అందుకే షమీని ఇంగ్లాండ్‌తో సిరీస్‌కు ఎంపిక చేయలేదా

టీమిండియా సీనియర్ పేసర్ మహమ్మద్ షమీ .. కొన్ని నెలలుగా భారత క్రికెట్‌కు దూరమయ్యాడు. వరుస గాయాలతో అతడు ఇబ్బంది పడుతున్నాడు. వన్డే ప్రపంచకప్ 2023 ఫైనల్‌ను గాయంతోనే ఆడిన ఈ ప్లేయర్.. ఆ తర్వాత కమ్‌బ్యాక్ ఇచ్చినా.. ఆశించిన మేర రాణించలేకపోతున్నాడు. ఆస్ట్రేలియాతో టెస్ట్ సిరీస్ నాటికి ఫిట్‌గా లేకపోవడంతో అతడిని బోర్డర్ గవాస్కర్ ట్రోఫీకి ఎంపిక చేయలేదు. కానీ ఆ తర్వాత అతడు ఐపీఎల్ ఆడాడు. దీంతో భారత్, ఇంగ్లాండ్ టెస్ట్ సిరీస్‌లో ఆడతాడని అంతా భావించారు. కానీ అనూహ్యంగా సెలక్టర్లు షమీని ఎంపిక చేయలేదు. ఈ విషయం అప్పట్లోనే చర్చనీయాంశంగా మారింది.

 చాలా మంది విశ్లేషకులు షమీని.. బీసీసీఐ సెలక్టర్లు పరిగణలోకి తీసుకోలేదని.. అందుకే ఎంపిక చేయలేదని విశ్లేషించారు. ఐపీఎల్‌ 2025లో సరైన ప్రదర్శన చేయకపోవడం కూడా ఇందుకు కారణమని పేర్కొన్నారు. బీసీసీఐ నిర్ణయం పట్ల షమీ కూడా హర్ట్ అయ్యాడని సోషల్ మీడియాలో ప్రచారం జరిగింది. కానీ తాజాగా మరో విషయం వెలుగులోకి వచ్చింది. ఫిట్‌నెస్‌ సమస్యల వల్లే అతడు ఇంగ్లాండ్‌ టూర్‌కు ఎంపిక కాలేదని సమాచారం. ఇంగ్లాండ్‌ టూర్‌ కోసం జట్టును ఎంపిక చేసే ముందు అజిత్‌ అగార్కర్‌ నేతృత్వంలోని బీసీసీఐ సెలెక్షన్‌ కమిటీ షమీని సంప్రదించినట్లు తెలుస్తోంది. కానీ షమీ తన ఫిట్‌నెస్‌పై కాన్ఫిడెంట్‌గా లేకపోవడంతో సెలక్టర్లు ప్రత్యామ్నాయాలు వెతికినట్లు సమాచారం.

“సీనియర్ పేసర్ మహమ్మద్‌ షమీ జట్టులో స్థానం కోల్పోవడానికి ఫామ్‌ అనేది కారణం కాదు. ఫిట్‌నెస్‌ సమస్యల వల్లే అతడు ఇంగ్లాండ్‌ టూర్‌ కోసం ఎంపిక చేసిన భారత జట్టులో చోటు దక్కించుకోలేకపోయాడు. ఇంగ్లాండ్‌ టూర్‌లో అతడు అవసరమని భావించాం. దీంతో జట్టు ఎంపికకు ముందే సెలక్టర్లు కూడా అతడితో మాట్లాడారు. కానీ షమీ తన ఫిట్‌నెస్‌పై నమ్మకంగా లేడు. ఈ విషయంపై అతడు సెలెక్టర్లకు హామీ ఇవ్వలేకపోయాడు.

రంజీ మ్యాచుల్లోనూ 3-4 ఓవర్లు వేసి మైదానాన్ని వీడేవాడు. దీంతో సుదీర్ఘ ఫార్మాట్‌కు అతడి శరీరం సహకరిస్తుందా అనే ప్రశ్నలు తలెత్తుతున్నాయి” అని బీసీసీఐ వర్గాలు వెల్లడించినట్లు జాతీయ మీడియాలో వార్తలు వచ్చాయి. కాగా ఆగస్టు 28 నుంచి ప్రారంభం కానున్న దులీప్ ట్రోఫీతో మహమ్మద్‌ షమీ టెస్ట్‌ భవిష్యత్తు తేలనుంది! ఈ ట్రోఫీలో అతడు సత్తాచాటితే వెస్టిండీస్‌తో టెస్ట్ సిరీస్‌కు ఎంపికయ్యే అవకాశాలు ఉన్నాయి.