పూరి గుడిసె శుభ్రం చేస్తుండగా అద్భుతం

సాధారణంగా కనిపించే దానికి భిన్నంగా ఏదైనా జరిగితే అది అసాధారణం.. అరుదైన ఘటన.. అలాంటి ఘటనే వైఎస్సార్ కడప జిల్లా లో చోటుచేసుకుంది. వైఎస్సార్ కడప జిల్లా మైదుకూరులో అరుదైన ఘటన జరిగింది. మైదుకూరు మండలంలోని విశ్వనాథపురం గ్రామంలో మూర్తి వెంకటేశ్వర్లు అనే వ్యక్తి నివశిస్తున్నారు. అయితే వెంకటేశ్వర్లు ఇటీవల తన పూరి గుడిసెలోని గచ్చును శుభ్రపరిచే పని మొదలుపెట్టారు. ఈ సమయంలోనే అరుదైన ఘటన జరిగింది. పూరి గుడిసెలోని గచ్చును శుభ్రపరుస్తున్న సమయంలో.. ఇంట్లో 12 టోలాస్, పిడిబాకు బయటపడ్డాయి. గచ్చులో నుంచి బయటపడిన వస్తువులు వింతగా కనిపించడంతో వెంకటేశ్వర్లు ఈ విషయాన్ని అధికారుల వద్దకు తీసుకెళ్లారు.

ఈ క్రమంలోనే వీటిని పరిశీలించిన బొమ్మిశెట్టి రమేష్ అనే చరిత్రకారులు.. ఈ 12 టోలాస్, పిడిబాకు ఆంగ్లేయుల కాలం నాటివిగా గుర్తించారు. ఆంగ్లేయుల కాలంలో టోలాస్‌ను తూకం వేయడానికి ఉపయోగించేవారని ఆయన వివరించారు. అయితే టోలాస్‌లలో 12 టోలాస్‌ అనేది అరుదైనదిగా అభివర్ణించారు. పిడిబాకును అప్పట్లో రక్షణకు, యుద్ధంలోనూ ఉపయోగించేవారని వివరించారు. అయితే ఇల్లు శుభ్రపరుస్తున్న సమయంలో ఇలాంటి అరుదైన, పురాతన వస్తువులు బయటపడటం స్థానికంగా చర్చనీయాంశంగా మారింది.

టోలాస్ అనే పదం సంస్కృతం నుంచి ఉద్భవించింది. దీనర్థం బరువు, లేదా తూయటం. మొఘలుల కాలంలోనూ, అలాగే ఈస్టిండియా కంపెనీ తొలి దశలో టోలా అనే దానిని ద్రవ్యరాశి ప్రాథమిక యూనిట్ కింద పరిగణించేవారు. అయితే ఈస్ట్ ఇండియా కంపెనీ.. ఆ తర్వాత కాలంలో వెండి రూపాయి నాణెం విడుదల చేసింది. అలాగే బ్రిటిష్ ఇండియన్ తూనికలు కొలతల వ్యవస్థకు తోలా (టోలాస్) పునాదిలాంటిది చరిత్రకారులు చెప్తున్నారు. అలాంటి వాటిలో 12 టోలాస్‌ను ప్రత్యేకంగా భావిస్తారు. అలాంటి అరుదైన వస్తువు పూరి గుడిసెలో లభ్మం కావటంతో స్థానికంగా దీనిపై ఆసక్తి, చర్చ జరుగుతోంది. అయితే పురాతన కాలంలో భవనాలు, నిర్మాణాలలో అప్పట్లో ఇలాంటివి భద్రపరిచేవారని చరిత్రకారులు చెప్తున్నారు. అలాంటివే ఇప్పుడు బయటపడి ఉంటాయని చరిత్రకారులు వివరిస్తున్నారు.