పీఎం లేదా సీఎం తొలగింపు బిల్లు... అమిత్ షా వ్యాఖ్యలకు కేజ్రీవాల్ కౌంటర్

తీవ్రమైన నేరారోపణలతో అరెస్టై నెల కంటే ఎక్కువ కాలం జైలులో ఉంటే ప్రధాన మంత్రి, కేంద్ర మంత్రులు లేదా ముఖ్యమంత్రులను తొలగించే ప్రతిపాదిత బిల్లుపై కేంద్ర హోంమంత్రి అమిత్ షా వాఖ్యలకు ఆమ్ ఆద్మీ పార్టీ (ఆప్) అధినేత అరవింద్ కేజ్రీవాల్ కౌంటర్ ఇచ్చారు. ఒకరిని తప్పుడు కేసుల్లో ఇరికిస్తే.. అతడు నిర్దోషి విడుదలేతే ఆ తప్పుడు కేసు పెట్టిన వారు కూడా అదే చర్యను ఎదుర్కొంటారా? అని కేజ్రీవాల్ ప్రశ్నించారు. తీవ్రమైన అవినీతి ఆరోపణలను ఎదుర్కొనే వ్యక్తులను తమ పార్టీలో చేరుకుని, వారి కేసులన్నీ కొట్టేసి మంత్రిగా, డిప్యూటీ సీఎం, సీఎంగా చేసే అలాంటి మంత్రి లేదా ప్రధాని కూడా పదవికి రాజీనామా చేయాలా? అని ఈ మేరకు ఎక్స్ (ట్విట్టర్)లో కేజ్రీ నిలదీశారు.

‘‘ తీవ్రమైన నేరాలకు పాల్పడిన వారిని తన పార్టీలో చేర్చుకుని, వారి కేసులన్నీ మాఫీచేసి వారిని మంత్రిగా, ఉప ముఖ్యమంత్రిగా లేదా ముఖ్యమంత్రిగా చేసే వ్యక్తి, అలాంటి మంత్రి/ ప్రధానమంత్రి కూడా తన పదవికి రాజీనామా చేయాలా? అలాంటి వ్యక్తికి ఎన్నేళ్లు జైలు శిక్ష విధించాలి? ఒకరిపై తప్పుడు కేసు నమోదు చేసి జైలుకు పంపి, తరువాత వారిని నిర్దోషిగా ప్రకటిస్తే, అతడిపై తప్పుడు కేసు పెట్టించిన మంత్రికి ఎన్ని సంవత్సరాలు జైలు శిక్ష విధించాలి? ’’ అని ఢిల్లీ మాజీ ముఖ్యమంత్రి కేజ్రీవాల్ తీవ్రస్థాయిలో విరుచుకుపడ్డారు.

సీఎం లేదా ప్రధాని అయినా జైలు నుంచే పరిపాలించడం మంచి విషయమేనా? అంటూ ఏఎన్ఐ వార్తా సంస్థకు ఇచ్చిన ఇంటర్వ్యూలో కేంద్ర మంత్రి అమిత్ షా ప్రశ్నించారు. పరోక్షంగా ఢిల్లీ మద్యం పాలసీ కుంభకోణం కేసులో అరవింద్ కేజ్రీవాల్ అరెస్టైనా.. రాజీనామా చేయకుండా జైలు నుంచి పాలన సాగించడంపై పరోక్షంగా ప్రస్తావించారు. ఇది మన ప్రజాస్వామ్యానికి మర్యాదపూర్వకంగా ఉంటుందా? అని ప్రతిపక్షాలపై విమర్శలు గుప్పించారు. ఇక, ఈ బిల్లును తీవ్రంగా ప్రతిపక్షాలు వ్యతిరేకించడంపై ఆయన ఆగ్రహం వ్యక్తం చేశారు. ప్రస్తుతం ఈ బిల్లుపై కేంద్రం జేపీసీ వేసిన సంగతి తెలిసిందే.