భారతీయ వస్తువులను అమెరికా ఆపేస్తే మేమే కొంటాం... రష్యా సంచలన ప్రకటన

రష్యా నుంచి ఆయిల్ కొనుగోలు చేస్తుందనే వంకతో భారత్‌పై అమెరికా అధ్యక్షుడు డొనాల్డ్ ట్రంప్ అదనపు సుంకాలు విధించడం పట్ల మాస్కో తీవ్రంగా మండిపడింది. అమెరికా అధ్యక్షుడు ట్రంప్‌ది ద్వంద్వ వైఖరి అని, రష్యా నుంచి చమురు కొనుగోలు చేస్తుందనే కారణంతో భారత్‌పై సుంకాలు విధించడం దుర్మార్గపు చర్య అని ఆరోపించింది. ఈ మేరకు భారత్‌లోని రష్యా రాయబారి కార్యాలయం బుధవారం ఓ ప్రకటన విడుదల చేసింది. ఇదే సమయంలో రష్యా అధ్యక్షుడు వ్లాదిమిర్ పుతిన్ ఈ ఏడాది చివరిలో ఇండియాకు రానున్నారని తెలిపింది. భారత్ ప్రధాన మంత్రి నరేంద్ర మోదీతో ఆయన భేటీ అవుతారని, ఈ పర్యటనకు సంబంధించి ఖచ్చితమైన తేదీలపై చర్చ జరుగుతోందని పేర్కొంది. ఈ పర్యటన షెడ్యూల్ వివరాలను త్వరలోనే వెల్లడవుతాయని చెప్పింది. కాగా, రష్యాపై ఒత్తిడి తెచ్చేందుకే భారత్‌పై సుంకాలు విధించినట్టు అమెరికా ప్రకటన చేసింది.

చెల్లింపు వ్యవస్థలను మెరుగుపరచడం, వాణిజ్య అవరోధాలను తొలగించడం ద్వారా భారత్‌తో వాణిజ్య సంబంధాలను బలోపేతం చేయాలని రష్యా లక్ష్యంగా పెట్టుకున్న తరుణంలో ఈ ప్రకటన వెలువడింది. ‘క్రూడాయిల్ కొనుగోలుపై భారత్‌కు 5 శాతం డిస్కౌంట్ ఇస్తున్నాం.. సరఫరాను మార్చే అవకాశం లేదని అర్థం చేసుకున్న భారత్‌ దీనివల్ల చాలా ఎక్కువ లబ్ది పొందుతోంది. రష్యా ముడి చమురుకు ప్రత్యామ్నాయం లేదు ఎందుకంటే చాలా పోటీతత్వాన్ని కలిగి ఉంది.. అంతేకాదు, రష్యాకు భారత్ 'చాలా ముఖ్యమైన మిత్రదేశం’’ అని పేర్కొంది.

వాణిజ్య ఒప్పందంలో భాగంగా పాడి, వ్యవసాయ రంగాలను తెరవడంపై భారత్ దృష్టిసారించింది. కానీ, అమెరికాతో భారత్ సంబంధాలు క్షీణించిన సమయంలో రష్యా ఈ ప్రకటన చేయడం చెప్పుకోదగ్గ పరిణామం.వాణిజ్య కార్యకలాపాలను సులభతరం చేయడానికి భారత్‌తో కలిసి మెరుగైన చెల్లింపు విధానాల అభివృద్ధి విషయంలో రష్యా నిబద్దతను రాయబార కార్యాలయం నొక్కి చెప్పింది. ప్రపంచ సవాళ్లు ఉన్నప్పటికీ ఇరు దేశాల మధ్య బలమైన ఆర్థిక భాగస్వామ్యానికి కృషి చేస్తున్నందున ఈ చర్య చాలా ముఖ్యమైనది.

వాణిజ్యాన్ని ప్రభావితం చేసే అంతర్జాతీయ చర్యలపై బలమైన వైఖరిని వ్యక్తం చేస్తూ.. ‘‘ అమెరికా సుంకాలు పెంపు ద్వంద్వ ప్రమాణాలకు నిదర్శనం, అవి జాతీయ ప్రయోజనాలను విస్మరించాయి’ అని రష్యా రాయబార కార్యాలయం విమర్శించింది. భారత్‌తో వాణిజ్య సంబంధాల విషయానికి వస్తే, రెండు దేశాల మధ్య ఆర్థిక లావాదేవీలకు ఆటంకం కలిగించే అడ్డంకులను తొలగించాలనే రష్యా సంకల్పాన్ని రాయబార కార్యాలయ అధికారి స్పష్టం చేశారు. ఈ దిశగా ప్రక్రియలను సులభతరం చేయడం, వ్యాపార లావాదేవీల కోసం మరింత సమర్థవంతమైన వ్యవస్థలను రూపొందించడం వంటి చర్యలను రష్యా ప్రాధాన్యంగా చూస్తోందని ఆయన పేర్కొన్నారు.