ప్రధాని మోదీ ప్రకటనతో.... సామాన్యులకు పండగే

వస్తు, సేవల పన్ను విధానంపై ప్రధాని నరేంద్ర మోదీ నేతృత్వంలోని కేంద్ర ప్రభుత్వం పెద్ద ఎత్తున సంస్కరణలకు సిద్ధం అవుతోంది. ఇప్పటికే ప్రధాని.. ఆగస్ట్ 15న స్వాతంత్య్ర దినోత్సవం సందర్భంగా సామాన్యులకు శుభవార్త చెప్పారు. 8 ఏళ్లుగా జీఎస్టీలో ఎన్నో సంస్కరణలు తీసుకొచ్చామని.. ఇప్పుడు సమీక్ష నిర్వహించి ఇంకా కొత్త తరం సంస్కరణలు తేవాల్సి ఉందని అభిప్రాయపడ్డారు. దీనిపై ఉన్నత స్థాయి కమిటీతో సమీక్ష నిర్వహించి.. ఆయా రాష్ట్రాలతో సంప్రదింపులు కూడా జరుపుతున్నట్లు వెల్లడించారు మోదీ. సామాన్యులకు దీపావళి పండగ సందర్భంగా గొప్ప గిఫ్ట్ ఇవ్వబోతున్నట్లు హింట్ ఇచ్చారు. ముఖ్యంగా నిత్యావసర వస్తువులపై పన్ను రేట్లు తగ్గుతాయని చెప్పారు.

మోదీ ప్రకటన తర్వాత వెంటనే కేంద్ర ఆర్థిక శాఖ కూడా కీలక ప్రకటన చేసిన సంగతి తెలిసిందే. కొన్ని ఎంపిక చేసిన వస్తువులపై ప్రత్యేక రేట్లు వర్తిస్తాయని.. వీటిపై 2 శ్లాబుల కింద పన్ను రేట్లు ఉంటాయని స్పష్టం చేసింది. మిగతా కొన్ని వస్తువులపైనే గరిష్ట పన్ను రేట్లు ఉంటాయని పేర్కొంది.

ఇప్పుడు మరో వాదన వస్తుంది. ప్రస్తుతం జీఎస్టీ కింద 0,5,12,18,28 శాతం శ్లాబులు ఉండగా.. 5, 18 శాతం శ్లాబుల్నే కొనసాగించనున్నట్లు తెలుస్తోంది. ఇదే సమయంలో 12, 28 శాతం శ్లాబులకు పూర్తిగా స్వస్తి పలకనున్నట్లు తెలుస్తోంది. ఇదే జరిగితే గనుక దీపావళి నుంచి చాలా వస్తువుల ధరలు దిగొచ్చే అవకాశం ఉంది.

>> జీఎస్టీ కౌన్సిల్ ఈ విధానాన్ని ఆమోదిస్తే గనుక.. ప్రస్తుతం 12 శాతం శ్లాబుల్లో ఉన్న 99 శాతం వస్తువులు .. 5 శాతం శ్లాబుల్లోకి రానున్నాయి. ఇంకా ప్రస్తుతం 28 శాతం శ్లాబుల్లో ఉన్నటువంటి 90 శాతం వస్తువులు.. 18 శాతం శ్రేణిలోకి దిగిరానున్నాయి. ఈ కొత్త విధానంతో .. ఎరువులు, రెనివబుల్ ఎనర్జీ, హస్తకళలు, ఆటోమోటివ్, జౌళి, వైద్యం, బీమా, వ్యవసాయ రంగాలకు లాభం చేకూరనున్నట్లు తెలుస్తోంది.

జీఎస్టీ సంస్కరణలతో తగ్గనున్న వస్తువుల ధరలివే..

టూత్ పేస్ట్, పౌడర్, హెయిర్ ఆయిల్, సబ్బులు.

కుట్టు మెషీన్స్, గొడుగులు

కండెన్స్‌డ్ మిల్క్, ప్రాసెస్డ్ ఫుడ్, ప్యాకేజ్డ్ ఫుడ్స్

ప్రెజర్ కుక్కర్స్, ప్యూరిఫైయర్స్, వాటర్ ఫిల్టర్స్

కంప్యూటర్స్, గీజర్స్, వాక్యూమ్ క్లీనర్స్

రెడీమేడ్ దుస్తులు, ఫుట్ వేర్

వ్యాక్సిన్స్, HIV కిట్స్

ఆయుర్వేద ఔషధాలు

స్టీల్, అల్యూమినియం వంట పాత్రలు

ఏసీ, రిఫ్రిజరేటర్స్, టీవీ, వాషింగ్ మెషీన్లు

కార్లు, మోటార్ సైకిల్ సీట్లు

ముఖ్యంగా ఇన్సూరెన్స్‌పై జీఎస్టీ 18 శాతంగా ఉండగా.. దీనిని 5 శాతం లేదా జీరోకు చేర్చే అవకాశాలు ఉన్నట్లు తెలుస్తోంది. సేవల రంగంపై 18 శాతం వరకు జీఎస్టీ విధించనున్నట్లు సమాచారం. మరోవైపు పొగాకు, సిగరెట్లు వంటి హానికారక వస్తువులపై 40 శాతానికి జీఎస్టీని చేర్చే అవకాశాన్నీ పరిశీలిస్తున్నట్లు విశ్వసనీయ వర్గాల ద్వారా తెలిసింది.