బౌన్సర్‌ బెటర్‌గా ఆడేది ఎవరు? కోహ్లీనా.. ధోనీనా? న్యూజిలాండ్ దిగ్గజం సమాధానం!

విరాట్ కోహ్లీ (Virat Kohli), మహేంద్ర సింగ్ ధోనీ (MS Dhoni) – ఈ ఇద్దరిలో విదేశీ పిచ్‌లపై బౌన్సర్‌లను ధోనీనే బాగా ఎదుర్కొంటాడని న్యూజిలాండ్ మాజీ పేసర్ నీల్ వాగ్నెర్ వ్యాఖ్యానించాడు.2014లో ఆక్లాండ్‌లో జరిగిన భారత్ vs న్యూజిలాండ్ తొలి టెస్టు జ్ఞాపకాలను పంచుకున్న వాగ్నెర్, ఆ మ్యాచ్‌లో విరాట్‌ కోహ్లీని బౌన్సర్‌తో ఔట్‌ చేశానని, అదే సమయంలో ధోనీపై తన బౌన్సర్లు పెద్దగా ప్రభావం చూపలేదని వెల్లడించాడు. అయితే ఆ పోరులో ధోనీ వికెట్‌ కూడా తన ఖాతాలో చేరినట్టు గుర్తు చేశాడు.విదేశీ కండిషన్లలో, ముఖ్యంగా షార్ట్‌బాల్ వ్యూహానికి కోహ్లీ కాస్త ఇబ్బంది పడగా, ధోనీ మాత్రం ఆ బౌన్సర్లను స్వేచ్ఛగా ఆడాడని వాగ్నెర్ తెలిపాడు. ఆ మ్యాచ్‌లో న్యూజిలాండ్ 40 పరుగుల తేడాతో విజయం సాధించింది. వాగ్నెర్ నాలుగు కీలక వికెట్లతో మెరిశాడు.భారత్ తొలి ఇన్నింగ్స్‌లో 202 పరుగులకు ఆలౌటైనప్పటికీ, రెండో ఇన్నింగ్స్‌లో ధోనీ టెయిలెండర్లతో కలిసి పోరాడుతూ జట్టును గెలుపు దాకా తీసుకెళ్లే ప్రయత్నం చేశాడు. పెద్ద షాట్లతో ఆశ కలిగించినా, చివరికి వాగ్నెర్ బౌలింగ్‌లో వికెట్ కోల్పోయాడు. ధోనీ పెవిలియన్ చేరిన తర్వాతే మ్యాచ్ భారత్‌ చేతికి నిష్ప్రయోజనమైంది.
*ఓ పాడ్‌కాస్ట్‌లో మాట్లాడిన వాగ్నెర్ ఇలా తెలిపారు:"విరాట్ కోహ్లీకి నేను వేసిన బౌన్సర్‌ను అతను పుల్‌ షాట్‌ ఆడబోయి క్యాచ్‌ ఇచ్చేశాడు. అనంతరం ధోనీ, జడేజా కలిసి ఇన్నింగ్స్ నిలబెట్టే ప్రయత్నం చేశారు. కానీ ధోనీకి బౌన్సర్లు పెద్దగా ఇబ్బంది పెట్టలేకపోయాయి. చివరికి ఆయన వికెట్ కూడా నా ఖాతాలో పడింది.”ఆ మ్యాచ్‌లో తొలుత బ్యాటింగ్ చేసిన న్యూజిలాండ్ 503 పరుగులు చేసింది. టీమిండియా తొలి ఇన్నింగ్స్‌లో 202 పరుగులకు ఆలౌట్ కాగా, న్యూజిలాండ్ రెండో ఇన్నింగ్స్‌లో కేవలం 105 పరుగులకు పెవిలియన్‌కు చేరింది. చివరగా 407 పరుగుల విజయ లక్ష్యంతో బరిలోకి దిగిన భారత్, 366 పరుగుల వద్ద ఆలౌటై, 40 పరుగుల తేడాతో ఓడిపోయింది. ఆ ఇన్నింగ్స్‌లో శిఖర్ ధావన్ 115, కోహ్లీ 67, ధోనీ 39 పరుగులు చేశారు.