భారత దేశానిది డెడ్ ఎకానమీయా?.. అమెరికన్ ఏఐ ప్లాట్‌ఫామ్‌ల ఆశ్చర్యకరమైన సమాధానాలు

అగ్రరాజ్యం అమెరికా అధ్యక్షుడు డొనాల్డ్ ట్రంప్.. భారత ఆర్థిక వ్యవస్థపై చేసిన వ్యాఖ్యలు ప్రస్తుతం దేశంలో రాజకీయంగా చర్చకు దారితీస్తున్నాయి. భారత ఆర్థిత వ్యవస్థ పూర్తిగా పతనం అయిందంటూ ట్రంప్ చేసిన వ్యాఖ్యలపై తీవ్ర ఆగ్రహావేశాలు వ్యక్తం అవుతున్నాయి. ఇలాంటి సమయంలోనే అనేక మంది నిపుణులు స్పందిస్తూ.. భారత ఎకానమీ చాలా గట్టిదని చెబుతున్నారు. కానీ అమెరికన్లు మాత్రం ట్రంప్ మాటనే మళ్లీ మళ్లీ చెబుతుండగా.. తాజాగా ఆ దేశానికి చెందిన ఐదు ఏఐ ప్లాట్‌ఫామ్‌లను ఇదే ప్రశ్న అడగ్గా.. అవి చెప్పిన సమాధానాలు అందరినీ ఆశ్చర్యానికి గురి చేస్తున్నాయి. మరి అవేం చెప్పాయో మనం ఇప్పుడు తెలుసుకుందామా..?

ట్రంప్ చేసిన వ్యాఖ్యలపై "భారత ఆర్థిక వ్యవస్థ పతనమైందా?" అనే ప్రశ్నను ఐదు ఏఐ ప్లాట్‌ఫారమ్‌లకు పంపించగా.. అవి ఈ విధంగా స్పందించాయి. ముఖ్యంగా చాట్‌జీపీటీ.. భారత ఆర్థిక వ్యవస్థ పతనం కాలేదని.. అది ఎంతో ప్రతిష్ఠాత్మకమైనదని చెప్పింది. అలాగే గ్రోక్ .. లేదు భారత్‌ది డెడ్ ఎకానమీ కాదని పేర్కొంది. అంతటితో ఆగకుండా ప్రపంచ వ్యాప్తంగా వేగంగా అభివృద్ధి చెందుతున్న ప్రధాన ఆర్థిక వ్యవస్థల్లో ఒకటని వివరించింది.

ఇక మెటా ఏఐ స్పందిస్తూ.. భారత ఆర్థిక వ్యవస్థ చనిపోలేదని, ప్రపంచంలోనే అత్యంత వేగంగా అభివృద్ధి చెందుతున్న ప్రధాన ఆర్థిక వ్యవస్థల్లో ఒకటిగా ఉందని వెల్లడించింది. అలాగే జెమిని.. భారత ఆర్థిక వ్యవస్థ బలంగా అభివృద్ధి చెందుతోందని స్పష్టం చేసింది. ఇక కోపైలట్.. భారత ఆర్థిక వ్యవస్థ "చనిపోయిన ఆర్థిక వ్యవస్థకు ఏ మాత్రం దగ్గరగా లేదని, దీనికి సరిగ్గా వ్యతిరేకంగా ఉంది" అని బదులిచ్చింది.

రష్యాతో భారత్ వాణిజ్య ఒప్పందాలు చేసుకోవడం, ముఖ్యంగా చమురు కొనుగోలు చేయడంపై అమెరికా చాలా కోపంగా ఉంది. ఈ కోపంతోనే భారత్‌పై 25 శాతం సుంకాలు సహా పలు పెనాల్టీలు విధిస్తున్నట్లు ప్రకటించి ఇప్పటికే దాన్ని అమలు చేశారు. దీన్ని ప్రకటించిన కొన్ని గంటల్లోనే ఆయన భారత ఆర్థిక వ్యవస్థపై తీవ్ర విమర్శలు గుప్పించారు. రష్యా-భారత్ ఎలాంటి ఒప్పందాలు చేసుకుని, వ్యాపారం చేసుకున్నా తనకేమీ సంబంధం లేదంటూనే.. వాటి డెడ్ ఎకానమీలను మరింత దిగజార్చుకునే అవకాశం ఉందని అన్నారు. ఈ వ్యాఖ్యలపై భారత్ తీవ్రంగా స్పందించింది. ఇండియా ప్రపంచంలోనే అత్యంత వేగంగా అభివృద్ధి చెందుతున్న ప్రధాన ఆర్థిక వ్యవస్థల్లో ఒకటని వివరించింది.

భారత ఆర్థిక వ్యవస్థ ప్రస్తుతం ప్రపంచంలోనే ఐదో అతిపెద్ద ఆర్థిక వ్యవస్థగా ఉంది. ఇది రాబోయే కొద్ది సంవత్సరాలలో మూడో అతిపెద్ద ఆర్థిక వ్యవస్థగా మారే అవకాశాలు ఉన్నాయని ఆర్థిక నిపుణులు భావిస్తున్నారు. ఇలాంటి పరిస్థితుల్లో ట్రంప్ వ్యాఖ్యలు కేవలం రాజకీయ ప్రయోజనాల కోసమే చేశారని విశ్లేషకులు అభిప్రాయ పడుతున్నారు.