భారతీయులకు శుభవార్త చెప్పిన రష్యా.. వీసా నిబంధనల్లో భారీగా మార్పులు

టారిఫ్‌ల పెంపు, వలస దారుల విషయంలో కఠినంగా వ్యవహరిస్తూ.. ట్రంప్ ప్రపంచ దేశాలను భయపెడుతున్నారు. ఈ ప్రభావం భారతీయుల మీద కూడా బాగానే పడుతుంది. అమెరికాతో పాటు పలు దేశాలు వలస నియమాలను కఠినతరం చేస్తున్న వేళ రష్యా మాత్రం ఇండియన్స్‌కు భారీ శుభవార్త చెప్పింది. భారతీయులకు మద్దతిచ్చేలా వీసా నిబంధనలు మార్చింది. రష్యా కంపెనీలు పలు విభాగాల్లో భారతీయులను నియమించుకునేందుకు ఆసక్తి కనబరుస్తున్నాయి. ఫలితంగా రష్యాలో భారతీయ కార్మికులకు భారీగా డిమాండ్ పెరుగుతోంది. దీని గురించి రష్యాలోని భారత రాయబారి వినయ్ కుమార్ కీలక వ్యాఖ్యలు చేశారు.

వినయ్ కుమార్ ఓ ఇంటర్వ్యూలో మాట్లాడుతూ.. రష్యాలోని వస్త్ర, యంత్రాలు, నిర్మాణ, ఎలక్ట్రానిక్స్ రంగాల్లోని భారతీయులకు డిమాండ్ పెరుగుతోంది. ఇండియన్స్ కార్మికులు కూడా దీన్ని సద్వినియోగం చేసుకుంటున్నారు. ఆయా రంగాల్లో ఉపాధి కోసం పెద్ద సంఖ్యలో భారతీయులు రష్యాకు తరలి వస్తున్నారు. దీన్ని ద‌ృష్టిలో పెట్టుకుని రష్యా వీసా నిబంధనల్ని సడలించింది అన్నారు.

పాస్‌పోర్టులను పొడిగించే కాన్సులర్ సేవలను విస్తరిస్తున్నట్లు వినయ్ తెలిపారు. అమెరికా, బ్రిటన్ వంటి దేశాలు వలసలపై కఠిన ఆంక్షలు విధిస్తున్న వేళ.. రష్యా అందుకు భిన్నంగా భారతీయులకు ఊతమిచ్చేలా చర్యలు తీసుకోవడం గమనార్హం. అధికారిక లెక్కల ప్రకారం.. రష్యాలోని పారిశ్రామిక ప్రాంతాల్లో కార్మిక కొరతను తీర్చడానికి ఈ ఏడాది చివరి కల్లా సుమారు 10 లక్షల మంది నిపుణులైన భారత కార్మికులను తీసుకోవాలని మాస్కో వర్గాలు భావిస్తున్నట్లు గత కొన్ని రోజులుగా వార్తలు వస్తున్నాయి.

రష్యాలోని పలు ప్రముఖ కంపెనీల్లో ఎలక్ట్రానిక్స్‌, మెషినరీ విభాగాలు సిబ్బంది కొరతతో తీవ్రంగా ఇబ్బంది పడుతున్నాయి. దీంతో కంపెనీలు పెద్ద మొత్తంలో భారతీయులను నియమించుకునేందుకు ఆసక్తి చూపుతున్నాయి. ఇప్పటికే పెద్ద సంఖ్యలో భారతీయులు రష్యాకు వచ్చారు. మాస్కోకు భారతీయ వలసలు పెరుగుతున్న నేపథ్యంలో.. రాయబార కార్యాలయం తన సేవల్ని మరింత విస్తరించేందుకు తగు చర్యలు తీసుకుంటుంది. పాస్‌పోర్ట్‌లు అప్‌డేట్‌,అప్రూవల్ వంటి సేవలను వేగవంతం చేసేందుకు యత్నిస్తోంది.

ఇక గత కొన్నాళ్లుగా విద్య, ఉద్యోగా అవకాశాల నిమిత్తం రష్యా వెళ్తున్న భారతీయ విద్యార్థులు, నిపుణులు, లేబర్ సంఖ్య భారీగా పెరుగుతోంది. దీనిపై రష్యాలోని భారత రాయబార కార్యాలయం ఓ నివేదిక విడుదల చేసింది. దీని ప్రకారం రష్యాలో సుమారు 14 వేల మంది భారతీయులు ఉన్నారు. వీరితో పాటుగా భారతీయ మూలాలున్న 1500 మంది ఆఫ్ఘన్ పౌరులు కూడా ప్రస్తుతం రష్యాలో నివసిస్తున్నారు. వీరిలో సుమారు 4,500 మంది ఇండియన్ స్టూడెంట్స్ మెడికల్ అండ్ టెక్నాలజీ రంగాల్లో విద్యను అభ్యసిస్తున్నట్లు నివేదికలు వెల్లడిస్తున్నారు. మిగిలిన వారు వేర్వేరు రంగాల్లో విద్య, ఉపాధి అవకాశాలు పొందుతున్నారు.