డీఎస్సీ ఫలితాలపై స్పష్టత – మెరిట్ లిస్ట్‌పై విద్యాశాఖ మార్గదర్శకాలు విడుదల

ఏపీ మెగా డీఎస్సీ (AP Mega DSC 2025) పరీక్షలు రాసిన అభ్యర్థులకు సంబంధించి విద్యాశాఖ అధికారులు తాజా ప్రకటన విడుదల చేశారు. ఇప్పటికే స్పోర్ట్స్‌ కోటాకు సంబంధించిన మెరిట్‌ జాబితా పూర్తి కావడంతో, ఈ నెల 22 నుంచి ఇతర కేటగిరీలకు చెందిన మెరిట్‌ లిస్ట్‌లను విడుదల చేయడానికి ఏర్పాట్లు జరుగుతున్నాయని మెగా డీఎస్సీ కన్వీనర్‌ ఎం.వి. కృష్ణారెడ్డి తెలిపారు. ఈ జాబితాలను అధికారిక వెబ్‌సైట్‌ https://apdsc.apcfss.in తో పాటు జిల్లా విద్యాశాఖ అధికారుల వెబ్‌సైట్లలోనూ అందుబాటులో ఉంచుతామని తెలిపారు. అభ్యర్థులు ఎటువంటి అపోహలకు లోనవకుండా, కేవలం అధికారిక వెబ్‌సైట్‌ల నుంచే సమాచారం సేకరించాలని సూచించారు.‘జోన్ ఆఫ్ కన్సిడరేషన్’లోకి వచ్చిన అభ్యర్థులకు, వారి వ్యక్తిగత లాగిన్‌ ద్వారా కాల్ లెటర్‌ అందించనున్నట్లు కూడా పేర్కొన్నారు. ఉపాధ్యాయ నియామక ప్రక్రియ పూర్తి పారదర్శకంగా జరుగుతోందని స్పష్టంచేస్తూ, అర్హత కలిగినవారిని మాత్రమే నియమించాలన్నదే ప్రభుత్వ సంకల్పమని కన్వీనర్‌ పేర్కొన్నారు.కాల్ లెటర్‌ వచ్చిన అభ్యర్థులు తమ ఒరిజినల్‌ ధ్రువీకరణ పత్రాలు, ఇటీవల తీసిన కుల ధ్రువీకరణ పత్రం, గెజిటెడ్‌ అధికారితో ధృవీకరించిన మూడు సెట్ల జిరాక్స్‌ ప్రతులు, ఐదు పాస్‌పోర్ట్‌ సైజు ఫోటోలు తీసుకురావాలని సూచించారు. అంతేగాక, వెరిఫికేషన్‌కు ముందు సంబంధిత సర్టిఫికెట్లను వెబ్‌సైట్‌లో అప్‌లోడ్‌ చేయడం తప్పనిసరి. ఈ వెరిఫికేషన్‌కు అవసరమైన పత్రాల జాబితా (చెక్‌లిస్ట్‌) డీఎస్సీ వెబ్‌సైట్‌లో అందుబాటులో ఉంచుతామని కూడా వెల్లడించారు.వెరిఫికేషన్‌కు హాజరుకాకపోతే, లేక అవసరమైన సర్టిఫికెట్లు సమర్పించకపోతే, అర్హతలు సరిపోకపోతే… మెరిట్‌ లిస్టులో ఉన్న తరువాతి అభ్యర్థికి అవకాశం కల్పిస్తామని తెలిపారు.ఇక సోషల్ మీడియా వేదికగా టీచర్ ఉద్యోగాలు ఇప్పిస్తామని చెబుతూ దళారులు చేసే మోసాలకు లోనుకాకుండా జాగ్రత్తగా ఉండాలని ఆయన సూచించారు. అసత్య ప్రచారాలను నమ్మవద్దని, అలాంటి దుష్ప్రచారాలకు పాల్పడే వారిపై చట్టపరమైన చర్యలు తీసుకుంటామని హెచ్చరించారు. అభ్యర్థులు తమ వ్యక్తిగత స్కోర్లు, మెరిట్ లిస్ట్‌, ఎంపిక జాబితా, నియామక ఉత్తర్వుల గురించి తెలిసికొనాలంటే, కేవలం అధికారిక వెబ్‌సైట్ లేదా ప్రభుత్వ ప్రకటనల ద్వారానే సమాచారం పొందాలని స్పష్టం చేశారు.