ఏపీలో అక్కడ కొరియన్ రెస్టారెంట్లు, సూపర్ మార్కెట్లు

కొరియన్ సినిమాలంటే మనలో కొందరికి ఇష్టం.. కొరియన్ ఫుడ్ అంటే ఇంకొందరికి ఇష్టం.. కొరియన్ సినిమాలంటే ఏ ఓటీటీలోనో చూసేయొచ్చు. కానీ కొరియన్ రుచులు టేస్ట్ చేయాలంటే.. అలాగే కొరియన్ స్టైల్‌ డ్రెస్సులు వంటివి కావాలంటే.. కాస్త ఆలోచించాల్సిందే. కానీ ఏపీలోని ఆ జిల్లావాసులకు మాత్రం ఇబ్బంది లేదు. ఎందుకంటే అక్కడ కొరియన్ రెస్టారెంట్లు, సూపర్ మార్కెట్లు వెలిశాయ్ మరి. అదెక్కడ అనుకుంటున్నారా.. అదే అనంతపురం జిల్లా.. రాయలసీమలోని అనంతపురం జిల్లా పెనుకొండకు వెళ్తే.. కొరియన్ ఫుడ్ టేస్ట్ చేయొచ్చు. అలాగే కొరియన్లకు సంబంధించిన అనేక పదార్థాలు ఇక్కడ కనిపిస్తాయి.

అనంతపురం జిల్లాలో కియా కార్ల పరిశ్రమ ఏర్పాటు చేసిన సంగతి తెలిసిందే. ప్రస్తుతం ఇక్కడ ఉత్పత్తి కూడా జరుగుతోంది. అయితే కియా పరిశ్రమ కొరియాది కావటంతో ఇందులో కొరియన్లు కూడా ఎక్కువ మంది పనిచేస్తున్నారు. సుమారుగా 400 మంది కొరియన్లు ఇందులో పనిచేస్తున్నారు. వీరంతా కియా ఫ్యాక్టరీ ఎదురుగా ఉన్న టౌన్‌షిప్‌తో పాటుగా పెనుకొండ, గోరంట్ల మండలంలోని పాలసముద్రం ప్రాంతాల్లో నివశిస్తున్నారు. అయితే కొరియన్ల ఆహారానికి మనం తినే తిండికి తేడా ఉంటుంది కదా. అందుకోసమని కొరియన్లకు కావాల్సిన నిత్యావసర సరకులతో ప్రత్యేకంగా సూపర్‌బజార్ ఏర్పాటు చేశారు. అలాగే కొరియావాసుల కోసం ఈ ప్రాంతంలో ప్రత్యేకంగా రెస్టారెంట్లు కూడా వెలిశాయి. వీరి కోసం ప్రత్యేకంగా స్మోకింగ్ జోన్, సెలూన్ కూడా అందుబాటులో ఉన్నాయి.

 ఇక కొరియన్లలో ఎక్కువమందికి నాన్ వెజ్ అంటే మక్కువ ఎక్కువ. దీంతో ఇక్కడి రెస్టారెంట్లలో ప్రత్యేకంగా కొరియన్ వంటకాలు కూడా అందుబాటులో ఉన్నాయి. పెనుకొండ శివార్లలో సియోల్‌ స్టోర్‌ పేరుతో ఏర్పాటు చేసిన సూపర్ బజార్‌లో కొరియన్ల కోసం ప్రత్యేకంగా దుస్తులు, బియ్యం వంటివి కూడా అందుబాటులో ఉన్నాయి. వారి కోసం కొరియా నుంచే కాకుండా రష్యా, థాయిలాండ్, మయన్మార్ దేశాలకు చెందిన బియ్యం వెరైటీలను ఇక్కడ అందుబాటులో ఉంచారు. మరో ఆశ్చర్యకరమైన విషయం ఏమిటంటే ఈ సియోల్ స్టోర్‌లో కాలిఫోర్నియా ప్రీమియం రకపు బియ్యం ధర తెలిస్తే మనమైతే కళ్లు తేల్చేశాం. ఎందుకంటే ఈ రకం బియ్యం పది కేజీలు రూ.7,500 మరి. ఇక కిమిచి అనే పదార్థం అయితే కేజీ రూ.900. ఎవరైనా కొరియన్ రుచులు టేస్ట్ చేయాలంటే ఇక్కడకు వెళ్లొచ్చు.