క్రికెటర్ వినోద్ కాంబ్లీ ఆరోగ్యంపై అభిమానులు ఆందోళన చెందుతున్నారు

భారత క్రికెట్ జట్టు మాజీ ఆటగాడు, ఒకప్పటి సంచలన క్రికెటర్ వినోద్ కాంబ్లీ  ఆరోగ్యంపై అభిమానులు ఆందోళన చెందుతున్నారు. ఇటీవలే తీవ్ర అనారోగ్యానికి గురై ఆసుపత్రిలో చేరిన ఆయన కోలుకుంటున్నప్పటికీ, ఇంకా సరిగా మాట్లాడలేకపోతున్నాడని ఆయన సోదరుడు వీరేంద్ర కాంబ్లీ తెలిపారు. వినోద్ కాంబ్లీ త్వరగా కోలుకోవాలని ప్రార్థించాలని అభిమానులను ఆయన కోరారు.ఓ టీవీ కార్యక్రమంలో వీరేంద్ర కాంబ్లీ మాట్లాడుతూ, "వినోద్ కాంబ్లీ ప్రస్తుతం ఇంట్లోనే ఉంటున్నాడు. నెమ్మదిగా కోలుకుంటున్నాడు. అయితే, మాట్లాడటానికి చాలా ఇబ్బంది పడుతున్నాడు. అతనికి ఇంకా చికిత్స కొనసాగుతోంది. అతను ఒక ఛాంపియన్, తప్పకుండా తిరిగి వస్తాడు. మళ్లీ మైదానంలో పరుగెడతాడనే నమ్మకం నాకు ఉంది. మీ అందరి ప్రేమ, మద్దతు అతనికి అవసరం" అని అన్నారు.గత ఏడాది డిసెంబర్ 21న వినోద్ కాంబ్లీ తీవ్ర అనారోగ్యానికి గురైన విషయం తెలిసిందే. యూరినరీ ఇన్ఫెక్షన్, కండరాల నొప్పులతో థానేలోని ఆకృతి ఆసుపత్రిలో చేరారు. వైద్య పరీక్షల్లో ఆయన మెదడులో రక్తం గడ్డకట్టినట్లు  గుర్తించారు. దాదాపు 10 రోజుల చికిత్స అనంతరం జనవరి 1న ఆయన ఆసుపత్రి నుంచి డిశ్చార్జ్ అయ్యారు. అప్పటి నుంచి బాంద్రాలోని తన నివాసంలోనే ఉంటూ ఫిజియోథెరపీ తీసుకుంటున్నారు.ఇటీవల తన చిన్ననాటి కోచ్ రమాకాంత్ అచ్రేకర్ స్మారక కార్యక్రమంలో సచిన్ టెండూల్కర్‌తో కలిసి కాంబ్లీ కనిపించిన వీడియో వైరల్ అయింది. అందులో ఆయన చాలా నీరసంగా కనిపించడంతో అభిమానులు ఆందోళన వ్యక్తం చేశారు. గతంలో కాంబ్లీ రెండుసార్లు గుండెపోటుకు గురయ్యారు. ఆర్థిక ఇబ్బందులు, ఇతర సమస్యలతోనూ పోరాడారు. అయితే, కష్టకాలంలో సచిన్‌తో పాటు సునీల్ గవాస్కర్, కపిల్ దేవ్ వంటి దిగ్గజాలు ఆయనకు అండగా నిలిచారు.