రేపు ఈ జిల్లాల్లో భారీ వర్షాలు.. బీ అలర్ట్..!

ఏపీవాసులకు ముఖ్య గమనిక. రాష్ట్రంలో మరో రెండు రోజులపాటు వర్షాలు కొనసాగనున్నాయి. ఈ విషయాన్ని ఏపీ విపత్తుల నిర్వహణ సంస్థ వెల్లడించింది. ఒడిశా, పశ్చిమ బెంగాల్ తీరాలపై వాయువ్య బంగాళాఖాతంలో సముద్ర మట్టానికి 1.5 నుంచి 5.8 కి.మీ ఎత్తులో ఉపరితల ఆవర్తనం కొనసాగుతోందని తెలిపింది. దీని ప్రభావంతో వచ్చే 48 గంటల్లోపు అదేచోట అల్పపీడనం ఏర్పడే అవకాశం ఉందని ఏపీ విపత్తుల నిర్వహణ సంస్థ ఎండీ ప్రఖర్ జైన్ వెల్లడించారు ఈ నేపథ్యంలో ఆంధ్రప్రదేశ్ వ్యాప్తంగా పలు జిల్లాల్లో వానలు పడే అవకాశం ఉందని అంచనా వేశారు.

మంగళవారం రోజున శ్రీకాకుళం, విజయనగరం, పార్వతీపురం మన్యం, అల్లూరి సీతారామరాజు జిల్లా ,విశాఖపట్నం జిల్లా, అనకాపల్లి జిల్లాల్లో అక్కడక్కడ మోస్తరు నుంచి భారీ వర్షాలు కురిసే అవకాశం ఉందని ఏపీ విపత్తుల నిర్వహణ సంస్థ వెల్లడించింది. ఇక కాకినాడ, అంబేద్కర్ కోనసీమ, తూర్పు గోదావరి, పశ్చిమ గోదావరి జిల్లాలు, ఏలూరు,కృష్ణా, ఎన్టీఆర్, గుంటూరు జిల్లాల్లో అక్కడక్కడ తేలికపాటి నుంచి మోస్తరు వర్షాలు కురిసే అవకాశం ఉందని తెలిపింది.

మరోవైపు అల్పపీడనం ప్రభావంతో వినాయకచవితి పండుగ రోజు కూడా వర్షాలు కురిసే అవకాశాలు ఉన్నాయి. బుధవారం రోజున విశాఖ జిల్లాలో అక్కడక్కడ మోస్తరు నుంచి భారీ వర్షాలు కురుస్తాయని ఏపీ విపత్తుల నిర్వహణ సంస్థ తెలిపింది. విజయనగరం, శ్రీకాకుళం, పార్వతీపురం మన్యం, అల్లూరి జిల్లా, అనకాపల్లి, కాకినాడ, అంబేద్కర్ కోనసీమ జిల్లా , తూర్పుగోదావరి, పశ్చిమగోదావరి, ఏలూరు, కృష్ణా జిల్లా, ఎన్టీఆర్, గుంటూరు, బాపట్ల జిల్లాల్లో కొన్నిచోట్ల తేలికపాటి నుంచి మోస్తరు వర్షాలు కురిసే అవకాశం ఉందని అంచనా వేసింది. రాష్ట్రంలోని మిగతా జిల్లాల్లో తేలికపాటి వర్షాలు కురుస్తాయని ఏపీ విపత్తుల నిర్వహణ సంస్థ ఎండీ ప్రఖర్ జైన్ వెల్లడించారు.

మరోవైపు భారీ వర్షాలు కురిసే సమయంలో పలు జాగ్రత్తలు తీసుకోవాలని విపత్తుల నిర్వహణ సంస్థ సూచిస్తోంది. పొంగిపొర్లుతున్న వాగులు, వంకల సమీపంలోకి వెళ్లవద్దని సూచించింది. అలాగే పాడుబడిన భవనాలు, కల్వర్టుల సమీపంలో ఉండవద్దని తెలిపింది. పిడుగులు పడే అవకాశం ఉన్న సమయంలో చెట్ల కింద, బహిరంగ ప్రదేశాల్లో ఉండకపోవటం మంచిదని సూచించింది. ఇక వర్షాల సమయంలో విద్యుత్ ఉపకరణాలు వాడేటప్పుడు అప్రమత్తంగా ఉండాలని ఏపీ విపత్తుల నిర్వహణ సంస్థ సూచించింది.