గమనించాలి. ఫ్యాబ్రిక్ ఎలా ఉందని చెక్ చేయడం నుంచి ఎంత లెంత్ ఉండాలి అనే వరకూ అన్ని వివరాలు తెలుసుకుందాం.

ఫ్యాబ్రిక్ 

రెయిన్ కోట్ ఎందుకు వేసుకుంటాం. ఇదేం ప్రశ్న అని అనుకోకండి. రెయిన్ కోట్ వేసుకునేది ఎందుకంటే వర్షంలో వెళ్లినా తడవకుండా ఉండేందుకు. కానీ కొన్ని రకాల రెయిన్ కోట్స్ సరిగ్గా పని చేయవు. అంటే..అవి వేసుకున్నా సరే మొత్తం తడిసిపోతారు. అందుకు కారణం ఏంటంటే..ఫ్యాబ్రిక్ సరైన విధంగా లేకపోవడం. వాటర్ ప్రూఫ్ ఫ్యాబ్రిక్ లేకపోతే పరిస్థితి ఇలాగే ఉంటుంది. అందుకే తప్పనిసరిగా రెయిన్ కోట్ కొనేటప్పుడు అది వాటర్ ప్రూఫా కాదా అన్నది చెక్ చేయాలి.

కాకపోతే ఇందులోనూ రకరకాల క్వాలిటీస్ ఉంటాయి. హైక్వాలిటీ వాటర్ ప్రూఫ్ ఫ్యాబ్రిక్ కావాలంటే కాస్తంత ఎక్కువ ఖర్చు చేయాల్సి ఉంటుంది. కానీ వర్షంలో తడవకుండా ఉండాలన్నా, ఎక్కువ కాలం పాటు మన్నికగా ఉండాలన్నా ఇవే మంచిది. పైగా ఈ తరహా కోట్స్ ని టెస్ట్ చేస్తారు. వాటిపై నీళ్లు స్ప్రే చేసి ఎంత వరకూ ఈ ఫ్యాబ్రిక్ సరైన విధంగా పని చేస్తోందో గమనిస్తారు. ఇలాంటి కోట్స్ వాటర్ పడగానే వాటిని పీల్చేసుకుంటాయి. పైగా తడి కూడా తెలియదు. మామూలు కోట్ అయితే మాత్రం నీరు పడగానే పూర్తిగా తడిసిపోతుంది.

స్టిచింగ్ బానే ఉందా

వాటర్ ప్రూఫ్ అని చెప్పి అమ్ముతారు. కానీ తీరా మీరు వాడుతున్నప్పుడు లోపల అంతా బాగా తడిగా, మురికిగా అనిపిస్తుంది. అందుకు కారణం ఏంటంటే లోపల వాడే క్లాథ్ కూడా సరిగ్గా ఉండకపోవడం. సరైన విధంగా వీటిని స్టిచ్ చేయకపోయినా, మంచి క్లాథ్ వాడకపోయినా వెంటనే తడిసిపోతుంది. అయితే కాస్త క్వాలిటీ ఉన్న రెయిన్ కోట్స్ లో అయితే ఇలాంటి ఇబ్బంది లేకుండా లోపల కూడా వాటర్ ప్రూఫ్ టేప్స్ వాడతారు. అంటే ఎక్కడికక్కడ సీల్ చేసేస్తారు. అప్పుడే ఇది పూర్తిగా వాటర్ ప్రూఫ్ రెయిన్ కోట్ లా మారుతుంది. మీరు గమనిస్తే..ఇలాంటి వాటర్ ప్రూఫ్ రెయిన్ కోట్స్ అన్నీ బరువు చాలా తక్కువగా ఉంటాయి. వాటికి వాడే క్లాథ్ చాలా డిఫరెంట్ గా ఉంటుంది. అయితే ఇంత అల్కగా ఉన్నప్పటికీ అసలు తడవవు. స్టిచింగ్స్ వద్ద ఎలాంటి డ్యామేజ్ లేకుండా చూసుకోవడం చాలా ముఖ్యం. ఇక్కడ సరిగ్గా లేకపోతే చాలా త్వరగా తడిసిపోయేందుకు అవకాశముంటుంది.

ఇది కూడా చెక్ చేయాలి

తలపైన కూడా కవర్ అయ్యేలా చూసుకోవడం బెటర్. దీన్నే హుడీ అంటారు. ఈ హుడీ కూడా సరైన విధంగా ఉండాలి. అయితే..ఈ హుడీ తలపై సరైన విధంగా ఉండాలంటే అడ్జస్ట్ మెంట్ తప్పనిసరిగా ఉండాలి. గాలి బాగా వచ్చినప్పుడు ఇది పక్కకు తొలగిపోయే అవకాశం ఉంటుంది. దీని వల్ల తల తడిసిపోతుంది. అలా కాకుండా అడ్జస్ట్ మెంట్ ఉండే విధంగా చెక్ చేసుకోవాలి. ఇలా ఉంటే ఎంత గాలి వచ్చినా తలకు అలా పట్టి ఉంటుంది. ముందు భాగంలో థ్రెడ్స్ ఉండేలా చూసుకోవాలి. దీని వల్ల లూజ్ చేసుకోడానికి, టైట్ చేసుకోడానికి సులువుగా ఉంటుంది. ఎక్కువ దూరం నడవాల్సి వచ్చినప్పుడు కూడా ఎలాంటి ఇబ్బంది ఉండదు. ఇక వీటితో పాటు మరో విషయం కూడా తప్పనిసరిగా గమనించాలి. అదేంటంటే.. బ్రీథబిలిటీ. అంటే..ఎంత వరకూ గాలి ఆడుతోందన్నది చెక్ చేయాలి. లేదంటే వేసుకున్న కాసేపటికే ఉక్కపోసి చెమటలు పట్టేస్తాయి.

బ్రీథబిలిటీ 

ఇందాక చెప్పుకున్నట్టుగా రెయిన్ కోట్ కి కచ్చితంగా బ్రీథబిలిటీ ఉండేలా చూసుకోవాలి. అంటే..వేసుకున్న తరవాత సౌకర్యంగా ఉండాలి. ఎలాంటి ఇబ్బంది ఉండకూడదు. అదే సమయంలో గాలి ఆడే విధంగా ఉండాలి. వేసుకున్న వెంటనే చెమటలు పట్టినట్టు, ఉక్కిరిబిక్కిరి అయినట్టు అనిపిస్తే దాని వల్ల ఎలాంటి ఉపయోగం ఉండదు. అందుకే అలాంటి ఫ్యాబ్రిక్ నే ఎంచుకోవాలి. ఎప్పటికప్పుడు నీరు ఆవిరైపోయే విధంగా ఉండాలి. బ్రీథబిలిటీ ఎక్కువగా ఉండే ఫ్యాబ్రిక్స్ వాడితేనే ఈ సౌకర్యం ఉంటుంది. తేమను ఎక్కువ సేపు పట్టి ఉంచకుండా ఎప్పటికప్పుడు ఈ ఫ్యాబ్రిక్స్ రిలీజ్ చేసేస్తాయి. ఫలితంగా దుర్వాసన రావడం, బరువుగా అనిపించడం లాంటి సమస్యలు రానే రావు. లైట్ వెయిట్ వాటర్ ప్రూఫ్ జాకెట్స్ కి వాడే ఫ్యాబ్రిక్స్ లో ఈ బ్రీథబిలిటీ ఎక్కువగా ఉంటుంది. అందుకే..ఇలాంటివి ఎంపిక చేసుకుంటే మంచిది.

పొడవు

రెయిన్ కోట్స్ లో తప్పనిసరిగా చెక్ చేసుకోవాల్సిన మరో విషయం లెంథ్. ఎంత పొడవు ఉంటే అంత మంచిది. బయటకు వెళ్లినప్పుడు, ఎక్కువ దూరం నడవాల్సి వచ్చినప్పుడు, బయట నిలబడి ఏదైనా పని చేయాల్సి వచ్చినప్పుడు కచ్చితంగా లెంత్ ఎక్కువగా ఉండే రెయిన్ కోట్స్ వాడాల్సి ఉంటుంది. పైగా లెంత్ ఎక్కువగా ఉండడం వల్ల మొత్తం బాడీ అంతా కవర్ అవుతుంది. తడవడానికి అవకాశాలు చాలా తక్కువగా ఉంటాయి. అయితే..మార్కెట్ లో ఇలాంటి ఫుల్ బాడీ రెయిన్ కోట్స్ అందుబాటులో ఉన్నాయి. వాటిలో ఇప్పుడు చెప్పిన విషయాలన్నీ చెక్ చేసుకుని కొనుగోలు చేసుకుంటే మంచిది.