కేవలం వంద రూపాయలకే సొంత ఇల్లు,,,విదేశాల్లో స్థిరపడాలనుకునే వాళ్లకు బంపరాఫర్

సొంత ఇల్లు కొనుక్కోవాలనేది ప్రతీ ఒక్కరి కల. తమ కలను నెరవేర్చుకోవడానికి జీవితాంతం కష్టపడుతుంటారు చాలా మంది. అప్పుసొప్పు చేసి, భార్యాపిల్లల మీద ఉన్న బంగారం సైతం అమ్మి కూడా చాలా మంది ఇళ్లను సొంతం చేసుకుంటుంటారు. ముఖ్యంగా విదేశాలకు వెళ్లాలనుకునే వారు అక్కడికెళ్లాక రెంట్లు కట్టేందుకే సగం జీతాన్ని ధారపోయాల్సి ఉంటుంది. కానీ అదేమీ లేకుండా కేవలం వంద రూపాయలకే.. అది కూడా విదేశాల్లో ఇల్లు కొనుగోలు చేసేయొచ్చు. అయితే ఈ అద్భుతమైన ఆఫర్‌ను తీసుకువచ్చింది మరేదేశమో కాదు ఫ్రాన్స్. అక్కడి అంబర్ట్ అనే పట్టణంలో కేవలం ఒక్క యూరో (భారత కరెన్సీ ప్రకారం రూ.100 రూపాయలు) చెల్లించి ఇంటిని కొనుగోలు చేసే అవకాశన్ని ఇచ్చింది.

ఫ్రాన్స్‌లోని అంబర్ట్ అనే ప్రశాంతమైన పట్టణం.."ఖాళీ వికర్ణం" అని పిలువబడే ప్రాంతంలో ఉంది. ఈ ప్రాంతంలో జనాభా సాంద్రత తక్కువగా ఉంటుంది. ప్రస్తుతం ఇక్కడ కేవలం 6500 మంది మాత్రమే నివసిస్తున్నారు. అయితే తగ్గిపోతున్న ఈ జనాభాను పెంచుకోవడానికే ఫ్రాన్స్ ప్రభుత్వం ఈ వినూత్నమైన కార్యక్రమాన్ని ప్రారంభించింది. కేవలం ఒక యూరో చెల్లించి ఇల్లు సొంతం చేసుకునే అవకాశాన్ని అందిస్తోంది. అయితే ఈ సువర్ణావకాశాన్ని అందిపుచ్చుకోవాలంటే కొన్ని షరతులు కూడా వర్తిస్తాయని పేర్కొంది.

ఇల్లు కొనుగోలు చేసేవారు, సాధారణంగా శతాబ్దాల నాటివైన ఈ ఆస్తులను పూర్తిగా పునరుద్ధరించడానికి కట్టుబడి ఉండాలి. అంతేకాకుండా కొనుగోలు చేసిన ఇంట్లో కనీసం మూడు సంవత్సరాలు కచ్చితంగా నివసించాలి. పునరుద్ధరణ ఖర్చులు.. ఇంటి పరిమాణం, పరిస్థితిని బట్టి 20,000 యూరోల నుంచి 50,000 యూరోల (భారత కరెన్సీ ప్రకారం సుమారు రూ.20 లక్షల నుంచి రూ.50 లక్షల) వరకు ఉండవచ్చు. ఈ ఖర్చులన్నీ కొనుగోలుదారుడే భరించాల్సి ఉంటుంది.

ఫ్రాన్స్ ప్రజలతో పాటు విదేశీయులు కూడా ఈ ఇళ్లను కొనగోలు చేయవచ్చు. అయితే వీరికి కచ్చితంగా ఫ్రెంచ్ భాష తెలిసి ఉండాలనే నిబంధన ఏమీ లేకపోయినప్పటికీ.. అక్కడి స్థానికులు, అధికారులు, కాంట్రాక్టర్లతో మెరుగైన సంభాషణ కోసం ఫ్రెంచ్ నేర్చుకోవడం మంచిదని సూచిస్తున్నారు. కొనుగోలుదారులకు మద్దతుగా స్థానిక ప్రభుత్వం తక్కువ వడ్డీకే రుణాలను, పునరుద్ధరణ గ్రాంట్‌లను అందిస్తుంది. పట్టణాల నుంచి ప్రజలు వలస వెళ్లడం వల్ల జనాభా తగ్గిపోతున్న తరుణంలో.. చిన్న పట్టణాలు, తమ సాంస్కృతిక వారసత్వాన్ని కాపాడుకోవడానికి, కొత్త ప్రజలను ఆకర్షించడానికి ఇలాంటి ప్రోత్సాహకాలను అందిస్తున్నాయి.ఈ పథకం ద్వారా పట్టణానికి కొత్త కుటుంబాలను ఆకర్షించి, పాఠశాలలు, దుకాణాలు, ఇతర స్థానిక వ్యాపారాలకు పునరుజ్జీవం పోయాలని ఆశిస్తున్నారు.