షుగర్‌ని తగ్గించే పంచ వ్యూహం, రోజూ పాటిస్తే మీ ఆరోగ్యానికి ఎలాంటి ఢోకా ఉండదు

రోజు రోజుకి డయాబెటిస్ సమస్య వేగంగా పెరుగుతోంది. భారతదేశంలో 10 కోట్లకు పైగా డయాబెటిస్ రోగులు ఉన్నట్టు లెక్కలు చెబుతున్నాయి. అంతేకాకుండా 15 కోట్లకు పైగా ప్రీ డయాబెటిస్ స్టేజ్‌లో ఉన్నట్టు నివేదికలు చెబుతున్నాయి. మన శరీరంలో ఇన్సులిన్ నిరోధకత ఉన్నప్పుడు, రక్తంలో చక్కెర స్థాయి అదుపులో లేనప్పుడు ఈ వ్యాధి వస్తుంది. డయాబెటిస్‌ను సకాలంలో నియంత్రించకపోతే, అది అనేక తీవ్రమైన ఆరోగ్య సమస్యలకు కారణమవుతుంది. మధుమేహనికి సరైన చికిత్స లేదు. అయితే, ఇంట్లోనే సరైన జీవనశైలి ద్వారా షుగర్‌ని నియంత్రించవచ్చు. షుగర్‌ని ఐదు సులభమైన మార్గాల ద్వారా కంట్రోల్‌లో ఉంచుకోవచ్చని నిపుణులు చెబుతున్నారు. ఆ మార్గాలేంటో ఇప్పుడు తెలుసుకుందాం.

ఆహారం

హెల్త్ లైన్ నివేదిక ప్రకారం, మధుమేహాన్ని నియంత్రించడానికి సరైన ఆహారం చాలా ముఖ్యం. తక్కువ కార్బోహైడ్రేట్లు, ఎక్కువ ఫైబర్ ఉన్న ఆహారాన్ని తీసుకోవాలి. మీ ఆహారంలో కూరగాయలు, పండ్లు, తృణధాన్యాలు, పప్పుధాన్యాలు, గింజలను చేర్చుకోండి. అధిక స్వీట్లు, జంక్ ఫుడ్‌ను నివారించండి. ఎందుకంటే అవి చక్కెర స్థాయిని వేగంగా పెంచుతాయి. అంతేకాకుండా ఆహారంలో నూనె, ఉప్పు మొత్తాన్ని తగ్గించండి. అంతేకాకుండా చిన్న భాగాలలో ఆహారాన్ని తినండి. దీంతో రక్తంలో చక్కెర నియంత్రణలో ఉంటుంది.

క్రమం తప్పకుండా వ్యాయామం

​చక్కెర స్థాయిలను నియంత్రించడానికి శారీరక శ్రమ చాలా ముఖ్యమని నిపుణులు అంటున్నారు. డయాబెటిక్ రోగులు ప్రతిరోజూ కనీసం 30 నిమిషాలు తేలికపాటి లేదా మితమైన వ్యాయామం చేయాలి. చురుకైన నడక, యోగా, సైక్లింగ్ లేదా స్విమ్మింగ్ వంటి వ్యాయామాలు చేయడం వల్ల చక్కెరను నియంత్రించవచ్చు. వ్యాయామం శరీర ఇన్సులిన్ సెన్సిటివిటీని పెంచుతుంది. ఇది గ్లూకోజ్ కణాలకు బాగా చేరుకోవడానికి సాయపడుతుంది. చక్కెర స్థాయిని నియంత్రణలో ఉంచుతుంది. వ్యాయామం బరువును కూడా నియంత్రిస్తుంది. ఇది మధుమేహానికి ప్రయోజనకరంగా ఉంటుంది.

ఒత్తిడిని తగ్గించుకోండి

మధుమేహం పెరగడానికి ఒత్తిడి ఒక ప్రధాన కారకం కావచ్చు. ఈ రోజుల్లో చాలా మంది బిజీ లైఫ్‌స్టైల్ వల్ల ఒత్తిడికి గురవుతున్నారు. మీరు ఒత్తిడిలో ఉన్నప్పుడు శరీరంలో కార్టిసాల్, ఇతర హార్మోన్లు విడుదలవుతాయి. ఇవి చక్కెర స్థాయిని పెంచుతాయి. ఒత్తిడి తగ్గించుకోవడానికి ధ్యానం, ప్రాణాయామం వంటి వాటిని లై‌ఫ్‌స్టైల్‌లో భాగం చేసుకోండి. ఒత్తిడిని తగ్గించడం వల్ల చక్కెర స్థాయిలు నియంత్రణలో ఉంటాయి. అంతేకాకుండా మొత్తం ఆరోగ్యానికి చాలా మంచిది.

ప్రతి రోజూ షుగర్ లెవల్స్ చెక్ చేసుకోండి

డయాబెటిస్ నిర్వహణలో క్రమం తప్పకుండా రక్తంలో షుగర్ లెవల్స్ చెక్ చేసుకోవడం చాలా ముఖ్యం. దీంతో చక్కెర స్థాయి ఏంటి, మందులు లేదా ఆహారంలో ఏవైనా మార్పులు అవసరమా అన్న విషయంపై క్లారిటీ వస్తుంది. వైద్యుడిని సంప్రదించిన తర్వాత, ప్రతిరోజూ లేదా వారానికి కొన్ని రోజులు రక్తంలో షుగర్ స్థాయిల్ని కొలవండి. ఆ లెక్కల రికార్డును ఉంచండి. ఈ చిన్న పని మందుల ప్రభావాన్ని మెరుగుపరుస్తుంది. అంతేకాకుండా సరైన సమయంలో ఎలాంటి ఆహారం తీసుకోవాలో ఓ క్లారిటీ వస్తుంది.

సరైన సమయంలో మందులు ముఖ్యం

డయాబెటిస్ మందులను సరైన సమయంలో, సరైన పరిమాణంలో తీసుకోవడం చాలా ముఖ్యం. మందుల పట్ల నిర్లక్ష్యం చక్కెర నియంత్రణను దెబ్బతీస్తుంది. అలాగే, మందులతో పాటు సరైన ఆహారం, వ్యాయామం వంటివి ఫాలో అవ్వడం వల్ల మెడిసిన్ ప్రభావం రెట్టింపు అవుతుంది. వైద్యుణ్ని సంప్రదించకుండా మందుల్ని మార్చడం లేదా ఆపడం చేయవద్దు. మందుల వల్ల ఏదైనా సైడ్ ఎఫెక్ట్స్ ఉంటే వెంటనే వైద్యుణ్ని సంప్రదించండి. ఈ పంచ వ్యూహం పాటించడం వల్ల షుగర్‌ని నియంత్రణలో ఉంచుకోవచ్చని నిపుణులు అంటున్నారు.