అదానీ ప్రాజెక్టులు రద్దు చేస్తూ,,,ఏపీ ప్రభుత్వం ఉత్తర్వులు

ముఖ్యమంత్రి చంద్రబాబు నాయుడు నేతృత్వంలోని ఆంధ్రప్రదేశ్ ప్రభుత్వం కీలక నిర్ణయం తీసుకుంది. గత ప్రభుత్వం దిగ్గజ పారిశ్రామిక వేత్త గౌతమ్ అదానీ నేతృత్వంలోని అదానీ గ్రూప్‌నకు కట్టబెట్టిన రెండు పవర్ ప్రాజెక్టులను రద్దు చేసింది. అదానీ గ్రీన్ ఎనర్జీ లిమిటెడ్ కు అనుమతులు ఇచ్చిన రెండు పంప్డ్ హైడ్రో స్టోరేజ్ పవర్ ప్రాజెక్టులను రద్దు చేస్తూ ఉత్తర్వులు జారీ చేసింది. మన్యం పార్వతీపురం జిల్లాలోని కురుకుట్టిలో 1,200 మెగావాట్లు, కర్రివలసలో 1,000 మెగావాట్ల పంప్డ్ స్టోరేజీ జల విద్యుత్ కేంద్రాల ప్రాజెక్టులను స్థానిక సమస్యల కారణంగా రద్దు చేయాలని అదానీ గ్రీన్ ఎనర్జీ లిమిటెడ్ కోరింది. ఈ మేరకు ప్రభుత్వం ఉత్తర్వులు జారీ చేసింది.

గతంలో వైఎస్సార్సీపీ ప్రభుత్వం హయాంలో ఈ ప్రాజెక్టులకు అనుమతులు లభించాయి. అయితే, ఆంధ్రప్రదేశ్, ఒడిశా మధ్య సరిహద్దు వివాదాల కారణంగా ఈ ప్రాజెక్టులను రద్దు చేయాలని అదానీ గ్రీన్ ఎనర్జీ లిమిటెడ్ కోరినట్లు తెలుస్తోంది. 'స్థానిక సమస్యల కారణంగా ఈ ప్రాజెక్టులను రద్దు చేయాలని ఏజీఈఎల్ ప్రభుత్వానికి లేఖ రాసింది. వివిధ వాటాదారులతో సంప్రదించిన తర్వాత, ప్రభుత్వం 1200 మెగావాట్ల కురుకుట్టి, 1000 మెగావాట్ల కర్రివలస పంప్డ్ హైడ్రో స్టోరేజ్ పవర్ ప్రాజెక్టులను రద్దు చేయడానికి ఉత్తర్వులు జారీ చేసింది.' అని ఇంధన శాఖ ముఖ్య కార్యదర్శి కె. విజయానంద్ ఒక ప్రకటనలో తెలిపారు.

అదానీ గ్రీన్ సంస్థ ఈ రెండు ప్రాజెక్టులను ఏర్పాటు చేసేందుకు గతంలో అనుమతి పొందింది. 2022 జూన్ 29న అప్పటి వైఎస్సార్సీపీ ప్రభుత్వం ఈ అనుమతులు మంజూరు చేసింది. ఈ ప్రాజెక్టుల సాధ్యాసాధ్య నివేదికలను టీసీఈ లిమిటెడ్‌ను ఉపయోగించి ఆంధ్రప్రదేశ్ పునరుత్పాదక శక్తి అభివృద్ధి సంస్థ తయారు చేసింది. సర్వేలు, పరిశోధనలు, వివరణాత్మక ప్రాజెక్ట్ నివేదిక (DPR) తయారీ బాధ్యతను అదానీ గ్రీన్ తీసుకుంది. అయితే సెప్టెంబర్ 12, 2024న ఒడిశా, ఆంధ్రప్రదేశ్ మధ్య సరిహద్దు వివాదం తలెత్తిన కారణంగా ఈ రెండు ప్రాజెక్టులను రద్దు చేయాలని అదానీ సంస్థ అభ్యర్థించింది. కంపెనీ చెల్లించిన ఫెసిలిటేషన్ ఛార్జీలను తిరిగి చెల్లించాలని లేదా 1000 మెగావాట్ల పెదకోట, 600 మెగావాట్ల రైవాడ PSP ప్రాజెక్టులకు బదిలీ చేయాలని కోరింది. ఈ క్రమంలో పెదకోట, రైవాడ ప్రాజెక్టులను కూడా AGELకు కేటాయించారు.

అదానీ సంస్థ రద్దు ప్రతిపాదనను జూలై 17న జరిగిన రాష్ట్ర పెట్టుబడుల ప్రోత్సాహక మండలి (SIPB) సమావేశంలో ఉంచారు. డెవలపర్ అభ్యర్థన మేరకు స్థానిక సమస్యల కారణంగా కురుకుట్టి, కర్రివలస ప్రాజెక్టులను రద్దు చేయడానికి అంగీకరించారు. అని ముఖ్య కార్యదర్శి విజయానంద్ తెలిపారు. స్థానిక సమస్యల కారణంగా ఈ ప్రాజెక్టులు రద్దు చేయాలని అదానీ గ్రీన్ లేఖ రాసిన క్రమంలో రద్దు చేసినట్లు చెప్పారు.