ఎమ్మెల్యే కోటంరెడ్డి హత్యకు కుట్ర.. వెలుగులోకి రౌడీషీటర్ల సంచలన వీడియో

ఆంధ్రప్రదేశ్ రాజకీయాల్లో సంచలన పరిణామం చోటు చేసుకుంది. అధికార తెలుగుదేశం పార్టీకి చెందిన ఎమ్మెల్యేను హత్య చేసేందుకు కొందరు కుట్ర చేసినట్లుగా ఉన్న వీడియో.. ఇప్పుడు సోషల్ మీడియాలో చక్కర్లు కొట్టడం పెను సంచలనంగా మారింది. గతేడాది జరిగిన అసెంబ్లీ ఎన్నికల్లో తెలుగుదేశం పార్టీ తరఫున నెల్లూరు రూరల్ నియోజకవర్గం నుంచి పోటీ చేసి విజయం సాధించిన ఎమ్మెల్యే కోటంరెడ్డి శ్రీధర్ రెడ్డి ని హతమార్చేందుకు.. కొందరు రౌడీలు ప్రయత్నం చేసినట్లు ఆరోపణలు వెల్లువెత్తుతున్నాయి. గతంలో వైసీపీలో ఉన్న కోటంరెడ్డి శ్రీధర్ రెడ్డి.. అసెంబ్లీ ఎన్నికలకు ముందు పార్టీ మారి.. తెలుగుదేశంలో చేరారు.

తాజాగా బయటికి వచ్చిన వీడియోలో దాదాపు 7, 8 మంది రౌడీషీటర్లు.. మద్యం సేవిస్తూ మాట్లాడుకుంటున్న మాటలు వినిపిస్తున్నాయి. ఎమ్మెల్యే కోటంరెడ్డి శ్రీధర్‌ రెడ్డిని హతమార్చితే మనకు డబ్బే డబ్బు అంటూ వారు మాట్లాడుకున్నారు. ఆ వీడియోలో ఉన్న రౌడీ షీటర్లను జగదీష్, మహేష్, వినీత్ సహా మరికొందరు ఉన్నట్లు తెలుస్తోంది. అయితే ఇందులో ఉన్న జగదీష్.. రౌడీషీటర్ శ్రీకాంత్ ముఖ్య అనుచరుడు అని సమాచారం. దీంతో ఎమ్మెల్యే కోటంరెడ్డి శ్రీధర్ రెడ్డి హత్యకు ప్లాన్ వెనుక రౌడీషీటర్ శ్రీకాంత్ హస్తం ఏమైనా ఉందా అనే అనుమానాలు వ్యక్తం అవుతున్నాయి.

మరోవైపు.. ఈ వీడియో బయటికి రావడం తీవ్ర సంచలనం రేపుతోంది. ఇక ఈ ఘటనపై నెల్లూరు ఎస్పీ కృష్ణకాంత్ స్పందించారు. ఈ వీడియో తమ పరిశీలనలో ఉందని.. దానిపై దర్యాప్తు చేస్తున్నట్లు వివరించారు. అన్ని వివరాలు సేకరిస్తున్నామని.. త్వరలోనే పూర్తి విషయాలు అందరికీ తెలియజేస్తామని చెప్పారు. ఈ విషయంపై ఎమ్మెల్యే కోటంరెడ్డితో మాట్లాడుతామని.. ఆయన కోరితే సెక్యూరిటీ కల్పిస్తామని చెప్పారు.అయితే ఈ వీడియో ఇంతకుముందే బయటికి వచ్చినట్లు తెలుస్తుండగా.. ఇది పోలీసులకు ముందే తెలిసిననట్లు ఆరోపణలు వస్తుండగా.. ఎందుకు చర్యలు చేపట్టలేదనే విమర్శలు వెల్లువెత్తుతున్నాయి.

 ఇక లేడీ రౌడీషీటర్ నిడిగుంట అరుణ ద్వారా రౌడీషీటర్లు అవిలేల శ్రీకాంత్‌, అతని అనచురుడు జగదీష్‌ సహా మరికొందరు ఈ హత్యకు ప్లాన్ చేసినట్లు కోటంరెడ్డి అనుచరులు ఆరోపిస్తున్నారు. ఈ వీడియోతో పాటు మరిన్ని సాక్ష్యాలు సేకరించినట్లు తెలుస్తోంది. తాము తక్షణమే స్పందించడంతో కోటంరెడ్డి శ్రీధర్ రెడ్డి ప్రాణాలకు ఎలాంటి ముప్పు జరగలేదని పేర్కొంటున్నారు. ఇటీవల కోటంరెడ్డిపై వైసీపీ సోషల్‌ మీడియాలో దుష్ప్రచారం చేశారని పేర్కొంటున్నారు.