రాజస్థాన్ ముఖ్యమంత్రి విమానానికి తృటిలో తప్పిన ప్రమాదం

రాజస్థాన్ ముఖ్యమంత్రి భజన్ లాల్ శర్మ ప్రయాణిస్తున్న చార్టర్డ్ విమానానికి తృటిలో పెను ప్రమాదం తప్పింది. ఫలౌడీ ఎయిర్‌పోర్ట్‌లో విమానం ల్యాండ్ అవ్వాల్సి ఉండగా.. పైలట్ పొరపాటున పక్కనే ఉన్న భారత వైమానిక దళానికి (ఐఏఎఫ్) చెందిన రన్‌వేపై విమానాన్ని దించారు. ఈ ఘటన గత గురువారం రోజు సాయంత్రం చోటుచేసుకోగా ఆలస్యంగా వెలుగులోకి వచ్చింది. అయితే ఈ సంఘటనపై డైరెక్టరేట్ జనరల్ ఆఫ్ సివిల్ ఏవియేషన్ (డీజీసీఏ) తీవ్రంగా స్పందించింది. దీనిపై పూర్తి స్థాయిలో దర్యాప్తునకు ఆదేశించింది.

రాజస్థాన్ ముఖ్యమంత్రి భజన్ లాల్ శర్మ ఒక కార్యక్రమంలో పాల్గొనడానికి శనివారం ఫలౌడీకి వెళ్లారు. ముఖ్యంగా జులై 31వ తేదీ గురువారం రోజు సాయంత్రం 3 గంటలకు ఢిల్లీ నుంచి చార్టర్డ్ విమానంలో బయలుదేరారు. అయితే ఆయన ప్రయాణిస్తున్న చార్టర్డ్ విమానం ఫలౌడీ సివిల్ ఎయిర్‌స్ట్రిప్‌లో ల్యాండ్ అవ్వాలి. కానీ పైలట్ పొరపాటు కారణంగా విమానం సివిల్ ఎయిర్‌స్ట్రిప్‌కు బదులుగా 5 కిలో మీటర్ల దూరంలో ఉన్న భారత వైమానిక దళానికి చెందిన రన్‌వేపై దిగింది. అదృష్టవశాత్తు ఎలాంటి ప్రమాదం జరగకపోవడంతో ముఖ్యమంత్రి, విమానంలో ఉన్న ఇతర ప్రయాణికులు సురక్షితంగా బయటపడ్డారు.

ఈ ఘటనకు సంబంధించిన సమాచారం అందిన వెంటనే.. అధికారులు అంతా అప్రమత్తం అయ్యారు. డీజీసీఏ అధికారులు ఈ ఘటనపై విచారణను కూడా ప్రారంభించారు. ఈ ఘటనకు కచ్చితమైన కారణాలను కనుగొనాలని, పైలట్‌ పొరపాటుకు దారి తీసిన పరిస్థితులపై ఆరా తీయాలని ఆదేశించారు. ఇలాంటి ఘటన జరగడం ఫలౌడీలో ఇదే మొదటిసారి కాదు. గతంలో కూడా ఇక్కడ ఇలాంటి కొన్ని సందర్భాలు చోటు చేసుకున్నాయి. 5 కిలో మీటర్ల దూరంలో సివిల్ ఎయిర్‌స్ట్రిప్, ఐఏఎఫ్ రన్‌వే పక్కపక్కనే ఉండటం వల్ల పైలట్లు గందరగోళానికి గురయ్యే అవకాశాలు ఉన్నాయని నిపుణులు అభిప్రాయ పడుతున్నారు.

ముఖ్యమంత్రి వంటి ఒక ఉన్నత స్థాయి వ్యక్తి ప్రయాణిస్తున్న విమానంలో ఇలాంటి పొరపాటు జరగడం, విమాన భద్రత, నియంత్రణ వ్యవస్థలపై అనేక ప్రశ్నలను లేవనెత్తుతోంది. ఈ ఘటనపై విచారణ పూర్తయిన తర్వాత భవిష్యత్తులో ఇలాంటి సంఘటనలు జరగకుండా నివారించడానికి అవసరమైన చర్యలు తీసుకుంటామని డీజీసీఏ అధికారులు తెలిపారు. చూడాలి మరి ఏం జరగనుంది అనేది.