బరువు తగ్గడానికి సింపుల్ ప్లాన్ రోజూ పాటిస్తే చాలు

అధిక బరువు శరీర ఆకృతిని పాడు చేయడమే కాకుండా ఎన్నో ఆరోగ్య సమస్యలకు కారణమవుతుంది. అందుకే బరువు తగ్గాలని నిపుణులు అంటారు. అయితే, బరువు తగ్గడానికి రోజు వారీలో కొన్ని మార్పులు చేసుకుంట మంచి ఫలితాలు ఉంటాయని ఎక్స్‌పర్ట్స్ చెబుతున్నారు.

ఈ రోజుల్లో అధిక బరువు ప్రధాన సమస్యగా మారింది. చిన్న వయసులోనే చాలా మంది అధిక బరువు, భారీ కాయంతో బాధపడుతున్నారు. గంటల తరబడి కదలకుండా కూర్చోవడం, జంక్ ఫుడ్ తినడం, తగినంత నిద్ర పట్టకపోవడం, ఇలాంటి అనేక కారణాల వల్ల ఊబకాయం వస్తుంది. బరువు తగ్గడానికి చాలా మంది మందులు వాడతారు. అయితే, కొన్ని సహజ పద్ధతుల ద్వారా బరువు తగ్గవచ్చని నిపుణులు అంటున్నారు. బరువు తగ్గాలనుకునేవారికి ఇక్కడ కొన్ని సులభమైన, ప్రభావవంతమైన పద్ధతులు ఉన్నాయి. అవేంటో ఇప్పుడు తెలుసుకుందాం.

సమతుల్య ఆహారం

* బరువు తగ్గడంలో ఆహారం కీలక పాత్ర పోషిస్తుంది. జంక్ ఫుడ్, షుగరీ డ్రింక్స్, నూనె ఎక్కువగా ఉండే ఆహారాలకు దూరంగా ఉండాలి. బదులుగా పండ్లు, కూరగాయలు, తృణధాన్యాలు, పప్పుధాన్యాలు, ప్రోటీన్లు అధికంగా ఉండే ఆహారాన్ని తీసుకోవాలి.

* ఫైబర్ అధికంగా ఉండే ఆహారాలు: కూరగాయలు, పండ్లు, ఓట్స్ వంటి ఫైబర్ అధికంగా ఉండే ఆహారాల్ని మీ జీవనశైలిలో భాగం చేసుకోండి. ఇలాంటి ఆహారం ఎక్కువసేపు కడుపు నిండుగా ఉంచుతుంది. అదనపు కేలరీలు తీసుకోకుండా అడ్డుకుంటుంది.

* ప్రోటీన్ తినండి: పప్పుధాన్యాలు, గుడ్లు, పెరుగు, చికెన్ ప్రోటీన్ యొక్క మంచి వనరులు. ఇది జీవక్రియను పెంచుతుంది.

* ఆరోగ్యకరమైన కొవ్వులు: గింజలు, అవకాడో, ఆలివ్ నూనె వంటి ఆరోగ్యకరమైన కొవ్వులు బరువు తగ్గడానికి సాయపడతాయి.

క్రమం తప్పకుండా వ్యాయామం

* బరువు తగ్గడానికి వ్యాయామం అత్యంత ప్రభావవంతమైన మార్గం. ప్రతిరోజూ కనీసం 30-45 నిమిషాలు ఏదైనా రకమైన శారీరక శ్రమ చేయండి.

* కార్డియో వ్యాయామాలు: రన్నింగ్, సైక్లింగ్, స్విమ్మింగ్, జంపింగ్ రోప్ వంటి వ్యాయామాలు ఫ్యాట్‌ను బర్న్ చేయడంలో సాయపడతాయి.

* బల శిక్షణ: బరువులు ఎత్తడం, శరీర బరువు వ్యాయామాలు (పుష్-అప్స్, స్క్వాట్స్ వంటివి) బలమైన కండరాలను నిర్మించి, ఎక్కువ కేలరీలను బర్న్ చేస్తాయి.

* యోగా మరియు ప్రాణాయామం: కపాలభాతి, అనులోమం-విలోమం, సూర్య నమస్కారుల వంటి యోగాసనాలు జీర్ణవ్యవస్థను మెరుగుపరుస్తాయి. రెగ్యులర్‌గా ఇవి చేస్తే బరువు తగ్గుతారు.

నీరు పుష్కలంగా తాగండి

శరీరానికి తగినంత నీరు చాలా అవసరం. శరీరంలో నీరు లేకపోవడం వల్ల జీవక్రియ మందగిస్తుంది. ప్రతిరోజూ 8-10 గ్లాసుల నీరు తాగడం వల్ల శరీరం నుంచి విషపదార్థాలు తొలగిపోతాయి. శరీరం నుంచి టాక్సిన్లు బయటకు వెళ్లి బరువు తగ్గడానికి సాయపడుతుంది. ఉదయం ఖాళీ కడుపుతో గోరువెచ్చని నీరు తాగడం వల్ల జీర్ణవ్యవస్థ సక్రియం అవుతుంది. దీంతో, బరువు తగ్గడం ఈజీ అవుతుందని నిపుణులు అంటున్నారు.

తగినంత నిద్ర

తక్కువ నిద్రపోవడం వల్ల హార్మోన్ల అసమతుల్యత ఏర్పడుతుంది. నిద్రలేమి కారణంగా అధిక బరువు పెరిగే ప్రమాదం ఉంది. తగినంత నిద్ర లేకపోవడం వల్ల ఆకలి పెరుగుతుంది. ఇది బరువు పెరగడానికి దారితీస్తుంది. అందుకే తగినంత నిద్ర చాలా ముఖ్యమని నిపుణులు అంటున్నారు. అందుకే ప్రతి రోజూ 7-8 గంటలు గాఢంగా నిద్రపోవడం వల్ల శరీర జీవక్రియ ఆరోగ్యంగా ఉంటుంది.

ఒత్తిడికి చెక్ పెట్టండి

బరువు పెరగడానికి ఒత్తిడి కూడా ఒక కారణం. ఒత్తిడి కారణంగా శరీరంలో కార్టిసాల్ హార్మోన్ పెరుగుతుంది. ఇది బరువు పెరగడానికి కారణమవుతుంది. ధ్యానం, యోగా, సంగీతం ద్వారా బత్తిడిని తగ్గించుకోవచ్చు. మీకు ఇష్టమైన అభిరుచులను అలవర్చుకోవడం ద్వారా కూడా ఒత్తిడిని తగ్గించుకోవచ్చని నిపుణులు అంటున్నారు.

ఒకేసారి ఎక్కువగా తినకండి

చాలా మంది ఒకేసారి ఎక్కువగా తింటుంటారు. ఈ కారణం వల్ల బరువు పెరిగే అవకాశాలు ఎక్కువ. రోజూ మొత్తంలో ఒకేసారి ఎక్కువగా తినడానికి బదులుగా.. రోజుకు 5-6 సార్లు తక్కువ మొత్తంలో తినండి. ఇలా తినడం వల్ల జీవక్రియ వేగవంతం అవతుంది. ఈ పద్ధతి బరువును నియంత్రిస్తుంది. ఇది అతిగా తినకుండా మిమ్మల్ని నిరోధిస్తుంది.

చక్కెర, ప్రాసెస్ చేసిన ఆహారాలకు దూరం

చక్కెర, ప్రాసెస్ చేసిన ఆహారాలలో కేలరీలు ఎక్కువగా ఉంటాయి. ఇది ఊబకాయానికి కారణమవుతుంది. వీటిని తినడానికి బదులుగా.. సహజ తీపిని కలిగి ఉన్న పండ్లను తినండి. పండ్ల రసాలను తాగడం కంటే మొత్తం పండ్లు తినడం మంచిది. ఎందుకంటే అవి ఫైబర్‌ను అందిస్తాయి. ఇది బరువు తగ్గించడంలో సాయపడుతుంది. అంతేకాకుండా వేయించిన ఆహారాలకు కూడా దూరంగా ఉండండి.