లొకేషన్ హస్టిరీ మిస్ మ్యాచ్.. మెడి‌క్లైమ్ తిరస్కరించిన బీమా కంపెనీ

గుజరాత్‌కు చెందిన ఒక వ్యక్తికి బీమా కంపెనీ ఊహించని షాక్ ఇచ్చింది. అనారోగ్యానికి గురైన అతడు ఆసుపత్రిలో చికిత్స పొందిన తర్వాత మెడిక్లెయిమ్ కోసం బీమా కంపెనీకి దరఖాస్తు చేసుకున్నాడు. అయితే, లొకేషన్ హిస్టరీ సరిగ్గా లేదనే కారణంతో అతడి అభ్యర్థనను ఇన్సూరెన్స్ కంపెనీ తిరస్కరించింది. దీంతో అవాక్కైన బాధితుడు చివరకు వినియోగదారుల ఫోరంను ఆశ్రయించాడు. అక్కడ అతడికి అనుకూలంగా తీర్పు వచ్చింది. వివరాల్లోకి వెళ్తే.. వల్సద్ జిల్లా సిల్వసాకు చెందిన వల్లభ్ మట్కా అనే వ్యక్తి గో డిజిట్ జనరల్ ఇన్సూరెన్స్ కంపెనీలో పాలసీ తీసుకున్నాడు.

గతేడాది సెప్టెంబర్‌లో న్యుమోనియా రావడంతో ఒక ప్రైవేటు ఆసుపత్రిలో చికిత్స తీసుకున్నాడు. డిశ్చార్జ్ అయిన తర్వాత మెడికల్ బిల్లులు (రూ.48,251) క్లెయిమ్ కోసం బీమా కంపెనీకి పంపించాడు. అయితే, గూగుల్ టైమ్‌లైన్ (లొకేషన్ హిస్టరీ) సరిపోవడం లేదని కంపెనీ క్లెయిమ్‌ను తిరస్కరించింది. దీనిపై వల్లభ్ వల్సాద్ జిల్లా వినియోగదారుల కోర్టులో ఫిర్యాదు చేశాడు. దీనిపై విచారణ చేపట్టిన కన్జ్యూమర్ కోర్టు.. బీమా కంపెనీకి నోటీసులు పంపింది. ఆసుపత్రి బిల్లులు, కేసు వివరాలు, గూగుల్ టైమ్‌లైన్ స్టేట్‌మెంట్‌లో చాలా తేడాలు ఉన్నాయని ఫోరం దృష్టికి బీమా కంపెనీ తీసుకువచ్చింది.

అతడు చికిత్స సమయంలో ఫోన్ తన దగ్గరే ఉందని చెప్పాడని, కానీ గూగుల్ టైమ్‌లైన్ ప్రకారం అతడి గూగుల్ మ్యాప్‌లో ఆసుపత్రి లొకేషన్ కనిపించలేదని కంపెనీ తెలిపింది. అయితే, ఆసుపత్రి రికార్డులను పరిశీలించిన వినియోగదారుల ఫోరం అతడు ఆసుపత్రిలో చికిత్స తీసుకున్నట్టు నిర్దారించింది. ‘‘ఆసుపత్రిలో చేరి చికిత్స తీసుకున్నట్లు ఇన్సూరెన్స్ కంపెనీ పేర్కొంది. అయినప్పటికీ, ఈ క్లెయిమ్‌ను తిరస్కరించేందుకు గూగుల్ టైమ్‌లైన్ పేరుతో తప్పుడు కారణం చూపుతున్నట్లు కనిపిస్తోంది’ అని ఫోరం అభిప్రాయపడింది.

చివరికి, క్లెయిమ్‌ను పరిష్కరించాలని, అలాగే 8 శాతం వడ్డీ చెల్లించాలని బీమా కంపెనీని అదేశిస్తూ జులై 14న తీర్పు వెల్లడించింది. గూగుల్ టైమ్‌లైన్ ఆధారంగా క్లెయిమ్‌ను తిరస్కరించడం సరికాదని ఫోరం స్పష్టం చేసింది. ఆసుపత్రి రికార్డులు, ఇతర ఆధారాలను పరిగణనలోకి తీసుకోవాలని సూచించింది. బీమా కంపెనీ తీరును తప్పుబట్టి బాధితుడికి న్యాయం చేసింది.